نووچه‌یه‌ك دل ب ئێش ژ دیلۆكێ

هه‌ر كو دچه‌ وێرانی و مرنا كو ئه‌ردهه‌ژێن 6 سباتێ ب خوه‌ ره‌ ئانین پێتر خوه‌یا دبن، هه‌ژمارا قوربانییان ل باكورێ كوردستانێ بلند دبه‌، شاره‌دارا دیلۆكێ دبێژه‌: «نیڤا نیشته‌جیهێن باژارۆكه‌كی پارێزگه‌هییا وان كو هه‌ژمارا وان 60 هه‌زار كه‌سن، وه‌ندانه‌».

سەرۆکا شارەداریا باژارێ مەزن ئا دیلۆكێ ل باکورێ کوردستانێ فاتیما شاهین، د هەڤپەیڤینەکە تەلەڤیزیۆنی دە راگهاند، ژ بەر ئەردهەژێ نیڤێ 60 هەزار وەلاتیێن باژارۆكێ «ئیسلاحیه»‌ یێ گرێدای دیلۆکێ وندانە و ئەم نزانن چ هاتیە سەرێ وان.

هه‌ر وها گۆت: «ئەم ئێشەکە مەزن دکشینن، رێیێن دیلۆکێ هەموو هاتنە گرتن ژ بەر کو هنەک ژ وان هلوەشیانە، پێدڤیا مە ب ئالیکاریێن لەزگینێن وەک خوارن، ئاڤ، بەتانی و کۆن هەیە.

هه‌روه‌ها ده‌ستنیشان كر، هه‌ری كێم ملیۆنەک کەس ب شەڤ ل کۆلانان ل به‌ر سه‌رمایێ رادزێن.

رۆژا دوشەمێ 6ێ سباتا 2023ێ دەمژمێر 04:17 دەقە ئەردهەژەک ب هێزا 7.7 پلە کو ناڤەندا وێ ناڤچەیا بازارجخا مەرەشێ بوو هەرێم هەژاند و ل باژارێن مەرەش، ئامەد، رها، سەمسوور، مەلەتی، کلیس و دیلۆکێ یێن باکورێ کوردستانێ و باژارێن هاتای، ئەدەنە و ئۆسمانیە یێن ترکیێ بوو سەدەما مرن و برینداربوونا ب هەزاران کەسان.