پشتی جڤینا ھەدەپێ، یەپەسێ، دەبەپێ، ھەدەکە و دەتەکێ د داخویانیەکێ دە ھات دیارکرن: “ئەم قەبوول دکن کو د ھلبژارتنێ دە ئەم نەگھیشتن ئارمانجێن خوە و ل گۆر ڤان ئارمانجان ئەم ب سەر نەکەتن.”
ھەڤسەرۆکێن گشتی و ھەڤبەردەڤکێن گشتی یێن کۆنگرەیا جڤاکا دەمۆکراتیک (کەجەدێ)، کۆنگرەیا دەمۆکراتیکا گەلان (ھەدەکێ) پارتیا دەمۆکراتیکا گەلان (ھەدەپێ)، پارتیا چەپێن کەسک (یەسەپێ)، پارتیا ھەرێمێن دەمۆکراتیک (دەبەپێ) ھاتن جەم ھەڤ و ئەنجامێن ھلبژارتنێ و خەباتێن دەما پێشیێ، نرخاندن و پشتی جڤینێ داخویانیەکە نڤیسکی بەلاڤ کرن.
د داخویانیێ دە وھا ھات گۆتن:
– ل گەل کۆنسەپتا تێکبرن و تاسفیەکرنێ کو د سالێن داوی دە ل ھەمبەری تەڤگەرا کوردیا سیاسی تێ مەشاندن مە ب ھەڤ رە تێکۆشین و بەرخوەدانەکە ئەساسی مەشاند و ئەم دمەشینن. ل گەل داربەیا بێناڤبەر کو ل ھەمبەری ئسرارا ئازادیا گەلێ کورد تێ مەشاندن، گەلێ مە ل کوردستانێ بەرسڤا ھەری گرینگ و ئەشکەرە د ھلبژارتنێن 14 و 28 گولانێ دە دا. ئەم ڤێ ھەلوەستا گەلێ کورد کو ل ھەمبەری بێستاتوبوونێ و ئنکارا پەرگالێ، ب داخواز و تێکۆشینا خوەیا ئازادیێ ئسرار دکە، ل ھەمبەری زولمێ تو تاویز نادە ب رێزداری سلاڤ دکن و بەژنا خوە ل بەر ڤێ ھەلوەستێ دتەوینن. ئەم سۆز ددن کو ئەمێ ڤێ ھەلوەستا گەلێ خوە د خەباتێن خوەیێن پێشیا مە دە ژی ئەساس بگرن و ب ئاوایەکی ب باندۆر د سیاسەتا خوە دە پێک بینن.
– ھەر وھا ئەم ھەلوەست و سەکنا گەلێن ترکیەیێ سلاڤ دکن کو ل ھەمبەری دەستھلاتا فاشیستا کو ھەموو دەرفەتێن دەولەتێ ب کار ئانی، ھەموو کۆمپلۆ، دەفک، دەرەو و سەختەکاری وەکی رێبازەکە سیاسی پێک ئانی. د ڤێ ھلبژارتنێ دە ژ 2 کەسان کەسەک ل ھەمبەری پەرگالا قەسرێ دەرکەت؛ ئەڤ یەک ژ بۆ مە سەدەما مەزنکرنا تێکۆشینا جڤاکییا شۆرەشگەر و دەمۆکراتیکە.
– ئەم قەبوول دکن کو د ھلبژارتنێ دە ئەم نەگھیشتن ئارمانجێن خوە و ل گۆر ڤان ئارمانجان ئەم ب سەر نەکەتن. لێ بەلێ ئەم بانگ ل وان کەسان دکن کو ل سەر ئەنجامێن ساندۆقان باندۆر و دیارکاریا تێکۆشینا ئازادی و دەمۆکراسیا گەلێ کورد و گەلێ ترکیەیێ دنرخینن؛ ئەم ھەر تم ب ئاوایەکی سیاسی پێش کەتن و بوونە ھێڤیا بندەستان. د دەما نوو دە ژی باندۆرا مەیا دیارکرنێ دێ د وارێ رێخستنی، پۆلیتیک و جڤاکی دە بدۆمە. ڤێ رۆلا مە ژی ھەری زێدە دەردۆرێن کو دبێژن “ب ئاقلێ دەولەتێ تەڤگەریانە” باش دزانن. ئەمێ ب عیناد و ئسرار رۆلا خوەیا تێکۆشینا دەمۆکراسیێ ھین زێدەتر مەزن بکن و ھین بھێزتر ببن پێشەنگێ دۆزا ئازادیێ.
– ئەم سۆزا خوەیا سەرکەفتنا دۆزا دەمۆکراسی و ئازادیێ ژ نرخێن خوە رە، ژ ھەڤال و ھۆگرێن خوە رە ددن کو ل زیندانان، ل سرگونێ و ل ھەر قادا تێکۆشینێ بەردێل و کەد ددن.
– ئەم رێ نادن چ بێمۆرالیێ، بێتاقەتیێ، قەلسیێ، دەستوور نادن چ ئۆپەراسیۆنێ و ھەر وھا ب باوەریەکا مەزن ئەمێ د رۆژێن پێش دە ب پێکھاتە و سازیێن خوە رە ب گەلێن خوە رە ب ئاوایەکی بەرفرەھ ئەنجامێن کو دەرکەتنە ھۆلێ بنرخینن. ئەمێ ژ ڤان ئەنجامان پارا خوە دەرخن و ل گەل ڤێ پەرگالا نەیارێ کەد، ئازادی، ئاشتی، خوەزا، ژن و جوانان بەرخوەدانا خوە مەزن بکن و ب پێش بخن.
