رۆژھلاتا ناڤین د قۆناغەکا پەڤچوونێن مەزن را دەرباس دبە. کورد د ناڤەندا ڤێ پەڤچوونێ دە نە. تشتا کو ل باکورێ کوردستانێ قەومی، د دەمەکێ وھا ھەستیار دە ژ بۆ کوردان تراژەدیە. د ڤێ دەمێ دە دڤێت کورد ببن یەک و پشتگرییا ھەڤ بکن.
ل باکورێ کوردستانێ جەماوەرەکێ برێخستنکری ھەیە، لێ مخابن ئارمانجا وێ ھێزا کو ئەڤ جەماوەرێ رێخستنکری ل پەی دمەشە نە کوردستانی یە. ئەڤ ھێزا سیاسی یا سەرەکی ب ئارمانج و داخوازیێن خوە نە کورد و کوردستانی نە.
گەر ئەم ل سەدەمێن جەماوەرێ پەکەکێ یا داکەتنا قادان و کۆلانان بنێرن ئەم دێ ڤێ رەوشێ ھێژ زەلالتر ببینن.
پەکەکێ د تەڤاھیا مەھا ئیلۆنێ دە ژ بۆ کو پرۆتەستۆیێن ل دژی پەدەکێ ل داربخە گرسەیا “جەماوەرێ” خوە داخست کۆلانان. ژ بۆ ڤێ پلانێ ژی یەپەسە و ھەدەپە ھاتن ئەرکدار کرن.
د 16 ئیلۆنێ دە پارلەمەنتەرێن یەسەپێ-ھەدەپێ ل سلۆپیا مەشیان. پارلامەنتەرێن یەسەپێ و ھەدەپێ بەردان ئۆزتورک، سالیحا ئایدەنیز، کەسکین بایندر، سەباحەت ئەردۆگان ساریتاش و نەورۆز ئویسال سەرکێشییا ڤێ چالاکیێ کرن.
د 17 ئیلۆنێ دە 6 جوانێن یەسەپەیی ل ستەنبۆلێ ل کۆلانا ئیستیقلالێ مەشیان و درووشمێن “دژی پەدەکێ” قیریان.
د 18 ئیلۆنێ دە ل ئیزمیرێ پارلەمەنتەرا یەسەپێ گولیستان کلچ کۆچییگیت ل دژی پەدەکێ ھەیا کو قرکا خوە دراندی درووشم قیراندن. ل کێلەکا وێ بێ بوهایێ پارلەمەنتارا ئامەدێ جەیلان ئاکچا جوپۆلۆ و پارلامەنتەرا ترک یا یەسەپێ بورجوگول چوبوک ژی ھەبوون.
پشترە ژی کۆمێن پچووک یێن یەسەپێ ل ئەدەنەیێ و ھتد ل دژی پەدەکێ داکەتن قادان. ئەڤ کۆمێن کو ژ 10-15 کەسان پێک دهاتن ل ھەر دەرێ داکەتن قادان و درووشمێن “ئەم دێ حەسابێ ژ خایینا بپرسن” قیراندن.
دەولەتێ موداخەلەیی ڤان نەکر. ئەڤ ھەولێن یەسەپێ-ھەدەپێ نە تەنێ بێواتە بوون د ھەمان دەم دە خایینتی، حیلە و بێبەختی لێ دفری.
پەکەکێ د 1 ئۆکتۆبەرێ دە ل ئەنقەرەیێ چالاکیەکا ب گومان ئەنجام دا. پشتی چالاکیێ ب دەھان ئەندامێن ھەدەپێ یێن ل ترکیەیێ ھاتن گرتن. گەلەک ژ وان ھێژ ژی د بن چاڤان دە نە. ھەدەپێ و یەسەپێ دەنگێ خوە دەرنەخست. پارلامەنتەرێن کو دژی پەدەکێ داکەتین قادان، دووڤێن خوە خستن ناڤا لنگێن خوە و خوە کەڕ کرن.
پشتی ئێریشا ئەنقەرەیێ دەولەتا ترک ب ئێریشێن ھەوایی ل 150 بنکەیێن گرینگێن وەکە بەنداڤ، سەنترالێن ئەلەکتریکێ و بیرێن نەفتێ خست. نھا ل رۆژئاڤا پارێزگەھا جزیرێ ئاڤ و کارەب ھاتییە قوودکرن. گەل د رەوشەکا پڕ بێسەرووبەر دەیە.
لێ ئەو پارلەمەنتەرێن یەسەپێ و ھەدەپێ یێن کو قرکا خوە دراند و درووشمێن “دژی پەدەکێ” قیراندین، نە ژ بۆ چالاکییا ئەنقەرێ و نە ژی ژ بۆ ئێرشێن ل سەر رۆژئاڤا دەنگ دەرنەخستن. نە پەکەکێ رەخنە دکن کو رۆژئاڤا دکە ئارمانج و نە ژی دژی دەولەتا ترک یەک درووشم دقێرن.
میناک بەردان ئۆزتورک چاوا کو بەر ب سلۆپیایێ ڤە دمەشە، دکارە بچە نسێبینێ ل ھەمبەر قامشلۆیێ و بێژە، ئەم ئێریشا ل سەر رۆژئاڤا شەرمەزار دکن. لێ رێکا ڤان کرێگرتییان نە ئەوە.
گولستان خانم ئەوقاس ل دژی پەدەکێ دقیریا کو خوە دراند. دێ فەرمۆ ژ بۆ رۆژئاڤا بقیرن.
لێ نەکرن و ناکن. ژ بەر کو یێن خەتا پەکەکێ دشۆپینن نکارن ژ بۆ پاراستنا کوردستانێ بمەشن. لێ تەنێ ب فەرمانێن جھێن تاری ئەو دکارن داکەڤن کۆلانا.
پەکەکێ ژ سالا 2000 و ڤر ڤە ھێزا گرسەیی یا گەلێ باکورێ کوردستانێ حەلاند. خوەپێشاندانێن کو چەند کەس تێن جەم ھەڤ نە ژ بۆ مافێن کورد و کوردستانێ نە. تەنێ ژ بۆ دژاتیا پەدەکێ ئەڤ گرووپ خوەپێشاندانا دکە. ژ بۆ مافێ زمانێ کوردی ژی بۆ مافێ خوەیێ ناسنامەیا کوردی خوەپێشاندان ناکن، لێ دەما گۆت وەرن ئەم دێ دژی پەدەکێ بمەشن وەکە گایێ مێشکی بوویی دادکەڤن کۆلانا. دێ فەرمۆ رۆژئاڤا ل بەر چاڤێن وە تێ شەوتاندن یەک چالاکی دژی ترکان ئەنجام بدن.
ل باکورێ کوردستانێ ھێزەکا دن ژی ھەیە کو ژ بۆ فلستینێ مەشان لداردخە، گرسەیێ کۆمدکە، ئەو ژی ھوودا-پارە. لێ ژ بۆ تەرۆرا دەولەتێ یا ل سەر کوردان یەک گۆتن ژی ناکە.
ھودا پار د دەربارێ کوردستانێ دە کەر و لالە. لێ دکارە ژ بۆ فالەستینێ ل ئامەدێ و باتمانێ ب ھەزاران جەماوەری بینە کۆلانێ.
ل وانێ ژی ب وەساییتان خوەپێشاندان کرن.
لێ دەما کورد دمرن و کوردستان کاڤل دبە ھوودا پار ناھێلە یەک کەس ژی دەرکەڤە کۆلانان.
ئەڤ ژی تراژەدیا کوردێن باکورە. گەلێ باکورێ کوردستانێ ژ بۆ ھەر کەسی تێ بکارئانین، لێ ژ بۆ نرخ و پێشەرۆژا خوە تشتەکی ناکن.
