دوھ ژی ل سلێمانیێ کەسەک د ئەنجاما ئێرشەکە چەکداری دە بریندار بوو. ھات راگھاندن کەسێ کو د ئێریشا کو سەرێ سبێ دەردۆرا دەمژمێر 10:30 پێک ھاتی دە بریندار بوویی کەسەک ب ناڤێ حوسەیین ئاراسانە. ئاراسان ئیرۆ سەرێ سبێ ژیانا خوە ژ دەست دا.
نووچەیا کو حوسەیین ئاراسان د ئێریشا چەکداری دە بریندار بوویە ژ چاڤکانیێن پەکەکێ ھات دایین. ھەروھا مەدیایا پەکەکێ راگھاند کو ئاراسان د سالا 1978 دە ل باژارێ ئیزمیرێ یێ ترکییێ ژ دایک بوویە و ب ئەسلێ خوە ژی خەلکێ مێردینێیە و ژ بەر سەدەمێن سیاسی ل سلێمانیێ دژی. ل گۆر مەدیایا پەکەکێ ئاراسان وەلاتپارێزەکی سڤیل بوو.
ئاگاھیەکە دن یا بالکێش د نووچەیا مەدیایا پەکەکێ دە ئەوە کو چەند دەمژمێران پشتی بوویەرێ و بەری ئەشکەرەکرنا ناسنامەیا کەسێ بریندار حوسەیین ئاراسان، مەدیایا پەکەکێ راگھاند کو حوسەیین ئاراسان ژ ئالیێ میتێ و پەدەکێ ڤە ھاتیە گولەبارانکرن. لێ مەدیایا پەکەکێ ئەشکەرە نەکر کو چاوا گھشتیە ڤێ ئەنجامێ و ئەڤ ئاگاھی ژ کێ گرتییە. لێ ئەگەر وەلاتپارێزەکی سڤیل بە، دبە کو بووبیتە قوربانا کێشەیێن جڤاکی، ئابۆری و ھتد.
لێ گۆرەیی پێزانینێ مە حوسەیین ئاراسان نە کەسەکی نۆرمال بوو. کادرۆیەکی پەکەکێ بوو، ژ بلی ڤێ، نە کادرۆیەکی ئاسایی ژی بوو، د یەکینەیەکا ئیستیخباراتێ یا گرێدایی کەجەکێ دە کار دکر.
دیسا ل گۆری ئاگاھیێن چاڤکانیێن ھەرێمی حوسەیین ئاراسان کەسەکە کو د سالێن 2000 و ڤر ڤە ل باکورێ کوردستانێ ل سەر ناڤێ پەکەکێ خەباتان دمەشینە. ل گۆری ئاگاھیێن کو دارکا مازی ژ دو چاڤکانیێن جودا ب دەست خستی، حوسەیین ئاراسان کادرۆیەکی پەکەکێ یە و د خەباتێن ئیستیخباراتا پەکەکێ دە جھ دگرە.
حوسەیین ئاراسان د دەستپێکا سالێن 2000 دە تەڤلی پەکەکێ بوویە. ل قەندیل و دەڤەرا کەلارەشێ (رۆژھلات) پەروەردەیا ئیدەۆلۆژیک و سیاسی دیتییە. پشت رە د ناڤ رێخستنا پەکەکێ یا ب ناڤێ «یەرەکێ» دە جھ گرت و د رێڤەبەریا سازیێن پەکەکێ یێن ل باکورێ کوردستانێ و ترکیەیێ خەبتییە. د کۆمیتەیێن تەڤگەرا ھەموەلاتیێن ئازاد، کۆمیتەیا پاراستنا سڤیل، کۆمیتەیا دارایی و باجێ دە ئەرکدار بوویە. ژ بەر دۆزێن کو دەر بارێ وی دە ھاتنە ڤەکرن، دەمەکێ ھاتیە بنچاڤکرن و گرتن. پاشێ ئەو دەربازی وەلاتێ یەونانیستانێ دبە.
ئاراسان ل یەونانیستانێ د سەرکردایەتیا پەکەکێ دە جھ دگرە و ل کامپا «لاڤریۆنێ» ژی نوونەرێ سیاسییێ پەکەکێ بوویە. پشترە حوسەیین ئاراسان ژ بۆ پەروەردەیێ دکێشن قەندیلێ.
دووڤ رە پەکەکە وی د ناڤ یەکینەیا ئیستیخباراتێ یا ب ناڤێ NLP (ناڤەناد لەکۆلینێن پۆلتیک) دە ب جھ دکە. NLP رێخستنا ئیستخباراتا پەکەکێیە و جەمیل بایک ب خوە سەرپەرشتییا وێ دکە. حوسەیین ژی ل ور تێ ئەرکدارکرن کو لگەل کارکەرێن باکور پەیوەندیان چێبکە، باجێ بستینە و ئیستیخباراتێ کۆم بکە… لێ گەلۆ ئاراسان ژ بەر کو کەسەکی ب راستی گرینگ بوو ھات ئارمانج کرن، یان ژ بەر کو ئارمانجەک ھێسان بوو ھات لێخستن، یان ژی پرسگرێکەک دن ھەبوو؟ ئەڤ پرسە ھەموو ژی جھێ گومانێ نە. لێ تێ زانین ئاراسان د ئیستیخباراتا پەکەکێ دە کار دکر. حوسەیین ئاراسان د ھەمان دەمێ دە بەرپرسێ سازیا ب ناڤێ کۆمەلەیا کارکەرێن مەزۆپۆتامیایێ ژی بوو. ژخوە حوسەیین ئاراسان ل بەر دەرییێ ڤێ سازیێ دهێت کوشتن. ھێژایی گۆتنێیە کو ئەڤ کۆمەلە بوویە ناڤنیشانا کەسێن باکووری یێن کو ل سلێمانییێ تێنە کوشتن.
پەکەکێ ھەتا نھا ژی د دەربارێ پێوەندییێن خوە یێن لگەل حوسەیین ئاراسان چ داخویانی نەدایە. پەکەکە ھەولددە کو حوسەیین ئاراسان وەکە کەسەکی سڤیل نیشان بدە. چاپەمەنیا پەکەکێ ھێژ دەربارێ کەسێ ھاتی کوشتن و ناسنامەیا وی دە چ ئاگاھی نەدایی، یەکسەر پەدەکێ وەکە بەرپرسێ ڤێ جینایەتێ دەستنیشان دکە. لێ د ڤان چەند سالێن داوی دە ھەموو کادرۆ و سەرکردەیێن پەکەکێ ل سلێمانیێ ھاتنە لێخستن و ھەموو ئێریشێن ھەوایی ژی ل گوندەوارێن سلێمانیێ روو ددن، گەلۆ چما پەکەکە ڤێ پرسێ ژ خوە ناکە؟
