درۆنەکا ترکیێ ئۆتۆمۆبیلەکا پەکەکێ ل پارێزگەھا ھەولێرێ بۆمبەباران کر

 درۆنەکا ئارتێشا ترکیێ ئۆتۆمۆبیلەکا پەکەکێ ل دەڤەرا سیدەکانێ یا سەر ب ھەولێرێ ڤە بۆمبەباران کر و د ئەنجامێ دە بەرپرسەک و 2 چەکدارێن پەکەکێ ھاتن کوشتن.

دژەتەرۆرا ھەرێما کوردستانێ دا زانین، درۆنەکا ئارتێشا ترکیێ ئیرۆ 24ێ تیرمەھا 2023، ئۆتۆمۆبیلەکا پەکەکێ ل سەر رێیا گوندێ سنینێ یێ سەر ب ناڤچەیا سیدکانێ ڤە کرە ئارمانج.

ل گۆر زانیاریێن دژەتەرۆرا ھەرێما کوردستانێ، د ئەنجاما ئێریشێ دە بەرپرسەکی بلند و 2 چەکدارێن پەکەکێ ھاتن کوشتن.

ئەڤ ئێریش د دەمەکێ دە یە، ئارتێشا ترکیێ ڤێ داویێ ھەژمارەک بەرپرسێن دن یێن پەکەکێ ل ھەرێما کوردستانێ کرنە ئارمانج.

ئاژانسا “ئانادۆلو” دوھی ژ سەر زارێ ژێدەرێن ئەولەھیێ راگھاندبوو، ئەندامێ پەکەکێ بەکر کینا یێ کو ژ بۆ کوشتنا ئەندامێن ئارتێشا ترکیێ، ھێزێن ئەولەھیێ و میتێ دھات پەروەردەکرن، ل سلێمانیێ ھات کوشتن.

شەر و پەڤچوونێن د ناڤبەرا پەکەکێ و ترکیێ دە ل ناڤچەیێن سینۆری یێن ھەرێما کوردستانێ، باندۆرەکا مەزن ل سەر ژیانا خەلکێ کریە و نێزیکی 800 گوند و چەند دەڤەرێن گەشتیاریێ وێران و ڤالا بوونە.