مژارا سلێمان ئەحمەد یێ د ناڤا پەکەکێ دە ب کۆدناڤێ “سەردەم عەفرین” تێ ناسکرن کو مەدیایا پەکەکێ ھەر رۆژ وەکە مژارەکە گرینگ ژ بۆ ئێریشا ل سەر حکوومەتا ھەرێما کوردستانێ ب کار تینە. وەکی دبێژن “پێشیەک بچووکە لێ مەعیدێ مرۆڤی تێک ددە”، مەسەلەیا سلێمان ئەحمەد ژی وسا بوویە. نەخوە قەد نە ھێژایی بەرسڤدایینێ یە ژی. ژ بەر کو سلێمان یان ژی وەک “سەردەم” د ناڤ پەکەکێ دە تێ ناسکرن، ب فەرمی ژ ئالیێ ھێزێن ھەرێما کوردستانێ ڤە ھاتیە گرتن و پشتی گرتنا وی، رێڤەبەریا ئاساییشا گشتی یا دھۆکێ داخویانیەک دا و راگھاند کو سلێمان ژ بەر کارێ نەقانوونی ھاتیە گرتن نە ژ بەر رۆژنامەگەریێ.”

لێ مژارا سلێمان ئەحمەد نیشان ددە کو پەکەکە و راگەھاندنا وێ ب چ مەرەم ئێریشی ھەرێما کوردستانێ دکن. راگەھاندنا پەکەکێ وەکە ناڤەندا شەرێ تایبەت ل ھەمبەری ھەرێما کوردستانێ سییاسەتا کین و غەزەبێ دمەشینە. وەکە  بەرماھیێن حەشدا شەعبی تەڤدگەرە. راگەھاندنا پەکەکێ گلیز ژ دەڤێ وان تێ خوار و بێ ناڤبەر ئێرشی دامودەزگەھێن کوردستانێ دکن.

سلێمان ئەحمەد نە رۆژنامەگەرە بەلکو ئەندامێ ئیستخباراتێ یە

گەلۆ ئەڤ سلێمان ئەحمەدە کییە؟ د راستیێ دە سلێمان ئەحمەد د ناڤا پەکەکێ دە نە ناڤەکی پر گرینگە. ژ مالباتەکا عەفرینی یە. د مالباتا وی دە تەڤلیبوونێن پەکەکێ-پەیەدێ ھەنە.  د سالا 2018 دە تەڤلی ئاژانسا ھاوارێ دبە. د سالا 2019 دە دەرباسی ئاکادەمییا راگەھاندنێ یا “گوربەتعەلی ئەرسۆز” دبە و ل ور 4 مھان پەروەردێ دبینە. د داویا پەروەردەیێ دە دەرباسی سلێمانییێ دبە و د رۆژنامەیا پەکەکێ یا ب ناڤێ رۆژنیوسێ دە دخەبتە. کارێ تەرجووما زمانێ عەرەبی بۆ کوردی دکە. 

ھەر وھا ل گەل ئیستخبارەتا پەکەکێ نەلەپێ (ناڤەندا لێکۆلینێن پۆلتک) کار دکە. ژ بەر کو ناسنامەیا وی یا فەرمی یا سووریەیێ هەیە ب رەسمی دچە رۆژئاڤا و تێ. واتە ئەو د بن ناڤێ رۆژنامەگەریێ دە کارێ ئیستخباراتێ دمەشینە.

د راستیێ دە رۆژنامەگەری ژ بۆ کادرۆیێن پەکەکێ تەنێ ماسکەیە. ژ خوە نە رۆژنامەڤانن، ئەو خەباتکارێن رێخستنێ نە، دەزگەھێ چاپەمەنی و راگەھاندنێ وان ئەرکدار دکە. 

رۆژنیوس سازیەکە کو دژمناتییا ھەرێما کوردستانێ دکە

ھەر وھا رۆژنامەگەری نە قادا خەباتا فڕیشتەیێن بێ باسکە. کەس تەنێ ژ بەر کو مرۆڤەک رۆژنامەگەرە، چاڤێن خوە ژ تاوانێن وی ناگرە.

  ھەر وھا دڤێت ل ھەرێما کوردستانێ ب راستی ژی رۆژنامەڤانێن پەکەکێ وەکە دژمن بێن راگھاندن. میناک رۆژنیوس وەکە تیڤیا ترکمەنەلی و رۆژنامەیا ئاکت ھەرۆژ ئێرشی دەستکەفتێن کوردان دکە. چ جوداهی د ناڤبەرا ڤان دەزگەھان دە د مژارا دژمنکارییا ل سەر ھەرێما کوردستانێ نینە.

 رۆژنیوس نە چاپەمەنیەکا کوردانە، رۆژنیوس دەزگەھەکە کو خزمەتکارێ حەشدا شەعبی یە.  ئەڤ دەزگەھە ناڤەندا دژمناتیا پەکەکێ یا ل دژی ھەرێما کوردستانێ یە. پەکەکە و دژبەرێن کورە دل د ڤی دەزگەھی دە تەڤدگەرن.

ل سلێمانیێ ب جھ بوونە و وەکە گارانێ ئێرشی ھەرێما کوردستانێ دکن. تشتا بالکێش ئەوە کو ل باژارێن وەکی ھەولێر، دوھۆک، سۆران و سیدەکان نووچەگھانێن ڤان ھەنە و ب میکرۆفۆنێن د دەستێن وان دە دخەبتن کو پرۆپاگاندایا حەشدا شەعبی بکن و کوردان ل ئیراقێ لاواز بکن. ببۆرن، لێ ئەڤ ھەلوەستا لیبەرالا حکوومەتا کوردستانێ یە. ئەڤ ھەلوەستا لیبەرال ژ بۆ خاینان رێیا خوە رێخستنکرنێ ڤەدکە. بەلێ مخابن ب دەھان سازیێن پەکەکێ یێن خایین دکارن ب رەحەتی ل کوردستانێ خوە برێخستن بکن.

دەمۆکراسی ب واتەیا ئازادیا دژمنان ناهێت

کەس چ بێژە بلا ببێژە، ھەر کەسێ کو ئیراق، ترکیا، سووریا، ئیران، لووبنان و مسرێ ناس دکە، دزانە کو ل رۆژھلاتا ناڤین جھێ کو فکرێن ھەری ئازاد لێ دژین ھەرێما کوردستانێ یە. ھەر کەس دکارە سڤکاتیێ و بوختانا ب سەرۆکوەزیرێ کوردستانێ، حیزبێن وێ، شەھیدان و سازیێن ئەولەھیێ بکە. وەکە میناک ئەڤ رێخستنا خیانەتکارا ب ناڤێ رۆژنیوس ژ ھێزێن ئاساییشا ھەرێما کوردستانێ رە دبێژە “ئاساییشا پەدەکێ” و ژ ھێزێن پێشمەرگە یێن کو ئەڤە سەد سالن شەھیدان ددە و کوردستانێ دپارێزە رە دبێژە “چەتەیێن پەدەکێ”. ھەرێما کوردستانێ ناس ناکە، رەوابوونا وێ ناس ناکە، ئێریشی ھەموو دەزگەھێن ئیداری-ئەولەیی دکە. گەلۆ ما ئەڤە نە خیانەتە. ژ خائینان رە مافێ ئازادی و رێخستنبوونێ نایێ دایین. ئەڤ دەزگەھێن تاری دژمناتیا ھەرێما کوردستانێ دکن. یێن دژمنی دکن نە خوەدی ئازادیا رێخستنبوونێ نە، کریارێن دژمنان نە پرسگرێکا تێگەھێن وەکی دەمۆکراسی و ئازادیا چاپەمەنیێ، پرسگرێکا ئەولەھیا نەتەوەیی یە.

مە ژ دەستپێکێ ڤە گۆت کو مەدیایا پەکەکێ دووڤکا حەشدا شەعبی یە. ژ بەر ڤێ سەدەمێ سلێمان ئەحمەد ژ دەما کو ھاتیە گرتن و ڤر ڤە کەس و رێخستنێن شیعە-حەشدا شەعبی-ئیرانی ژ بۆ ئێریشا خوە ژ خوە رە کریە مەرتال.

رێخستنا راگھاندنێ یا حەشدا شەعبی دەردکەڤە و دبێژە “دڤێت رۆژنامەڤان بێن بەردان”. بێلۆمە بت، رێخستنا ھەری خویندارا رۆژھلاتا ناڤین حەشدا شەعبی بەحسێ مافان دکە. ئەڤە دژمنێن ئازادی و دەمۆکراسییێ ژی بانگا ئازادیا چاپەمەنیێ دکن؟

دەمۆکراسیا پەکەکێ وەکە دەمۆکراسیا کۆرەیا باکورە. کەسێ کو سلۆگانا “بژی سەرۆک ئاپۆ” نە هاڤێژە، دژمنە. ل رۆژئاڤا گەل ب دارێ زۆرێ ژ بۆ پرۆتەستۆیان تێن برن، رۆژنامەگەر تێن ونداکرن، ب دەھان کەس بوونە قوربانیێن جنایەتێن کریار نەدیارێن پەکەکێ. رێخستنەکا وەکی پەکەکێ کو ژ سەدی 40 پێشەنگێن خوە ب دەستێ خوە کوشتنە بەحسا ماف و ئازادییێ دکە. تەڤگەرەکە وھا دەستبخوین چاوا دکارە بەحسا ماف و ئازادیێ بکە.

رۆژنیوس ھەر رۆژ دبێژە “سلێمان ئەحمەد ھندە رۆژە گرتییە” و داخوازا “ئازادیا چاپەمەنیێ” دکە. کەسێن دئاخڤن کی نە؟ گەلێ باشوورێ کوردستانێ ڤان کەسان باش ناس دکە. ھەروھا داخوازەکە شاش ژ ئالییێ کی ڤە بێ کرن ژی شاشە. ھیتلەر ژی خوەدی پەسندارێن مەزن بوو. کەسێن کو دەما دەولەتا ترک کوردان دکوژە، دادکەڤن کۆلانان و کێفخوەش دبن ھەنە. ئەم چ بکن، ژ بەر کو کەسەک دەردکەڤە و پەسنێ ئارتێشا ترک ددە، ئەم خوە بێدەنگ بکن؟ ناا. ئەڤ بانگاوازییێن راگەھاندنا پەکەکێ گونەھێن وان سڤک ئانکە. پەکەکەیی وەکە گارانێ ئێرشی سەر دام و دەزگەھێن ھەرێما کوردستانێ دکن، ما ئەم دکارن ببێژن ئەڤ کەسە بێگونەھن. چ بەهانە دژمناتیا پەکەکێ یا ل ھەمبەر ھەرێما کوردستانێ رەوا ناکە.

 پێشی دڤێت سازیێن ھەرێما کوردستانێ، پشترە رەوشەنبیر و سیاسەتمەدارێن وێ زرارێن کو لیبرالیزم و خوەشبینییا زێدە ددە سیستەما ھەرێما کوردستانێ باش ببینن. ئەگەر دەمۆکراسیا ھەرێما کوردستانێ زرارێ بدە پاشەرۆژا گەل و بەردەوامیا سیستەمێ، ئەو نە دەمۆکراسییە. ئەولەهییا ستاتوویا ھەرێما کوردستانێ ل سەر ھەرتشتی دایە. ھندەک دام و دەزگەھ وەکە ئێشا پەنجەشێرێ نە، ھەکە تو د وەختی دە مداخلەیێ نەکی دێ بەلاڤی ھەموو لاشەیی ببە و ئەو لاشە دێ بمرە.

تێکۆشینا رادیکال ل دژی ڤان شانەیێن کو ئێریشی سیستەما حکوومەتا ھەرێما کوردستانێ دکن، تێ واتەیا پاراستنا سبەرۆژا گەلێ کورد. ئەڤە کارەکە کو مرۆڤ پێ سەربلند دبە، نە تشتەکە کو مرۆڤ ژێ شەرم بکە. چاوا کو ل ھەمبەری داعشی د کۆزکان دە شەر ھاتە کرن دڤێت ب وێ رووحیەتێ ل دژی ڤان پێکھاتە و شانەیان بسەکنین، ئەڤ کار کارەکی پیرۆز و جھێ شانازییێ یە. د ھەمان دەم  دە مافەکی رەوا و کارەکی ب روومەتە.