ئامەریکایێ ل ھەمبەر فرۆتنا بالەفرێن شەری یێن F-16، ئەندامەتیا سوێد و فینلاندایێ بۆ ناتۆیێ، وەک مەرج ل بەر ترکیێ دانیە.
چەند رایەدارێن ئامەریکی ژ بۆ رۆژنامەیا «زە وال سترێت جۆرنال» ئەشکەرە کرنە، ئیدارەیا جۆ بایدن ژ کۆنگرەسێ داخواز دکە، ب قاسی 20 ملیار دۆلاران رەزامەندیێ ل سەر فرۆتنا بالەفرێن شەری یێن F-16 بدە ترکیێ.
ھەرواھا ھات راگەھاندن کو ئەڤ داخواز 40 بالەفرێن F-16 ل خوە دگرە، لێ بەلێ مەرجێ کۆنگرەسێ ژ بۆ فرۆتنا بالەفران ژ بۆ ترکیێ ئەوە کو ئەنقەرە ژ بۆ ئەندامبوونا سوێد و فینلاند بۆ ناتۆیێ، رەزامەندیێ نیشان بدە.
ھەروھا ژ کۆنگرەسێ ھاتیە خوەستن کو رەزامەندی ل سەر فرۆتنا 30 بالەفرێن F-35 بۆ یەونانستانێ نیشان بدە.
پشتی دەستپێکرنا شەرێ ناڤبەرا ئوکراینا و رووسیایێ، ھەردو وەلاتێن سوێد و فینلاندایێ داخوازا خوەیا ئەندامبوونا ناتۆیێ ئەشکەرە کرن و ترکیە ژی، کو ئەنداما ناتۆیێ یە، ل ھەمبەر ڤێ داخوازێ رازی نەبوو و راگھاند، تەنێ ب مەرج ئەندامبوونا سوێد و فینلاندایێ بۆ ناتۆیێ، رازی دبە.
ژ بۆ ڤێ ژی، د مەھا خزیرانا 2022یێ دا رێکەفتنەکە سێ ئالی د ناڤبەرا ترکیە، سوێد و فینلاندایێ دا ھات ئیمزەکرن، د چارچۆڤەیا وێ رێکەفتنێ دا ترکیە ژ سوێدێ داخواز کر، ھەژمارەک ژ وان کەسێن ب تۆمەتا ئەندامبوونا پەکەکێ و تەڤگەرا فەتحوللاھ گولەن داخوازکری نە ئانگۆ بریارا گرتنا وان ھەیە و ل سوێدێ دژین، رادەستی ترکیێ بهێت کرن.
