پەکەکێ د رۆژا جەژنێ دە ژی غەزەبا خوە ڤەرشت و ئێریشی میرێ ئێزدییان کر
دوھ جەژنا ئێزدییان یا سەرسالێ یا پیرۆز چارشەمبا سۆر ھات پیرۆزکرن. ئێزدی د ڤێ جەژنا کو وەکە رۆژا ئافراندنا جیھانێ دحەسبینن دە پەیامێن یەکیتی، ھەڤگرتن و براتیێ ددن. کەسایەتیێن سیاسی یێن ھەرێما کوردستانێ و ھەموو جیھانێ پەیاما یەکرێزیێ دان. ل ئالیێ دن رێڤەبەرێن پەکەکێ د رۆژا عەیدێ دە ژی ل گۆری ئەجیندایێن خوەیێن سیاسی پەیامێن غەزەبێ بەلاڤ کرن و خوەستن ئێزدیان ل دژی ھەڤ دەرخن.
یەک ژ کەسێن کو ئەڤ پەیاما کەرب و غەزەبێ وەشاندی یەک ژ رێڤەبەرێن پەکەکێ یا رەگەز ژن لێ کاراکتەر و شەکلووسیما مێر، یانی سۆزدار ئاڤێستا بوو. سۆزدارێ؛ ل شوونا پەیاما یەکیتیێ بدە، جوداهیا د ناڤبەرا شەنگال-شێخان یا کو دێ د ناڤا جڤاکا ئێزدیان دە ببە سەدەما ناکۆکیان دەرخست ھۆلێ و سەرۆکێ ئێزدیان میر حازم تەحسین بەگ ب خیانەتێ تاوانبار کر.
سۆزدار: د شەخسێ مالباتا میر و ب تایبەتی حازم بەگ دە، دخوازە ناڤمالا جڤاکا ئێزدی ئالۆز بکە.
سۆزدار د پرانیا ئاخاڤتنا خوە دە ل شوونا کو بانگا یەکیتیێ ل جڤاکا ئێزدی بکە دا کو برینێن خوە دەرمان بکن، بانگا پارچەکرنا ئێزدیان کر.
سۆزدارێ د ئاخافتنا خوە دە ئانی زمان کو ئێزدی دخوازن وەکە شەنگال و ئێزدیێن لالەش-شێخان ببن دو بەش و وھا دەوام کر: دخوازن باوەریا ئێزدیا ل شێخان، ل لالەشێ ب ئێخسیر بکن. ھەر وھا د ئاخافتنا خوە دە سۆزدار ئیدیعا کر کو میرێ ئێزدیان حازم بەگ ل دژی ئێزدیان چالاکیان دکە. سۆزدارکێ ئیدیعا کر کو 12 وەلاتان قرکرنا ئێزدیان ناس کرنە و میر حازم بەگ ھەول ددە پێشی ل ڤێ ھەلوەستێ بگرە.
سۆزدارێ بانگ ل گرسەیا پەکەکێ یا ل شەنگالێ کر کو ل دژی میرێ ئێزدییان داخویانیێ بدن.
ئەڤە دەمەکە درێژە پەکەکە د ناڤا گرسەیا خوەیا بچووکا ل شەنگالێ دە ل دژی ئێزدیخانێ میری و سازیا وی یا ئۆلی لالەش ئانتی پرۆپاگاندایێ دکە. پەکەکە دخوازە میرێ ھەموو ئێزدییێن جیھانێ میر حازم بەگ ببە لاینگرێ ڤێ رێخستنێ. بێ گومان ئەڤ مەرجعیێ پیرۆز وەکە میر ژ سیاسەت و ھەڤرکانێ یا رێخستنا دوور دسەکنە. لێ پەکەکە ب توندی دخوازە جەنابێ میر بکە ئاپۆجی. لۆما سیاسەتا شانتاژ “گەف و تەهدیدێن نەچارکرنا کەسەکی کو تشتەکی بکە” و غەزەبێ ل دژی میرێ ئێزدییان تێ مەشاندن. ھەتا پەکەکێ جەنابێ حازم بەگ ژی ب ئاژانێ ترکان تاوانبار کر. لێ میرێ ئێزدییان ب مەشاندنا سیاسەتەکا ھەڤسەنگ د ناڤبەرا ھەولێر و بەغدایێ دە، تەنێ د ئاستا ناڤدەولەتی ناسکرنا جینۆسایدا ئێزدیان و ڤەگەرا ئێزدیان بۆ شەنگالێ دخوازە.
سۆزدارا کو ب سەدەمێن سییاسی بوویە ئێزدی د ئاخافتنا خوە دە ئیشارەت ب ھلبژارتنێن ترکیەیێ ژی کر و گۆت، “جەژنا ھەری مەزنا گەلان دێ 14 گولانێ بە”. خوە وێ ھەول دا جەژنا ئێزدیان یا پیرۆز ژ بۆ پەیامێن خوە یێن سیاسی بکار بینە.
ژ سالا 2014 و ڤر ڤە ب هەماهەنگیا لگە ھێزێن حەشدا شەعبی یێن ئیرانێ پەکەکە ل شەنگالێ ب جھ بوویە. ئەو گرسەیا کو پشتەڤانییا پەکەکێ دکن کۆمەک بچووکە و ژ بەرژەوەندی پەرەستان پێک تێ. پرانیا وان ئەندامێن میلیشیایێن حەشدا شەعبی یا ب ناڤێ یەبەشێ نە و مالباتێن وان وەکە ھێزا چالاکیێ یا پەکەکێ تێن بکارئانین. پەکەکە ھەر چەندی خوە وەکە خوەدی گرسەیەکە مەزن دەستنیشان بکە ژی، لێ، د ھلبژارتنێن 2021ێ یێن ئیراقێ دە تەڤی دەنگێن کادرۆ و سندۆقان ژی نەکاری 1000 دەنگان ب دەست بخە. پەکەکە ھەول ددە ڤێ گرسەیا بچووکا یا پشتەڤانێن خوە، ژ ئۆلا ئێزدیاتی و سازیێن وێ ڤەقەتینە و شنگالێ بکە کامپا ماخموورێ یا دویەمین.
پەکەکە ژ شەنگالێ گەلەک مفا وەردگرە. لە سەر سینۆر بازرگانیێ دکە، نەفتێ دبە و تینە، ل گەل ئیراقێ بازرگانیێ دکە. ژ بەر ڤێ یەکێ پەکەکە ئارام بوونا رەوشا شەنگالێ ژ بۆی خوە وەکە ئاستەنگ دبینە. ژ بەر ڤێ یەکێ ھەر تم ھەول ددە شەنگالێ د ناڤا ئاژاوەیێ دە بھێلە. پەکەکە ب ئاژاوەگێریێ خوەدی دبە.
