بانگا عۆمەر ئۆجالان ژ بۆ پەدەکێ و راستیا تێکلیێن ژەهراوی یێن پەکەکێ و ترکیەیێ

بانگا عۆمەر ئۆجالان ژ بۆ پەدەکێ و راستیا تێکلیێن ژەهراوی یێن پەکەکێ و ترکیەیێ

ژ بۆ برازیێ عەڤدللا ئۆجالان، پارلامەنتەرێ ھەدەپێ عۆمەر ئۆجالان چەند ببیرئانینێن دیرۆکی.

داخویانیا پارلامەنتەرێ ھەدەپێ یێ رحایێ و برازیێ عەڤدللا ئۆجالان عۆمەر ئۆجالان، ئیرۆ د راگاھاندنا پەکەکێ رۆژ نیوسێ یا ل سلێمانیێ ھات وەشاندن. د داخویانیێ دا تێ گۆتن کو عۆمەر ئۆجالان دبێژیتە پەدەکێ کو تێکلیێن خوەیێن د گەل دەولەتا ترک دا قوت بکە.

ئەم نزانین کا عۆمەر ئۆجالان ب راستی وەھا گۆتیە یان نا. ژ بەر کو ئارمانجا سەرەکە یا مەدیایا پەکەکێ ب تایبەت رۆژنیوسێ دەرەو و بێبەختیکرنا ل پدکێ یە. دەم ب دەم گۆتنێن ھندەک رەوشەنبیرێن باشوورێ کوردستانێ ب قەستی شاش وەردگەرینە. لێ یا راست ئەڤە کو کەڤنەشۆپیا سیاسی یا کو عۆمەر ئۆجالان تەمسیل دکە، ھەر تم ژ بۆ پەدەکێ ئیتیھامێن وھا بێەخلاقی و دەرەو دکە.

ب سالانە پەکەکە ھەول ددە تێگھشتنەکا وھا “پەدەکە=ترکیە” چێبکە. نها ھەول ددە کو وەک پەدەکە=ئاکەپە نیشان بدە. پەکەکە ب بەردەوامی د ڤی واری دا دخوازە تێگەهەکە شاش د گرسەیا خوە دە ئاڤا بکە. لۆما ژی عۆمەر ئۆجەلان ژی ب ڤێ مەبەستێ ڤان گۆتنان دکە. لێ دەما ئەم ل ھەڤکێشەیا سیاسی دنێرن، یا کو سیاسەتا خوە ل سەر ترکبوونێ ئەساس دگرە پەکەکەیە. یێ کو تێکۆشینا ئازادیێ یا کوردان یا ل تەڤاھیا پارچەیێن کوردستانێ ب ترکیەیێ ڤە گرێد دە پەکەکەیە. یێ کو تێکۆشینێن ھەرێمی ئاستەنگ دکە پەکەکەیە. پەکەکە ل سەر ستراتەژییا ترکییێ یا ھەرێمی تەڤدگەرە. د خوازە ترکییێ ب خێرا کوردان بکە ھێزەکا سەرەکە ل ھەرێمێ دا. پەکەکە ب ئاخافتنێن خوە یێن ئایدۆلۆژیک و سیاسەتا خوە یا ھەیی پشتا ترکیەیێ دگرە. لێ بەلێ بێشەرمیەکا ووسا د پەکەکێ دا ھەیە کو بێیی راستیا خوە ببینە، دەردۆرا خوە روورەش دکە.

میناک عۆمەر ئۆجالان د پارلەمەنتۆیا ترکیێ دا پارلەمەنتەرە. ل مەجلیسێ ل سەر ڤی ئەساسی؛ “یەکیتی و یەکپارچەبوونا ترکیەیێ بپارێزە” سۆند خوارییە. ئەندامێ ھەدەپێ یە و ھەر رۆژ داخویانیان ددە کو دێ یێکرێزییا ترکیایێ بپارێزە. لێ وەک کو چ پەیوەندیا وی ب ڤێ مەسەلێ نەڤیت، بێی کو شەرم بکە، وەکە کو ئەو ژ مەریخێ دئاخڤە، “بانگی پەدەکێ دکە و دبێژە تێکلیێن خوە د گەل ترکیەیێ دا قوت بکە”.

ھەلبەت تشتا کو دڤێت ژ بۆ عۆمەر ئۆجالان بهێت ببیرئانین، سیاسەتا مامێ وی عەڤدللا ئۆجالان یا د دەربارێ کورد و کوردستانێ دایە. بەلێ، نابیت کەس ژ بەر مرۆڤەکی خوە بهێت دادگەهکرن. لێ بەلێ ژ بەر کو عۆمەر ئۆجالان نە تەنێ وەک برازیەک، وەک سیاسەتمەدار و پەرلەمەنتەرەکی کەڤنەشۆپیا عەڤدللا ئۆجالان دپارێزە، ھەلبەت ئەم دێ سیاسەتا عەڤدلا ئۆجالان بینن بیرا برازییێ وی. تێکلیێن عەڤدلا ئۆجالان یێن د گەل دەولەتا ترک دا یێن کورد فرۆش، ئەم دکارن ڤێ ژی ببێژن کو عەڤدللا ئۆجالان ھەول ددە کوردان بکە گارانتیا ھەبوونا ترکیەیێ ل رۆژھلاتا ناڤین.

کوردێن باکور و کورد ل ھەر قادا کو پەکەکە لێ ھەیە ل گۆری ڤێ راستیێ ھاتنە دیزاینکرن. پەکەکە رۆلا ھەسپێ ترۆیایێ د ناڤا کوردان دلیزە. ل کو دەرێ پەکەکە لێ بە، زمانێ ترکی زمانێ سەرەکی یە، چاندا ترکیا سەروەر بەلاڤ دکە، ترکبوون وەکە رۆل مۆدەل دهێت ئەساس گرتن، تشتێن ب ئەسلێ خوە ترک تێن حەیرانکرن. پەکەکە پارتییەکە کو ھەم د وارێ سیاسی و ھەم ژی د وارێ چاندی دا نوونەراتییا ترکبوونێ دکە و وێ چاندێ بەلاڤ دکە. یێ ترک ئانی رۆژئاڤا، ھەتا بری رۆژھلات ژی رێخستنا پەکەکێ یە.

لەوما ئەگەر ھێزەک ھەبە کو بکاربە تێکلیێن خوە د گەل ترکیێ دا قوت بکە، ئەو ھێز پەکەکە بخوەیە. ژ بەر کو تێکلیا پەدەکێ د گەل دەولەتا ترک دا تێکلیەکا دیپلۆماتیک و سیاسییە. پەدەکە و ھەرێما کوردستانێ ل جیھانا سیاسی دا خوەدی نوونەراتییا کوردستانێ نە. پەیوەندییێن ھەرێما کوردستانێ و پەدەکێ د گەل ترکییێ دا پەیوەندییێن جیرانەتییێ نە وەکە پەکەکێ سەر ئەساسێ تورکبوونێ نیە. ھەرێما کوردستانێ حکوومەتەکا فەدەرال و ناڤدەولەتی یە. پەدەکە ل ھەرێما کوردستانێ یا پر ستراتەژک دەستھلاتدارە. خوەدی سیاسەتێن دەولەتێ یە. خوەدی مافێ، تجاری، دیپلۆماسی و سیاسی یە. خوەدی پایتەختەکێ ناسیار و ئیماژەکا سەروەرە. نە وەکی پەکەکێ دەستھلاتا د تونێلێن دۆلا شیڤییێ دایە. دەستھلاتا وان ل سەر ئەردە نە وەکی پەکەکێ بن ئەردە. پەیوەندی د گەل دەولەتان دا هەنە، نە وەکە پەکەکێ د گەل سازییێن ئیستخباراتی دایە. پەکەکە دخوازە پەدەکێ و پێکھاتەیێن حکوومەتا ھەرێما کوردستانێ بکێشە ئاستا خوەیا نە یاسایی. ژ بەر کو ھەرێما کوردستانێ پەیوەندیێن پر بژارتە و ئالتەرناتیف دشۆپینە کو ترکیا ژی د ناڤ دایە، گارانتیا پاشەرۆژا ھەرێما کوردستانێ و ھەموو گەلێ کوردە. ئەڤ تێکلی نە د گەل پارتیا دەستھلاتدارا ترکیەیێ دانە، بەلکو د گەل دەولەتا ترک دانە. دەما کو پێویست بت دێ وەک پێڤاژۆیا رەفراندۆما سەرخوەبوونا کوردستانێ د گەل ھەموو دەولەتان راوەستینە.

ئەو پێکھاتەیێن د گرێکا ئۆجالان-پکک دە فەتسینە، پێدڤیە پەیوەندیا وان د گەل ترکیێ دا گۆتووبێژ بکن. تێکلیێن پەکەکێ د گەل ترکیەیێ دا نە تێکلیێن دیپلۆماتیک و سیاسی نە، پێوەندیەکا گرێداییبوون و عایدبوونێ یە. عەڤدللا ئۆجالان وەکە ئەفسەرەکی ترک دژیت، ب تەعلیماتێن ترکیایێ ژ بۆ چەپ و راست نامەیان دنڤیسە، ترک دبێژیتێ ئاگربەستێ رابگەهینە ئەو دەملدەست وە دکە، تەڤنێ پەیوەندییێن عەڤدللا ئۆجەلان و پەکەکێ د گەل ترکییێ دا بنگەھێ پێوەندییێن ژەهراوییە. زەرارێ ددە ھەموو جڤاکا کورد. کەسێن عەڤدللا ئۆجەلانێ کو گۆتیە “دایکا من ترکە، ئەز خزمەتکارێ دەولەتا ترکم” وەک سەرۆکێ خوە قەبوول دکن ب بێ شەرمی شیرەتان ل پارتیێن دنێن کوردستانێ دکن. تو بەرێ ئەو رێبازا کو تو نوونەرییا وێ دکی بکێشە سەر خەتا نەتەوی پاشێ ژی گلی و گازندان بکە کاک عۆمەر ئۆجەلان.

پوستێن ھەمان بەش