ل عەفرینا رۆژئاڤایێ کوردستانێ ژنەکە کورد ژ 5 مەھان ڤە ژ ئالیێ گروپێن چەکدار ڤە ھاتیە رەڤاندن و مالباتا وێ بانگ ل رێخستنێن یاسایی و مافێن مرۆڤان دکە دەستێوەردانێ بکن و وێ ئازاد بکن.
رێخستنا مافێن مرۆڤان ل عەفرینێ بەلاڤ کر، ژنا ب ناڤێ ھێلان ئەحمەد محەمەد ژ بەری 5 مەھان ڤە ژ باژارێ حەلەبێ ڤەگەریا عەفرینێ و ژ دەما ڤەگەرێ ڤە، ژ ئالیێ گروپا پۆلیسێن لەشکەری ڤە ھاتیە رەڤاندن.
ل گۆری زانیاریێن رێخستنا مافێن مرۆڤان، ھێلان ب تۆمەتا کو مێرێ وێ پێشتر د ناڤا ھێزێن سەر ب رێڤەبەریا خوەسەر دە بوو و د دەما ئێریشا ئارتێشا ترکیێ و گروپێن چەکدار ل سەر عەفرینێ (2018) دە جانێ خوە ژدەست دایە، ھاتیە رەڤاندن.
ھەرواھا راگەھاند، ھێلان ئەحمەد محەمەد ژ گوندێ مەیدان ئەکبەسێ یێ سەر ب ناڤچەیا راجۆ ڤە، دایکا 2 کەچکێن (5 و 8 سالی) یە و و د زیندانا ماراتێ دە گرتی یە.
مالباتا ھێلانێ ب ریا رێخستنا مافێن مرۆڤان بانگ ل رێخستنێن یاسایی، مافێن مرۆڤان و ناڤدەولەتی دکە کو فشارێ ل حکوومەتا ترکیێ بکن، تا کو وێ ئازاد بکن و ڤەگەرە جەم کەچێن خوە.
ژ دەما داگیرکرنا عەفرینێ ژ ئالیێ ئارتێشا ترکیێ و گروبێن چەکدار ئێن سەر ب وێ ڤە د ئادارا 2018 دە، زێدەتر ژ 8 ھەزار کوردێن عەفرینێ ھاتنە رەڤاندن و ھەتا نھا ھەژمارەک ژ وان ھینا رەڤاندی نە.
