بریارە ل باکورێ کوردستانێ و ترکیێ د 14 گولانێ دە ھلبژارتنێن پارلامەنتۆیێ و یێن سەرۆککۆماریێ بێن لدارخستن. هەم پارتیێن ترک و هەم ژی پارتیێن ب سەر ناڤێ کوردان هاتی ئاڤاکرن تێدکۆشن کو بالا کوردان بۆ خوە راکێشن و ژ دەنگێ کوردان سوود وەرگرن، لێ تشتا هەری بالکێش سەکنا پەکەکێ یە د ڤان هلبژارتنان دە، ژ بەر کو هەر کو دچە و بانگەسەیا هلبژارتنا گەرم تر دبە، پەکەکە و رایەدارێن وێ یێن پایەبلند د چاپەمەنیێ دە پێتر ئێریسی سەر پەدەکێ و بارزانی دکن، ئەو ب ئاوایەکی د چاپەمەنیێ دە دئاخڤن و دنڤیسن کو کەسەک شەهرەزا نەبە وێ ووسا بفکرە پەدەکێ و بارزانی ترکیە ل سەر لنگان هشتیە و ئەون بریارێ ل سەر مان و نەمانا ئەردۆگان و ئاکپارتیێ و سەرکەتن یان نەسەرکەتنا وان د هلبژارتنێ دە ددن، هەری داوی ژی ئەندامێ کۆمیتەیا تێکیلیێن دەرڤەیا کەجەکێ یێ ب ناڤێ رۆنی سەردەم ژ رۆژنامەیا ھاولاتی رە کو ل باشوورێ کوردستانێ تێ وەشاندن، ئاخڤی، و ب قاسی ئێریشی پەدەکێ و بارزانی کری ئەوقاس ئێریشی دەولەتا ترکیێ نەکر.
وسا دخویە کو د ھلبژارتنان دە یەکانە ستراتەژیا پەکەکێ و پێکھاتەیێن دن یێن سیاسی ل باکورێ کوردستانێ ژ ناڤ برنا دەستھلاتا رەجەب تەییب ئەردۆگانە کو ئەڤ 21 سالن ل ترکیەیێ دەستھلاتداریێ دکە.
ل گۆری داخویانیێن ھەدەپێ و پەکەکێ گەر ئەردۆگان تێک بچە، دێ کورد د 15 گولانێ دە د ناڤا ترکیایەکا بھەشت دا شیار ببن. لێبەلێ راستی نە وسایە. شێوازێ هاندانا کوردان وەکە کو “ئەم دێ ب ڤێ ھلبژارتنێ شۆرەشێ بکن” تەنێ خاپاندنا کوردان و ب قەدەرا وان لیستنە.
ژ بەر کو کەدخواری و مێتنگەری ل باکورێ کوردستانێ ب ئەردۆگان دەست پێ نەکریە و ب ئەردۆگان ژی داوی نابە. باکورێ کوردستانێ رۆژا کۆمارا ترکیەیێ کو د 29 جۆتمەھا 1923 دە ھاتیە دامەزراندن ھەیا ئیرۆ داگیرکرییە، ئانکو بندەستییا کوردان تەنێ ب ئەردۆگان دەسپێنەکرییە.
ژ بۆ ڤێ ژی گوھەرتنا حکوومەت، سەرۆکوەزیر، سەرۆککۆمار و مەجلیسان کوردێن باکورێ کوردستانێ ژ بندەستییێ رزگار ناکە. ئەنجاما چ ھلبژارتنەکێ نکارە کوردێن باکور رزگار بکە. پرسگرێکا کوردان نە تەنێ لگەل حکوومەتان دە یە، ب مەنتق و پرەنسیبێن دامەزراندنا دەولەتێ ڤە گرێدایی نە. ل ئالیێ دن پەکەکە ب سالانە دبێژە، گەر حکوومەت بگوھەرە، ئەم کورد دێ رزگار بن. لێ دڤێت کورد ل دژی مەنتق، فەلسەفە و پرەنسیبێن ئاڤاکرنا دەولەتا کەمالیست شەری بکە، حکوومەت تەنێ ئیدارەیێن دەمکی نە. پەکەکە کوردان تەنێ ب حکوومەت گوھەرتنان ڤە مژوول دکە، نە ب دەولەتا فاشیست رە. ئەڤ ژی تەنێ بۆ خاپاندنا کوردانە.
رۆنی سەردەمێ پەکەکێ ژ رۆژنامەیێ رە ئانی زمان کو رەژیمێ ب دەربەیا لەشکەری یا 12 ئیلۆنا 1980 کەسێن ئیسلامی گرت ناڤ خوە و وھا پێدە چوو: “بەشا چەپ و سۆسیالیست پشتی دەربەیا لەشکەری یا 12ێ ئیلۆنا 1980، نەکاری ئێدی ژ رەژیمێ رە ببە گەف. ب پێشەنگیا رێبەر ئاپۆ، تەنێ بەرخوەدانا پەکەکێ ما و مەزن بوو. ئەگەر رێبەر ئاپۆ و پەکەکە ل دژی ئەردۆگان تێک چووبان، ئەردۆگان وێ ببا ئاتاتورکێ سەدسالا 2یەمین و وێ چ کەسێ ژی نەکاریبا ل ھەمبەری بسەکنە.”
لێ بەلێ هەر کەس دیرۆکا پەکەکێ و دەولەتێ باش دزانە، هەر کەس دزانە یا دەولەتێ د دەربەیا لەشکەری یا 12 ئیلۆنا 1980 دە پێکئانی، پەکەکێ ب خوە ژی پێش وێ دەمێ ئەڤ یەک ب ئاوایەک هۆڤانەتر ل دژی ولاتپارێزێن کورد پێک ئانی بوو، وەک میناک، ئەو کۆمکوژیێن سڤیل یێن کو پەکەکێ ھەتا 12 ئیلۆنا 1980یێ ئەنجام دای: پەکەکێ، سەرۆکێ تەڤگەرا کاوا فەرید ئووزوون شەھید کر، پەکەکێ ئەندامێ ریا ئازادی PSKT مستەفا چامبەل شەهیدکر، پەکەکێ گەلەک ئەندام و بەرپرسێن کوکێ شەهیدکرن، پەکەکێ، ئەندامێن DDKDێ شەهیدکرن د دەمەکی دە کو ئەو چەکدار نەبوون، پەکەکێ، ئەندام و بەرپرسیارێن تەڤگەرا تێکۆشینێ شەهیدکرن، پەکەکێ، هەموو ئەندام و بەرپرسیارێن تەڤگەرا پێنج پارچاجیان شەهیدکرن، پەکەکێ، ئاغا، سەرۆک عەشیر و مختار کوشتن، ئەو نە چەکدار بوون، سڤیل بوون، پەکەکێ ب ھەزاران مخالفێن خوە یێن ولاتپارێز شەهیدکرن، ھەژمارا سڤیلێن کو ب دەستێ پەکەکێ هاتینە کوشتن بێ سنۆرە.
ڤی بەرپرسێ پەکەکێ هەر وەها گۆت، “یا گرینگ ئەوە کو فاشیزما ئەردۆگان تێک بچە”، لێ پرسگرێکا کوردان ب فاشیزما ئەردۆگان رە گرێدایی نییە، کوردان پسگرێک ب فاشیزما دەولەتا ترکیێ رە هەیە، ئەرۆگان بچە و کلچدارۆغلۆ وەرە سەر دەستهلات چ ژ فاشیزما دەولەتا ترکیێ نایێ گوهەرتن، هەر کەس بێ سەر دەستهلاتا دەولەتا ترکیێ وێ فاشیست بە و ل دژی کوردان ب هەڤکارا خوە رە ئانکو پەکەکێ کار بکە، یا کو فاشیزما دەولەتا ترکا کەمالیست و هەڤکارا وێ پەکەکێ ب کوردان کری ب گوهەرتنا سەرۆککۆمار نایێ ب داوی بوون، گوهەرتنا حکوومەتێن ترکیێ یێن پشتی دامەزراندنا دەولەتا ترکیێ ژ سالا 1923 هەیا نها ژی ڤێ راستی ب زەلالی بەرچاڤ دکە، لێ پەکەکە دخوازە فاشیزما دەولەتا ترکیێ ل همبەر کوردان د شەخسێ ئاردۆگان دە بچووک نیشان بدە.
پەکەکە ووسا دخەبتە و ئالیگرێن خوە دخاپینە کو گەر کچدارۆغلو ل جیێ ئاردۆگان ببە سەرۆکۆمار ئێدی وێ هەر تشت ب داوی ببە، ئێدی وێ کورد ئازاد ببن و ت پسگرێکەک وان نامینە و دبێژە، “ئەگەر ئەردۆگان تێک بچە، وێ ل ھەموو پارچەیان ئارامی چێببە”، لێ ئارامیا هەر چار پارچەیێن کوردستانێ ب ڤێ یەکێ دروست نابە، ئەڤ ئازادی وێ دەمەکی چێببە کو ئەڤ دەولەتێن فاشیست و هەڤکارێن وێ یێن وەکە پەکەکێ تێک بچن و ل قادێ نەمینن.
پەکەکێ ژ بیر کربە ژی مە ژبیر نەکریە دەما بەربژێرێ وێ ئانکو کلچدارۆغلو گۆتی، “ئەز ب بهیستنا ناڤێ کوردستانێ قەلس و دلگران دبم.”
وەلحاسلێ کەلام، ت جوداهیەک د نێڤبەرا مستەفا کەمال و ئەردۆگان و کلچدارۆغلو و هتد دە تونەیە، تەڤ ژی یەک قوماش و یەک ئایدۆلۆژی نە و ل دژی کورد و کوردستانێ نە، ڤێ یەکێ هەر ولاتپارێزەک کورد دزانە، نە حەوجەیە پەکەکە ب ئاخافتنێن خوە یێن رەنگاورەنگ روویێ رەشێ چ یەک ژ دوژمنێن کوردان سپی بکە، روویێ وان و پەکەکێ ئەوقاس رەشە کو ب ت پەیڤێن رەنگین نایێ گوهەرتن.
