بێ سەبەب نەگۆتیە کورمێ دارێ ژ دارێیە. کورمێن دارا مە 40 سالن کەتیە دارێ، کورمی دکن و دخوازن دارێ ژ کۆکێ ڤە برزینن.
پەکەکا کو ژ رۆژا رۆژ دا ل سەر ئەساسێ کوشتنا کوردان دەرکەتیە ھۆلێ و د مەخزەنێن ئەنقەرێ دە ھاتیە دامەزراندن، 40 سالن ژ کوشتنا کوردان و وێرانکرنا ئەردنیگارییا کوردستانێ تێر نابە. کەجەکەیا کو وەک پەکەکێ ژی تێ ناسکرن و ل ئیمرالییێ ب دەستوورا ئۆجالان و میتا ترکیێ ھاتیە ئاڤاکرن، رۆژ نامینە کو ئێریشی پەدەکێ نەکە و تۆھمەتێن بێ بنگەھ نەخە ستویێ وێ. پەکەکە و کەجەکەیا کو باکورێ کوردستان وێران کریە و دەرگەڤانییا سینۆرێن داگیرکەران دکە، ھەتا ئیرۆ ل باکور کۆخکەک مریشکان ژی ئازاد نەکریە و ژ خسارێ پێ ڤە نەدایە کوردان. چ ب شەرێ خوە و چ ژی ب سیاسەتا خوە ھەر و ھەر خزمەتا پلان و پرۆژەیێن داگیرکەرێن کوردستانێ کریە و سەدەما دەرکەتنا وێ ژی ئەڤ ب خوەیە.
پەکەکە-کەجەکە ژ بۆ کو تێکچوونا خوە یا ل باکور و دژمناتییا کو ل ھەمبەر کوردێن باکور کریە ڤەشێرە، ب شەڤ و رۆژ ئێریشی پەدەکێ و بارزانییان دکە و وان وەک شریک و ھەڤکارێن دەولەتا ترک نیشان ددە. پەکەکە و کەجەکەیا کو ب دەستێ میتا ترک ھاتنە سازکرن، شووژنا د چاڤێن خوە دا نابینە لێ ئێریشی دەرزییا چاڤێن پەدەکێ و بارزانییان دکە. پەکەکەیا کو ل باشوور و رۆژئاڤا رێ و بەهانەیان ژ بۆ ئارتێشا ترک چێدکە و وان دکشینە ناڤ خاکا ئازاد، وەک ھەر جارێ، ڤێ جارێ ژی تۆھمەتان دخە ستویێ پەدەکێ و پەدەکێ وەک شریک و ھەڤکارێ ئێریشا سەر بالافرخانەیا سلێمانییێ نیشان ددە. وەکە کو وان و ھەڤکارێن خوە تەرۆریستێن حەشدا شەعبی نە ئانیبن شەنگال و کەرکووکێ و ئەودەر نەفرۆتبن داگیرکەران، رادبن ب تۆھمەتێن دژمنانە پەدەکێ گونەھبار دکن.
کەجەکە د چاپەمەنییا خوە یا پەکەکێ دا د دەربارێ ئێریشا سەر بالافرگەھا سلێمانییێ دا پەدەکە کر شریک و ھەڤپارێ دەولەتا ترک و دبێژە “پەدەکە باشوورێ کوردستانێ ژ بۆ ئارمانجێن تەرۆرێ ب کار تینە”. پەکەکەیا کو ب خوە ل باشوور و رۆژئاڤایێ کوردستانێ سەرسەبەبێ ئێریشێن دەولەتا ترکە، سەرێ خوە د ناڤا خوەلییێ دا ڤەدشێرە و کونا خوە بەرددە چۆلێ. ژ بەر کو د دەستێ پەکەکێ و ھەڤکارێن وێ دا تشتەک نەمایە کو کاربن خوە پێ رووسپی بکن و گەمارا خوە پێ بشۆن، ئیجار پەدەکێ ژ بۆ خوە دکن بەهانە و دخوازن کراسێ خوەیێ بێھنپێکەتی ل پەدەکێ بکن.
نەمر مستەفا بارزانی دگۆت “کەسێ روحا نەتەوی نەبیت دێ رۆژەکێ خیانەتێ ل ملەتێ خوە کت”. لێ ئەڤە نە تەنێ رۆژەکێ، ژ رۆژا دەرکەتنە و ھەتا ئیرۆ خیانەتێ ل ملەتێ کورد دکن.
رۆژەڤاکورد
