په‌كه‌كێ جاره‌كه دن ئێزدیێن شه‌نگالێ ژ بۆی به‌رژه‌وه‌ندییا خوه ب كارئانین و نه‌هشت سه‌رۆكوه‌زیرێ ئیراقێ سه‌ردانا شه‌نگالێ بكه.
محه‌مه‌د شه‌یاع سوودانی پلانكربوو ل رۆژا 12/5/2023 ساعه‌ت 10 سپێدێ سه‌ردانا شه‌نگالێ بكه، لێبه‌لێ ب سه‌ده‌ما پیلانه‌كه په‌كه‌كێ كو وه‌كه هه‌ر جار ئێزدی مه‌تریالێن وێ پلانێ بوون، ئه‌ڤ سه‌ردانا سه‌رۆكوه‌زیر هات هلوه‌شاندن.
چاڤكانیێن پێگه‌ها داركا مازی ئه‌شكه‌ره كرن كو رێڤه‌به‌رییا ب ناڤێ رێڤه‌به‌رییا خوه‌سه‌را شه‌نگالێ و هه‌یئه‌تا عه‌شائیری و پارتیا پادێ و ئاساییشا ئێزیدخانێ و یه‌به‌شێ باسكێن په‌كه‌كێ یێن د شه‌نگالێ ده، به‌ریا سه‌ردانا سه‌رۆكوه‌زیر سوودانی گرسه‌یا خوه یا ل شه‌نگالێ كۆم كر و نه‌هشتن سه‌ردانا سه‌رۆكوه‌زیر بێ ئه‌نجام دایین.
هه‌روه‌ها ده‌ستنیشان كر، پێشی سه‌ردانێ فه‌رماندارێ فرقه‌یا 20 و رایه‌دارێن سازیێن ئه‌وله‌هی و ئیستخباراتێ یێن ئیراقێ ب نوونه‌رێن په‌كه‌كێ یێن ل شه‌نگالێ جڤینه پێكئانین، لێبه‌لێ بێ ئێنجام بوو و ب ڤێ سه‌ده‌مێ سه‌رۆكوه‌زیرێ سوودانی ڤه‌گه‌ری به‌غدایێ و سه‌ردانا خوه یا ژ بۆی شه‌نگالێ هلوه‌شاند.
سوودانی ت ئاماژه ب سه‌ده‌ما هلوه‌شاندنا سه‌ردانێ نه‌كر و ته‌نێ گۆ كو ژ به‌ر ره‌وشا سه‌قایێ خه‌راب سه‌ردان هات هلوه‌شاندن.
پرس ئه‌ڤه، گه‌لۆ چاوا دبه كو سه‌رۆكوه‌زیرێ ئیراقێ كو ل هه‌مانێ ده‌مێ فه‌رماندارێ گشتی یێ هێزێن چه‌كدارێن ده‌وله‌تێ یه نەكاره سه‌ردانا قه‌زایه‌كا ولات بكه كو هێژان بریندارا ده‌ستێ ته‌رۆرا داعشێ یه و سازیێن ده‌وله‌تێ تێ ده تونه نه؟
یا راست په‌كه‌كێ شه‌نگال داگیركرییه و ره‌وشه‌کە ووسا لێ چێكریه كو ژ مافێن مه‌شرووع یێن گه‌لێ شه‌نگالێ بهێزتره و به‌غدا كو ناڤه‌ندا بریارێ یه ل سه‌ر ڤێ سته‌ما كو په‌كه‌كه ل گه‌لێ شه‌نگالێ دكه ده‌نگێ خوه ناكه.
حكوومه‌تا باشوورێ كوردستانێ و حكوومه‌تا فه‌ده‌رال یا ئیراقێ ل ئوكتۆبه‌را 2020ێ په‌یمانا شه‌نگالێ ئیمزه كر و ل گۆری وێ شه‌نگال وێ وه‌ره ئاڤه‌دانكرن و هه‌موو ئاواره‌یێن ئێزدی وێ ڤه‌گه‌رن وارێ خوه و په‌كه‌كه وێ ژ شه‌نگالێ وه‌ره ده‌رخستن و ل جیهێ وان هێزه‌كه ئه‌وله‌هیێ ژ جوانێن ئێزدییان وێ ئه‌وله‌هییا شه‌نگالێ بپارێزه، لێ به‌لێ په‌كه‌كێ نه‌هشت په‌یمان وه‌ره جیبجی كرن ژ بۆ كو بكاره ئه‌جێندایێن ده‌وله‌تا ئیرانێ و میحوه‌رێ مقاوه‌مێ ل وێ ناڤچه‌یێ جیبجی بكه.
