ته‌ڤگه‌را «جوانێن شۆره‌شگه‌ر» یێك ژ باسكێن په‌كه‌كێ یێن ل رۆژئاڤا كوردستانێ، ته‌نێ د مه‌ها نیسانێ ده 7 زارۆكێن كورد ره‌ڤاندنه و بۆ له‌شكه‌رییا ب زۆر برنه سه‌ربازگه‌هێن په‌كه‌كێ.
ته‌ڤگه‌را «جوانێن شۆره‌شگه‌ر» كو راسته راست ب ته‌علیماتێن جه‌میل باییك و سه‌رپه‌رشتییا گه‌نه‌رالێ هه‌سه‌دێ مه‌زلووم عه‌بدی كارێ ره‌ڤاندنا زارۆكێن كوردان ل رۆژئاڤا كوردستانێ ژ بۆی په‌كه‌كێ دكه، د مه‌ها نیسانا ئیسال 2023ێ ده 7 زارۆك ره‌ڤاندنه و برنه سه‌ربازگه‌هێن په‌روه‌رده‌هییا چه‌كداری یێن په‌كه‌كێ.
روانگه‌ها سووری یا مافێن مرۆڤان، دوهـ رۆژا سێشه‌می 2/5/2023 راگهاند كو چه‌ته‌یێن په‌كه‌كێ «جوانێن شۆره‌شگه‌ر» زارۆكه‌كی دن یێ 11 سالی ب ناڤێ «خه‌لیل ئیبراهیم حه‌سه‌ن فازل» ل رۆژێن رابووری ژ باكورێ ره‌ققایێ ره‌ڤاندنه و برنه سه‌ربازگه‌هێن په‌كه‌كێ.
ئه‌شكه‌ره كر، ئه‌ڤ زارۆك ب ته‌نێ دژیا ژ به‌ر كو باڤێ وی ل رۆژێن رابووری ژ هێلا هێزێن سووریه‌یا ده‌مۆكراتیك ڤه هاتبوو ده‌سته‌سه‌ر كرن و نها ژی د زیندانێن وان ده یه.
روانگه‌ها سووری دبێژه: «خه‌لیل ئیبراهیم» دبه زارۆكێ 7ێ كو ژ هێلا چه‌ته‌یێن په‌كه‌كێ ڤه د مه‌ها نیسانێ ده تێ ره‌ڤاندن.
«فیدا عه‌بدولجه‌لیل ژ كۆبانی، عه‌بدولره‌زاق ته‌ها حه‌سه‌كێ، نه‌بی عه‌لی فه‌یسه‌ل ژ منبجێ و هه‌ر وها محه‌مه‌د نور ئیبراهیم» كو د ته‌مه‌نا 13 سالیێ ده نه، 4 ژ وان زارۆكانه یێن كو د مه‌ها نیسانێ ده ژ هێلا «جوانێن شۆره‌شگه‌ر» ڤه هاتنه ره‌ڤاندن.
روانگه‌هێ ئه‌ڤ یێك ئاشكه‌ره كر و ژ نه‌ته‌وێن یه‌كبوویی و جڤاكا ناڤده‌وله‌تی خوه‌ست كو رێ ل چه‌كداركرنا زارۆكان و ره‌ڤاندنا وان ژ هێلا رێخستنێن په‌كه‌كێ یێن ل سووریێ بێ گرتن.
هێژایی گۆتنێ یە کو په‌كه‌كه و باسكێن وێ یێن سووری ب سەدان زارۆکێن کورد یێن تەمەنێ وان د ناڤبەرا 12-16 سالی دە ژ بۆ شەرێن پووچ و بەرخوەدانێن خوه یێن سەختە ره‌ڤاندنه، پرانییا ڤان زارۆكان ژی ل بن ناڤێ خولێن په‌روه‌رده‌هییا مووزیكێ، نیگاركێشیێ و سپۆرێ هاتنه خاپاندن و پشتره ره‌ڤاندن.
