تاوان و بێئه‌خلاقیێن كادر و رێڤه‌به‌رین په‌كه‌كێ ب تایبه‌ت ده‌ستدرێژییا وان یا ل سه‌ر كچكێن زارۆك ب داوی نابن، هه‌ری داوی كادر‌كێ پایه‌بلند یێ ڤێ رێخستنێ ب ناڤێ «حسێن محه‌مه‌د حاجی» ده‌ستدرێژی كچه‌كا 15 سالی كر.
چاڤكانیێن پێگه‌ها «داركا مازی» ل رۆژئاڤا كوردستانێ ئاگاهیێن تایبه‌ت ده‌ربارێ تاوانا ده‌ستدرێژییا فه‌رماندارێ هه‌سه‌دێ و كادرێ په‌كه‌كێ «حسێن محه‌مه‌د حاجی» ب ناڤێ كۆد «حسێن كۆچه‌ر» ب ده‌ست خستنه كو ئه‌ڤ كه‌س ژ فه‌رماندارێن هه‌ری نێز یێن رێڤه‌به‌رێ په‌كه‌كێ باهۆز ئه‌رداله.
ل گۆری ئاگاهیێن ده‌ستێ مه، كادرێ په‌كه‌كێ حسێن كۆچه‌ر، ل ده‌ستپێكا ئیسال 2023ێ ده‌ستدرێژی كریه سه‌ر كچه‌كا 15 سالی یا ژ رهققایێ، ل سه‌ر ڤێ تا‌وانێ هات ده‌سته‌سه‌ر كرن و ل زیندانا شه‌دادیێ یا تایبه‌ت ب كادرێن په‌كه‌كێ ڤه هات گرتن.
جه‌زایێ هه‌تاهه‌تایێ زیندانكرنێ بۆ حسێن كۆچه‌ر هات دان، لێبه‌لێ ژ به‌ر كو ئه‌و ژ كه‌سێن نێزی باهۆز ئه‌ردال یێ رێڤه‌به‌رێ په‌كه‌كێ یه، ل تیرمه‌ها ئیسال 2023ێ باهۆز ئەردال سەره‌دانا زیندانا شه‌دادی کریە و ده‌ما نیڤ ده‌مژمێرێ ل گه‌ل حسێن روونشتی یه و سۆز ب حسێن دا كو وی ژ زیندانێ ده‌ربێخیت، له‌وما ژی ل 6 جۆتمه‌ها ئیسال 2023ێ حسێن سه‌ربه‌ست تێ به‌ردان و ڤه‌دگه‌ریته سه‌ر ئه‌ركا خوه.
حسێن كۆچه‌ر ژ هۆزا میرانی ژ گوندێ سویدیه یێ ل دێركا رۆژئاڤا كوردستانێ یه، شڤانێ په‌زی بوو، ل سالێن 2000ێ ته‌ڤلی په‌كه‌كێ دبیت و ل چیایێن باشوورێ كوردستانێ دمینیت، پشتی بوویه‌رێن 2011ێ به‌رێ خوه دا رۆژئاڤا كوردستانێ و ل سالا 2022ێ دبیته فه‌رماندارێ هه‌سه‌دێ یێ مبنجێ و رهققایێ، وه‌كه هاریكارێ به‌رپرسێ هه‌سه‌دێ ل رهققایێ و منبجێ كار كریه.
د نوکە دا هه‌ژماره‌كا کادرێن پەکەکێ بێ سووچ هاتنە گرتن و ل زیندانا شه‌دادیێ نە و هنده‌ک ژ وان د حوجره‌یێن تاکەکەسی دا ل ژێر ئیشكه‌نجه‌یێ نە ژ بەر کو ته‌نێ وان سیاسه‌تا په‌كه‌كێ یا ل رۆژئاڤا كوردستانێ ره‌خنه كرینه، بێئه‌خلاقێن وه‌كه حسێن كۆچه‌ر ژی یێن كو ده‌ستدرێژیێ ل سه‌ر زارۆكان دكه‌ن ب ته‌علیمات و فه‌رمانێن راسته راست یێن رێڤه‌به‌رێن په‌كه‌كێ تێن به‌ردان و دبنه فه‌رماندار و رێڤه‌به‌ر.
