فاشیزما کو ژ ئالیێ پەکەکێ ڤە ژ بۆ شکاندنا ئیرادەیا گەلێ رۆژئاڤا تێ مەشاندن ب قاسی یا داگیرکەرێن کوردستانێ یە. جوانێن شۆرەشگەر، تەڤگەرا پەکەکێ یا ل رۆژئاڤا، ژ بۆ کو گەلێ کورد ب توندی بترسینە، وەکە کوژەر تێ بکارئانین. ھەری داوی ژی جوانێ کو رێڤەبەرێ پەکەکێ موراد قارایلان رەخنە دکر، ھاتە رەڤاندن، ئیشکەنجە لێ ھاتە کرن و ئەو نەچار کر کو لێبۆرینێ بخوازە.
جوانێ ب ناڤێ مەندی مەحموودێ ل باژارێ کۆبانێ یێ رۆژئاڤا رەخنەیێن خوە ل سەر مەدیایا جڤاکی د بن نووچەیا موراد قارایلان دە کر. مەندی مەحموود د شیرۆڤەیێ دە دبێژە، “کوردستان نە ملکێ وەیە.” پشترە ژ ئالیێ کۆما جوانێن شۆرەشگەر یا پەکەکێ ڤە تێ رەڤاندن و تێ ئیشکەنجەکرن. پشترە نەچار دمینە کو لێبۆرینێ بخوازە. ھندەک ژ خزمێن مەندی مەحموود دیار دکن کو مەحموود ب دەستدرێژییا سەکسی ژی ھاتیە تەھدیدکرن و ژ بەر ڤێ سەدەمێ ژی مەحموود نەچار بوویە کو لێبۆرینێ بخوازە.
چاڤکانیێن مەدیایی یێن نێزیکی پەکەکێ ب بەرفرەھی ڤیدیۆیا مەندی مەحموود کو لێبۆرینا خوە خواستیە و دبێژە وی خەلەتی کریە، پارڤە دکن. مەندی مەحموود د ڤیدەئۆیێ دە لێبۆرینا خوە ژ موراد قارایلان دخوازە و دبێژە، “ئەز بێ نامووسم، گەریلا ژ بۆ مە شەر دکە، من ل ھەمبەر گەریلا خەلەتی کر.”
نە جوانێن شۆرەشگەرن بەلکو پەکەکەیی نە
رۆژەک بەریا ڤێ بوویەرێ، جوانێ ب ناڤێ رێبەر حوسەیین ل کۆبانی ژ بەر زێدەبوونا نرخێ سۆتەمەنیێ خوەپێشاندان کربوو و ژ ئالیێ رێڤەبەریا رۆژئاڤا ڤە هات رەڤاندن، ئیشکەنجە لێ کر و نەچار کر کو لێبۆرینێ بخوازە و ڤیدیۆیا خوە ژی بەلاڤ کر. ئەڤ پێکانین ب گشتی ل سەر ناڤێ جوانێن شۆرەشگەر تێن بەلاڤکرن. لێ جوانێن شۆرەشگەر رێخستنەکا سێبەرە و وەک کوژەر تێ بکارئانین. د جەوھەرێ خوە دە ستراتەژی و پراکتیکا وێ یا پەکەکێ یە. لۆما ژی راستترە کو مرۆڤ ناڤێ پەکەکێ ل بوویەرێن وھا بکە. د راستیێ دە چاڤکانیێن ھەرێمی دیار دکن کو رێخستنا ب ناڤێ جوانێن شۆرەشگەر ل رۆژئاڤا گەلەکی نێزی مەزلووم عەبدی یە. ب تایبەتی رێخستنا جوانێن شۆرەشگەر یا ل کۆبانێ ژ جوانێن کۆبانێ یێن راستەراست ژ ئالیێ مەزلووم عەبدی ڤە ھاتنە ئەرکدار کرن.
سەپاندنێن ب شێوازا ترکان یا پەکەکێ: یاسایا پۆشمانیێ
ئەڤ پێکانینێن پەکەکێ یاسایا دانپیدانێ یا دەولەتا ترک تینە بیرا مرۆڤان. ترکان د بن ئیشکەنجەیێ دە دەست ب دانپیدان کرن و یاسایا پۆشمانییێ ل سەر کوردان فەرز دکر. ئەڤ پێکانین د سالێن 1990 دە ب شێوەیێن جودا بەردەوام بوون. پەکەکە نھا ھەموو پێکانینێن کو ترکیەیێ د سالێن 1990 دە ل دژی کوردان ئەنجامدای، پەکەکە ژی ل رۆژئاڤا ل دژی ئۆپۆزسیۆنێ دوبارە دکە.
چاوا کو د سالێن 1990 دە دەولەتا ترک مرۆڤێن کو دکاریبوون جڤاکێ ب رێ ڤە ببن، وەکە وەدات ئایدن، ب کوژەرێن نە دییار کوشتن. جەنازەیێن وان د ئاڤێتن کێلەکا رێیێن سەرەکی. ب دەھان کەس ھاتن کوشتن، پێشەنگێن راست ھاتن کوشتن و ل شوونا وان کەسێن دن ھاتن بجھکرن. گەل نەچار ما کو بێدەنگ بمینە یان ژی ژ وارێ خوە کۆچ بکە. پەکەکە ژی ھەمان شێوازی ل سەر رۆژئاڤا پێکتینە.
ب پێڤاژۆیا کو د سالا 2012 دە ل سووریێ و رۆژئاڤا دەست پێ کری دە، شەخسییەتێن ناڤدارێن رۆژئاڤا وەکە مەشعەل تەمۆ و بەھزاد تورسوون ھاتن رەڤاندن. ھاتنە کوشتن و تەرمێن وان ئاڤێتن کێلەکا رێیێن ھاتن و چوونێ. ب سەدان ھەزار دژبەرێن پەیەدێ نەچار مان ژ رۆژئاڤا دەرکەڤن.
دەولەتا ترک پشتی کوشتنا کەسێن کو دکارن پێشەنگیا گەل بکن، سیخورتی، دانپێدان و یاسایا تۆبەکرنێ ل سەر جڤاکی فەرز کر. خەلکێ وەلاتپارێز ب رویساتی ل نیڤەکا گوندی گەراندن. دخوەست جڤاکی بترسینە و تەسلیم بگرە.
نھا ل رۆژئاڤا ژی ھەمان تشت تێ کرن. کەسێن کو نەچن خوەپێشاندانێن کو ژ ئالیێ پەیەدێ ڤە تێن رێکخستن ئەرزاق ب وان نایێ دایین. بازرگانی بۆ وان دوکاندارێن کو وان رەخنە دکن تێ ئاستەنگکرن. خودان کارگەھ و جھێن مخالفێن پەیەدێ ڤەکری تێن تەھدیدکرن. یێن رەخنە دکن راستی دژواریێ تێن.
کریارێن پەکەکێ نە میناکێن دەمۆکراسیێ نە، میناکا چاندا توندیێ یا رۆژھلاتا ناڤینە
پەکەکێ بەریا سالێن 2000 د دەستپێکا ھەر ھەڤۆکێ دە پەیڤا کوردستان بکار دئانی و ھەموو سازیێن خوە ژی ب پەیڤێن رزگار و کوردستان، نەتەو ب ناڤ دکرن. پشتی سالا 2000 د دەستپێکا ھەر ھەڤۆکێ دە پەیڤاە دەمۆکراسیێ پێڤەکر. نەتەوەیا دەمۆکراتیک، پارادیگمایا دەمۆکراتیک، رێخستنا دەمۆکراتیک، جڤاکا دەمۆکراتیک… لێ پشتی سالا 2000 ھەری زێدە دەمۆکراسی ھاتە ژناڤ برن.
قادا پێکانینا سیستەما پەکەکێ کو دبێژە ل شوونا مۆدەرنیتەیا کاپیتالیست شارستانیا دەمۆکراتیک پێش دخە وارگەھا مەخموورێ و رۆژئاڤایە. پەکەکێ ھەموو موخالەفەتا ل رۆژئاڤا تونە کر. کەسێن کو رەخنەیەکا ھەری بچووک ژی کرن، مافێ ژیانا ل رۆژئاڤا ژ بۆ وان نەھات دایین. ل ھەر دەرێ کادرۆیێن خوەیێن رۆژئاڤا وەکە قەیووم تەعیین کرن. لێ بەلێ باوەری ب وان ژی نەھات و ل کێلەکا ھەر ئەرکدارەکێ ژ رۆژئاڤا یەکی ژ باکورێ کوردستانێ ھات بجھکرن.
ژ بۆ کۆنترۆلکرنا گەل ل ھەر تاخەکێ کارمەندەک باکووری ھات پەیوردار کرن. پراکتیکا پەکەکێ یا دەمۆکراسییێ ل رۆژئاڤا جوورەکی فاشیزمێ یە. ئەنجامدانا پراکتیکا ھەزاران سالا یا سەردەستێن رۆژھلاتا ناڤینە. پەکەکە ب چەند وێنەیێن ژنێن چەکدار، ب چەند ستران و ئاوازان نکارە فاشیزما خوە یا رۆژئاڤا بڤەشێرە. پەکەکە ژی ل سەر شۆپا سیستەمین زۆردارێن رۆژھلاتا ناڤین دمەشە.
رۆژئاڤا بوویە جھێ پێکانینا فاشیزما پارتییا پەکەکێ نە جھێ شییانا ئازاد و دەمۆکراتیک.
بوویەرێن داوی نیشان ددن کو ئەڤ پێکانینێن فاشیست نە تەنێ ل قادا سیاسەتا ژۆرین، ل ناڤا تاخان و ژیانا نشتەجیێن سڤیل دە ژی بەلاڤ بوویە.
