مەبەستا پەکەکێ ژ دەست نشانکرنا بارەگەھێن پێشمەرگەیان چیە؟

باسکێ لەشکەری یێ پەکەکێ، ھەپەگێ چەپەرێن پێشمەرگەیێن دەڤەرا ئامێدییێ وەکە ئارمانچ دەستنیشان دکە.

دەزگەھێ راگاھاندنا پەکەکێ ANFێ کو ل ئەورۆپایێ وەشانێ دکە، ڤیدیۆیەک ل سەر چەپەرێن پێشمەرگەیان تۆمار کر.

گەریلایەک د ڤیدیۆیێ دا دبێژە، “لەشکەرێن ترک ل ڤر د بن ئالایێ کوردستانێ دا خوە دپارێزن، ژ ڤر ھەر رۆژ ل دژی چەپەرێن گەریلا ئێریش پێک تێن.”

ھەر وھا ژ بۆ تێکدانا مەژییێ مرۆڤان دبێژە “ئەم نزانین ھێزا ل ڤر ھێزا پەدەکێ یە یان ژی ھێزا ئارتێشا ترکە.

سەدەما کو پەکەکە ڤێ یەکێ دبێژە ئەوە ئێریشێن خوەیێن پێشەرۆژێ ل سەر ھێزێن پێشمەرگە رەوا نیشان بدە و ببێژە “مە ئێرشی لەشکەرێن ترک کر، لێ پێشمەرگە و لەشکەرێن ترک د ھەمان چەپەران دا بوون” تەنێ د ڤێ ڤیدیۆیێ دا ژی مرۆڤ دکارە ئارمانجێن قرێژێن پەکەکێ ب زەلالی، ببینە.

چیایێن ئامێدیێ قادا خەباتا رەوا و یاسایی یا پێشمەرگەیە

د ڤیدیۆیا کو پەکەکێ بەلاڤ کری دا جیبەجھ بوونا ھێزێن پێشمەرگە یا ل سەر لووتکەیێن ئامێدیێ و بەھدینان وەکە پێشبازی دهێت نیشاندان. لێ پێشمەرگە ھێزا رەوایا پاراستنا ھەرێما کوردستانێ یە. ھێزا پێشمەرگە ل ھەر بھۆستەکا ئاخا باشوورێ کوردستانێ، ل سەر خاکا خوەیە، گرێدایی حکوومەت و پارلامەنتۆیا خوەیە.

تشتەکی ب ناڤێ “ھەرێمێن گەریلا” نینە. ژ سالا 2019ێ و ڤر ڤە ژ سەدی 90 ژ ھەرێمێن کو پەکەکێ وەکە “ھەرێمێن پاراستنا مەدیا” راگھاندبوون رادەستی ئارتێشا ترک ھاتیە کرن. تاوانا ھەری مەزن ئەوە کو پەکەکێ ئارتێشا ترک 45 کیلۆمەتران کشاندییە ناڤا ئاخا باشوورێ کوردستانێ.

پێشمەرگەیێن گرێن ئامێدییێ ژ ھەموو مەترسییان مە دپارێزن زارۆکێن بەرواری، رێکانی، نێروەیی، نھێلی، زێباری ئانکو ھەموو خەلکێ ڤێ دەڤەرێ نە. ھەموو خەلکێ دەڤەرێ ناڤ و نیشانێن پێشمەرگەیێن ل سەر ڤان گران دزانن. گەلێ دەڤەرا ئامێدی-نھێلی باش دزانە کو ل ڤان گران دا یەک لەشکەرێ ترک ژی د چەپەرێن پێشمەرگێ کوردستانێ دا نینە.

پەکەکە ب خوە ژی پر باش دزانە کو ل سەر گرێن کو بەحسا وان دکە تەنێ ھێزا پێشمەرگە ھەیە.

گەلۆ پەکەکە چما ڤێ دەرەوێ دکە؟

پەکەکێ د سالا 2020ێ دا ل دەڤەرا ئامێدیێ ئێرشی ھێزێن پێشمەرگە کر و د ئەنجامێ دا 7 پێشمەرگە شەھید بوون و نێزیکی 10 پێشمەرگە ژی بریندار بوون. وێ دەمێ ژی سەری ل ڤێ دەرەوێ دا و گۆت ئەڤ ئێرشە مە ئەنجام نەدایە.

د تەڤاھیا سالا 2022یێ دا مژارا چاپەمەنیا پەکەکێ ئەڤە بوو کو دگۆت “پێشمەرگە رێ ل بەر ئارتێشا ترک ڤەدکە”. لێ بەلێ پێشمەرگە تەنێ رێ بوو چەپەرێن خوە ڤەدکرن.

پەکەکە ناخوازە ئەو دەڤەرێن کو رادەستی ئارتێشا ترک کرنە بێن زانین، ئەو دخوازە ژ بۆ بنکەفتنا خوە یا د شەری دا، پێشمەرگە تاوانبار بکە. باجا تێکچوونا خوە ژ بۆ پێشمەرگە ببرە.

ھەپەگێ پشتی ئەردھەژا 6ێ سباتێ یا مەرەشێ چێبوویی، ل دژی ئارتێشا ترک ئاگربەست راگەهاند. ژخوە چ شەرەک ژی نەبوو. دەولەتا ترک بێی بەرگری ھەر جھەکی گرینگێ ستراتەژیک ژ بۆ خوە گرتبوو. پەکەکە گرسەیا خوە ب مرن، ب خوین و شەر مۆتیڤە دکە، ھەر تم دژمنێن خەیالی چێدکە و دخوازە ناڤمالا کوردان تێکبدە.

پەکەکە دخوازە ب پێشمەرگە، نە شەرکەرییا خوەیا ل دژی ئارتێشا ترک ئیزاح بکە

پەکەکە د ڤیدیۆیا کو بەلاڤ کری دا دپرسە، “چما لەشکەرێ ترک دکارە ل گرێ ھەککاری بمینە؟” دوورە ژی دبێژە “ئەڤ دەر گرێ ھەککارییە، رۆژئاڤایێ زاپێ دەولەتا ترک تەنێ ل ڤر ھەیە، ئەڤ دەر جھێ لەشکەرێن کۆلۆنیالیستێن ترکە، ل پێشیا وان ئالا باشوورێ کوردستانێیە، ھێزێن پەدەکێ خوە ژ بۆی وان کرییە مەرتال و پێشی ل ئێریشێن مە دگرن.”

ئەڤ گۆتن ھەموو دەرەون. ئارتێشا ترک ژ سینۆرێ زاخۆ ھەتا سێکووچکا چیایێن زاگرۆسێ یێن ل سەر خەتا شەمزینانێ ل ھەر دەرێیە. پەکەکێ یەک ب یەک ئەڤ جھە رادەستی ترکان کرن و دەرکەت. نھا ژی مینا کو گەر ئەو ئێرشی گرێ ھەککاری بکن دێ کوردستان رزگار بت پێناسە دکە. پەکەکێ ب خوە د ناڤا شەڤەکێ دا گرێ ھەککاری رادەستی ترکان کر و لادا بۆ گرێ بھار پشتا گوندێ بەرچی و گوھەرزێ.

ئەگەر پەکەکە بخوازە ئارتێشا ترک ژ باشوور دەرخینە، دکارە ھەرە و ژ عەڤدال کۆڤی، لێلکان، چیایێ شەکیف و دەڤەرا برادۆست دەست پێ بکە. یان ژی دکارە ھەرە ژ چییایێ خانتوور و مێرگە شیشێ ل ھەفتانینێ دەست پێ بکە. یان دکارە ھەرە ژ زنارا کێستە ل بەرواری بالا، یان ژی ژ کورە ژاری ل پشت شێلادزێ دەست پێ بکە. ھەکە پر دخوازە ئێرشی گرێ ھەککاری ژی بکە سێ ئالییێن وی گری ڤالا نە دێ فەرمۆ، کەسێ دەستێ وە نەگرتییە. لێ مەبەستا پەکەکێ نە چوونا ئاشە مەبەستا پککعێ قووتانا ئاشڤانییە.

پەکەکە ل چ جها ئێریشی دەولەتا ترک ناکە. ئیجا ببێژن ژ بەر پێشمەرگە ئەم نکارن ئێریش بکن، بێەخلاقییەکا مەزنە. پێشمەرگە ژ بۆ کو پەکەکە شەری نەکێشە ناڤەندا باژارێ ئامێدیێ، ژ بۆ پاراستنا دەڤەرێن گەشتووسەیرانا وەکە پارکا بەرێ سیلێ و سوولاڤێ سەیرانگەھێن شێرانە و ژ بۆ پاراستنا ھەموو خەلکێ دەڤەرێ و رێکێن ھاتنووچوونێ ئەڤ لووتکەیێن دەڤەرێ گرتنە. ھەر وھا ژ باژارێ ئامێدیێ ژ باشوور ڤە چ رێکێن وەساییتان ناچن سەرێ گرێ ھەککاری. تەنێ رێکەک کو ژ باشوورێ وی گری را دەرباسی گوندێ کورکوو-بناڤی دبت ھەیە، پەکەکێ د سالا 2011 دا ئەڤ رێکە ژ بۆی خوە سەرەراست کرییە.

چەند راڤەکرنێن پر ساناھی ژی نیشان ددن کو؛ پەکەکە تەڤگەرەکە کو ژ دەرەو کرنێ شەرم و فەدی ناکە. رێڤەبرێن وێ یێن پایا بلند ژی، تشتێن کو ھەر کەس دزانە دەرەوە، بێیی کو سۆرپلی ببن دبێژن. ئاخافتنا کو تێ دا دبێژە پێشمەرگە ل ئامێدیێ ئارتێشا ترکیێ دپارێزە، یێک ژ دەرەوێن پەکەکێ یێن ب زەنگلە. لێ ھەر دەرەوەکێ دیرۆکەک داویبوونێ ھەیە. چاوا کو دەما ب داویھاتنا پەکەکێ نێزیک بوویە، دیرۆکا داویھاتنا ڤان دەرەوان ژی نێزیک بوویە.

پوستێن ھەمان بەش