فەرماندارێ بریارگەھا ناڤەندی یا ھەپەگێ موراد قارایلان ل سەر رەوشا داوی یا شەری داخویانی دا. ل گۆری داخویانیێن قارایلان، “پەکەکێ ئارتێشا ترک گەلەک تێکبرییە. ئارتێشا ترکیێ ل دژی پەکەکێ نکارە گاڤەکی باڤێژە. ب راستی ژی ئارتێشا ترک ئەو قاس ئاسێ مابوو کو مەجموور بوو ژ پەدەکێ ئالیکاریێ بخوازە. پەکەکێ ل گوندێ سیدا کو 6-7 کم دووری شێلادزێ یە، تووڤێ ئارتێشا ترک قەلاندییە”.
ھەر وھا د ئاخافتنا خوە دە قارایلان گۆت کو ل رۆژھلاتێ زاپێ چ خالێن ئارتێشا ترک تونە نە. و بەرووڤاژی ڤێ یەکێ ناڤێ گەلەک خالێن رۆژھلاتێ زاپێ ژی گۆتن. ھەر وھا ب دەھان ناڤێن وەکە گرێ جوودی، گرێ ئامێدیێ رەوشا شەری ڤەدبێژە.
مرۆڤ دەما گوھداری دکە، شاش دبە و دفکرە: “وەک کو مە بەرێ ژی ئەڤ پەیڤ بھیستنە.” ئەم ژ خوە دپرسین، گەلۆ ئەم ب دەژاڤویێ دژین؟
دەژاڤو چیە؟ ئەم گشت د ژیانا خوە دە جارەکێ وێ ئەزموون دکن، دەما کو ئەم ل جیھەکێنە ئەم ژ نشکێ ڤە دفکرن کو ئەم بەرێ د ھەمان دەم دە ژییا بووین. ژ ڤێ یەکێ رە دەژاڤو تێ گۆتن. پەیڤەکا فرەنسی ژ بۆ ترکی ھاتیە وەرگەراندن وەک “بەرێ ھاتی دیتن” و وەکی ھەستا کو بوویەرەک یان تشتەک بەرێ ژیایە تێ راڤەکرن. زانستێن پزشکی ڤێ یەکێ ب سیستەما عەسابێن د مەژی دە راڤە دکە.
دەما کو د 2/11/2023 دە ل ستێرک تیڤیێ دە قارایلان گۆتی ل سیدا سەرکەفتن تێ بدەستخستن، من ب راستی ژی گۆت، “من بەرێ ژی ئەڤ بھیستبوو.” لێ یا مە نە باندۆرەک دەژاڤو بوو کو مەژیێ مە ل مە دخست. ب راستی ژی دو بوویەرێن وەک ھەڤ ھەبوون. ب راستی، دو قارایلان ھەبوون.
قارایلانێ پێشی ل شەمزینانێ یە: دبێژە ئێدی ئەڤ لا و ئەو لایێ سینۆر نەما
د 2 تەباخا 2012 دە، ئانکو 11 سال و 3 مەھ بەرێ، قارایلان گۆت: “ژ بەر ڤێ یەکێ گەر ھوون بهێن گەلێ مەیێن ل ھەر دو ئالیێن سینۆر ئەوقاس تۆپباران بکن، وێ دەمێ گەریلا دێ هێت ئالیێ وە. نھا ل دەردۆرا شەمزینانێ 35 کم د ناڤا سینۆر دە گەریلا سەروەرە. ژ بەر ڤێ یەکێ ئەز دبێژم ئەڤ لایێ سینۆر و دەرڤەیی سینۆر ئێدی بوویە چیرۆک. گەریلا د دەورۆبەرێ شەمزینانێ بجھ بوویە. ل ئالیێ دن دەستوەردانێن ئارتێشا ترک یێن ژ بۆ دەرخستنا گەریلا بێ ئەنجام ماینە. رەوش ئەڤەیە. چیایێ گۆمانێ کو پر بەحسا وێ تێ کرن، گرێ ھنداڤی باژارێ شەمزینانێ یە. واتە ئەو جھەکی 1-2 کم دووری باژارە. ژ بەر ڤێ یەکێ گەریلا ل وان گرێن دەردۆرێ ب جھ بوونە.!”
ژ بەر ڤێ یەکێ قارایلانێ یەکێ دگۆت کو وان 35 کم ناڤا سینۆرێ باکور بجھ بوونە. وێ دەمێ گەریلایان لووتکە و رێ دگرتن و ھاتنووچوون و ناسنامە کۆنترۆل دکرن. ئۆپەراسیۆنێن دۆرپێچکرنا شەمزینانێ ئۆرگانیزە دکر.
قارایلانێ دویەمین ل شێلادزێ یە: شەر 6-7 کم دووری باژارێ شێلادزێ یە
پشتی 11 سال و سێ مەھان قارایلان دیسا گۆتنێن خوەیێن سەرکەفتنێ دوبارە دکە. لێ ڤێ جارێ نە ل شەمزینانێ یە، ل شێلادزێ یە. و دبێژە: “گوندێ سیدا 5-6 کم ل دووری شێلادزێیە و مە ل ور ئارتێشا ترک تێک برییە.”
تە گۆت شێلادزێ؟ گەلۆ ما ھوون نە ل شەمزینانێ بوون. د ناڤبەرا شەمزینان و شێلادزێ دە ب سەدان کم ھەنە. ب پیڤانێن ھەوایی 180 کم دووری شەمزینانە. ژ بەر ڤێ یەکێ د ناڤا 11 سالان دە قارایلان 250 کم ژ سینۆری دوورکەتییە و ژ سەرێ سینیا، چەمجوو، گەلییێ زاپێ و کورەژارۆ دەرباس بوویە و بەرێ خوە دایە دەشتا نەینەوا. ل باشوورێ شێلادزێ ژی چیرۆکەکا سەرکەفتنێ ڤەدبێژە.
ئەڤ نە دەڤاژویە ئەڤ چیرۆکەک دەرەوە
ئیجار مەژیێ مە ب مە نالەیزە، ئەم دەڤاژوو نابینن، راستییەک ل ھۆلێ ھەیە ئەو ژی قارایلان شەمزینا ل پەی خوە ھشتییە و ھاتییە سینۆرێ دەشتا نەینەوا. ئانکو چیرۆکەک دەرەو دڤەھینە. ئەو چیرۆکا دەرەو ژ ھنگێ ڤە بەردەوام دکە. یەک ھەڤۆکا کو قارایلان د دەربارێ شەری، رەوشا گەریلا و تاکتیکا تونەلێ دە دبێژە راست نینە. ھەموو پەیڤ و گۆتن دەرەون. قارایلان بێی کو شەرم بکە دبێژە، “بیردۆزا سەرکەتنێ و پاراستنا کوردستانێ.” قارایلان د بابەتێ ڤەھاندنا دەرەوان دە پڕ سەرکەفتییە.
بەلێ، پەکەکە د شەری دە بنکەتییە. ل باکورێ کوردستانێ شەر نینە. پەکەکە ھەموو عەردێن کو بەرێ د دەستێ وان دە بوو رادەستی دەولەتا ترک کرن. دەما ئەم ڤێ یەکێ دبێژن، ژ مە رە دبێژن، ھوون کارمەندێن دەولەتا ترکن، ھوون دەولەتا ترک دپارێزن. نەخێر. بەرۆڤاژی ڤێ یەکێ ئەم دخوازین کورد ڤێ راستیێ ببینن و ببھیزن. ژ بەر کو دەرەوا پەکەکێ یا “ئەم ب سەر دکەڤن، ئەم ل بەر خوە ددن” تەنێ زرارێ دگھینە کوردان. ژ بۆ کو جوانێن کورد ژ بۆ ڤی شەرێ بێ واتە، بێ ئارمانج نەمرن دڤێت ئێدی ئەڤ دەرەو دەرکەڤە ھۆلێ. دڤێت گەلێ کورد بەردێلا ڤی شەرێ وندابوویی نەدن. دڤێت پەکەکە ب ڤێ شکەستنا خوە ئێرشی دەستکەفتیێن ھەرێما کوردستانێ و تێکۆشینا پێشمەرگە نەکە.
ژ بەر ڤێ یەکێ دەولەتا ترک ژخوە باش دزانە کا ل قادا شەری چ دقەومە. خەلکێ بەھدینان دزانن کو پەکەکە ئێدی نە ل حەفتەنین، نە ل خاخورکێ، نە ل بەرواری بالا و نە ژی ل زاپێ نەمایە. دەما قارایلان دبێژە، “ل گوندێ سیدا مینا کەلا دمدمێ بەرخوەدان ھەیە.” لێ سیدا د گەلیێ ئاڤاشین دە گوندەکی بچووک و نەستراتەژیکە. د شەری دە چ باندۆرەکا وێ یا جوگرافی نینە. لێ ھەکە شەر مەحکوومی سیدا ببە ئەڤ یەک نیشان ددە کو نە چیا، نە لووتکە و نە ژی سەنگەرێن ستراتەژیک د دەست دە مانە.
یەک گۆتنا قارایلان ژی راست نینە
چ گۆتنێن قارایلان یێن د ڤێ ھەڤپەیڤینێ دە گۆتین راست نینە. گەر ئەم یەک ب یەک ببێژن دێ رۆمانەک ژێ دەرکەڤە.
قارایلان دبێژە، “د شەرێ 2022 دە 11 ھەلیکۆپتەرێن شەری یێن دەولەتا ترک ھاتن خستن و ئیمھا کرن؛ 80 ھەلیکۆپتەر ژی ھاتن دەربکرن. ب گشتی 91 ھەلیکۆپتەرێن شەری و سکۆرسکی ھاتن خستن و دەربکرن. لێ ئیسال تەنێ 4-5 ھەلیکۆپتەر ھاتنە دەربکرن و چ نەھاتنە خستن. گەلۆ چما؟ ژ بەر کو ئیسال ترک لەشکەرێن خوە ل قادان نادانە ل بارەگاھێن پەدەکێ لەشکەران داتینە.”
ئەڤ گۆتنا قارایلان ب تەمامی دەرەوە. ھوون دزانن چما ئێدی دەولەتا ترک وەکە بەرێ لەشکەران ناهاڤێژە چۆلێ؟ ژ بەر کو ھەموو لووتکە و گرێن دەڤەرێ ل دەستێ ئارتێشا ترک دا نە و پێدیڤی جھێن داخستنا لەشکەران نینە. دەولەتا ترک ل چەلێ ژ بۆ زاپێ، ئاڤاشین و ھەرێما نێروە-رێکان رێکێن قیرکری چێدکە. کاروانێ لەشکەرێ ترک ژ چەلێ ب رێیا قیرکری د دەمەکی کورت دە خوە دگەھینە ھەرێما زاپ-ئاڤاشینێ.
ئەو دۆزەرێن کو قارایلان قالا وان دکە ھەموو ژ چەلێ برنە وێ دەڤەرێ. چ ماکینەیێن کاری ژ شێلادزێ، دێرەلۆک و ل ئامێدییێ دەرباسی وان دەڤەران نەبوونە.
تەنێ یەک ئاموورەکی شەری ژی ل باشوور دەرباسی دەڤەرێن شەری نەبوویە. پەکەکە ب لەییزکێن ڤیدیۆ و کامیرا دخوازە دەرەوێن خوە پشتراست بکە. چ گۆتنێن قارایلان، کالکان و بایک یێن دەربارێ پەدەکێ دە راست نینە.
پەکەکە و یەپەگە نە خوەدی بیرۆزێن سەرکەفتنێ نە. ئارمانجا شەرێ پەکەکێ تەنێ ژ بۆ بەردەوامییا تەمەنێ رێخستنا خوەیە و ب ڤێ مەبەستێ ھێزا خوە دفرۆشە توندرەوێن شیعا، عەرەب و ترک. ژییانا رێڤەبەرێن خوە ژی ب ڤێ ئەولە دکە.
ئارمانجا پەکەکێ ب گۆتنا “پەدەکە-ترک ھەمان بریارگەھێ بکار تینە” ئەوە کو ھەرێما کوردستانێ و ھێزێن پێشمەرگە بکە ئارمانجا ملیسێن حەشدا شەعبی. لێ ھەموو باشوور و ھێزێن ھەرێمی ڤێ شانۆیا سییاسی-لەشکەری یا پەکەکێ باش دناسن.
