رێڤەبەریا دەریێ سینۆری یێ پێشخابوورێ ل سەر گرتنا دەروازەیێ راگھاند: “ئێدی دەرفەت ژ بۆ خوەڤەشارتنا ژ راستیان بۆ پەیەدێ و ئیدارەیا وێ تونە، کو ھەر دەم کار ل سەر خولقاندنا قەیرانان دکە و ب بەردەوامی ژی گەلێ مەیێ ل کوردستانا سووریێ باجا وێ ددە.”
د داخویانیەکێ دە رێڤەبەریا دەریێ سینۆرییێ پێشخابوورێ راگھاند: “دەریێ سینۆرییێ پێشخابوور سێمالکا ب فەرمانا سەرۆک مەسعوود بارزانی ژ بۆ ئالیکاریا گەلێ کوردستانێ یێ ل سووریێ ھاتیە ڤەکرن و ھەرێما کوردستانێ چەندین جار تەکەزی ل سەر گرینگیا وێ یەکێ کریە کو دەری ڤەکری بمینە ژ بۆ خزمەتگوزاریێن مرۆڤی.”
ھات ئەشکەرەکرن: “ھەتا نھا سێ رێکەفتن ب سەرپەرشتیا سەرۆک بارزانی ژ بۆ ڤی دەریێ سینۆری ھاتنە کرن و برگەیەکە تایبەت ژ بۆ ئیدارەکرنا دەریێ سینۆری ب ھەڤبەشی ھەیە، لێ بەلێ پەیەدێ ھەر دەم رێکەفتن بنپێ کرنە و د سیاسەتا سەرکوتکاریێ دە بەردەوام بوویە.”
رێڤەبەریا دەریێ سینۆرییێ پێشخابوورێ دا زانین: “کارێ ل دەری، بۆ وارێن دن ژی ھاتیە بەرفرەھکرن کو بێیی ڤێ دەری، ب ھەزاران کۆچبەر و برایێن مەیێن کورد و عەرەبێن سووری یێن ل ھەرێمێ و دەرڤەیی وێ نشتەجھ بوونە، نکارن بچن سەردانا مالباتێن خوە ل کوردستانا سووریێ بکن. لێ پارتیا یەکیتیا دەمۆکراتیک ھەر تم پرسگرێک و ئاستەنگی ل پێشیا کارێ دەربازبوونێ دەردخە.”
د داخویانیێ دە ھاتیە دەستنیشانکرن: “پەیەدە دزانە کو خوەستیە ب رێیا ڤێ دەروازەیێ و سینۆران ڤە، چەک و تەقەمەنی ڤەگوھەزینە ناڤ ھەرێما کوردستانێ، دا کو رەوشا ئەولەھیێ خەرا بکە، دەربارێ ڤێ مژارێ دە زانیاریێن ھەڤپەیمانێن مەیێن د ھێزێن ھەڤپەیمانیا ناڤدەولەتی دە ژی ھەنە.”
دەستنیشان کر ژی، “نێزیکی سالەکێیە پەیەدێ رێ نادە کادرۆ، سەرکردە و کەسێن نێزیکی ئەنجوومەنا نشتمانییا کوردی و ئەنیا ئاشتی و ئازادیێ دەرباسی کوردستانێ ببن و حەپسا مالێ ل سەر وان فەرز کرنە و رێ نادە کو ئەو ب رێیا دەری دەرکەڤن، د دەمەکێ کو ئەو رێ ددە ھەموو کەسێن خەریب ب ئازادی دەرباس ببن. بەرووڤاژی ڤێ یەکێ ژی، پەیەدێ ب ڤان کریاران، دژبەریا ھەموو پارتیان دکە، ئەڤ تەڤگەر ژی د دیرۆکا سووریێ بێمیناکن کو تەڤاھیا گەل د بن حەپسا مالێ دە بژین. ھەر وھا سیاسەتێن دکتاتۆری یێن پەیەدێ ژ رەڤاندن، کوشتن، زیندانکرن و ئیشکەنجەکرنا چالاکڤانێن کورد و ھەر کەسێ خوەدی نێرینەکە سیاسییا جودایە، د بیرا ھەر کەسی دەیە.”
ھەروھا ھاتیە دیارکرن: “خوەراگرتنا مە ل ھەمبەر پەیەدێ، ھەتا نھا ژ بۆ گەلێ کوردستانێ یێ ل سووریێ بوو، لێ بەلێ داویا داوی ئەڤ وسا ل مە دکە کو ئەم پێوەندیان د بەر چاڤان رە دەرباس بکن، مافێ گەل ژی ھەیە کو ڤێ یەکێ قەبوول نەکە، دڤێت پەیەدە دەست ژ درووشمێن خوەیێن سەختە بەردە، چمکی ئێدی کەس ب وان باوەر ناکە.”
رێڤەبەریا دەریێ سینۆرییێ پێشخابوورێ دبێژە: “ژ بەر ڤێ یەکێ، ئەم لێبۆرینا خوە ژ گەلێ خوە دخوازن، کو ئەم نکارن ببن تەماشەڤانێ زلم، دیکتاتۆری و تەڤگەرێن پەیەدێ یێن نەکوردانە و نەمرۆڤانە و ئەم د ڤێ یەکێ دە ژی نابن شریکێ وان. دڤێت ئەڤ دەری د خزمەتا ھەموویان دە بە، نە تەنێ یا پارتیەکێ و دڤێ دووری دەستێوەردانا سیاسی بە، ب ئاوایەکی پراکتیکی و رەئالیست، نە تەنێ ب سلۆگانان.”
