ل رۆژا 18ێ ڤێ مه‌هێ ل کەرکووکێ ژنه‌ك ب ناڤێ «فریال سلێمان خالد» هات گوللـەباران کرن. ل سەر ره‌گه‌زنامه‌یا وێ گەلەک نیقاش هاتن کرن و ناسنامەیا وێ هاتە ڤەشارتن.
ل رۆژا 18ێ ڤێ مه‌هێ پشتی نیڤرۆ ل بەر لیسەیا سەگرەمە یا تاخا ره‌حیماوا کو کوردێن کەرکووکێ لێ دژین، ئێرشەکا چەکداری پێک هات. دو مۆتۆرسیکلەتێن کو ئێریش ئه‌نجام داین، ب چەکا بێدەنگ ب 8 گوللـەیان ژنەک قەتل کرن.
هاتە زانین ئەو ژن ب ناڤێ «فریال سلێمان خالدە»، فریال سلێمان كادرۆیه‌كا په‌كه‌كێ بوو کو ل کەرکووکێ د ناڤا کارێن ژنان یێن په‌كه‌كێ دا ئەرکدار بوو.
گەلۆ فریال سلێمان کی یە؟
فریال سلێمان خالد کو د ناڤا په‌كه‌كێ دا ب ناڤێ زەلال زاگرۆس ئان ژی زەلال حه‌سه‌كی د هات ناسکرن. زەلال د سالا 1992ێ دا ژ حه‌سه‌كێ تەڤلی په‌كه‌كێ ببوو. پشتی سالەکێ ئەو وەکە گەریلا شاندن هەرێما زاپێ. فریال سلێمان ئانكو زەلال ب سالان د ناڤا په‌كه‌كێ دا گەریلاتی کریە. پشتی سالا 2003 د ناڤا په‌چه‌ده‌کێ «پارتیا چارەسەریا دەمۆکراتیک یا کوردستانێ» ل ده‌ڤه‌رێن وەک رانیا، قەندیل، هەولێر كارێن په‌كه‌كێ دكه‌ت. ل گەلەک دەڤەرێن باشوورێ کوردستانێ كار کریە. زەلال حه‌سه‌كی پشترە د سالا 2005ێ دا دەرباسی رۆژئاڤا بوو و تەڤلی په‌یه‌دێ و كارێن وێ بوو. لێ پشترە ب دەمەکێ درێژ په‌كه‌كێ کادرۆیێن بەرێ یێن رۆژئاڤا ب به‌هانه‌یا کو حزباتیێ دکه‌ن گازی كرن. د ڤی چارچۆڤەی دا ل سالا 2018ێ بانگ ل زەلال حه‌سه‌كی تێ کرن و تەڤلی خولێن KJB و PAJK دبیت.
هەروه‌ها هات راگهاندن کو پشتی خولێن پەروەردێ ژ بۆ باشوورێ کوردستانێ هات ئەرکدار کرن. هات زانین کو زەلال حه‌سه‌كی ئەڤه 2 سال و نیڤە ل کەرکووکێ یە. ل گۆری زانیاریان، زەلال حه‌سه‌كی ل وێرێ د ناڤا رێڤەبەرییا ژنان یا په‌كه‌كێ یا ب ناڤێ «رێكخراوا ئازادیا ژنێن کوردستانێ» و تەڤگەرا ئازادی دا كار دكر.
دەربارێ وێ مژارێ دا، ژێدەر دبێژن، په‌كه‌كە ل کەرکووکێ و دەڤەرێن دن یەکینەیان ئاڤا دکەت. ئەڤ یەکینە نە ل بەر چاڤن، هەموو کارێن دەزگەهـ و سازییێن سڤیل برێڤەدبن. لێ ل سەر ناڤێ «په‌كه‌كێ – پاژکێ و كه‌جه‌كێ – که‌ژه‌بێ» كار دكه‌ن. زەلال حه‌سه‌كی ژی وەکە كادرۆیه‌كا کەڤن دناڤا شاخا کەرکووکێ یا ڤێ یه‌كینه‌یا ئیداری یا په‌كه‌كێ دا بوو.
ل گۆری زانیاریێن مە، زەلال حه‌سه‌كی د ناڤا 32 سالێن خه‌باتا په‌كه‌كێ دا چ جاران د ئاستەکی بەرز دا نه‌هاتبوو وه‌زیفه‌دار كرن.
بۆچی زەلال حه‌سه‌كی بوو ئارمانج؟
ل گۆری زانیاریان، زەلال حه‌سه‌كی دو سال و نیڤان ل تاخێ رەحیماوا یێ کەرکووکێ د مالا سازیا ژنان دا بوو. ئەڤ مالە ژ ئالیێ كادرۆیێن په‌كه‌كێ ڤە گه‌له‌ك د هات بکارئینان. زەلال ژی هەرده‌م ب تنێ كار دكر. چاڤکانی ئاشكه‌را دکه‌ن کو بەرپرسێن په‌كه‌كێ یێن ل کەرکووکێ د مالێن ڤەشارتی دا دمینن، کەس ناچیته مالێن وان و هەموو ب ئۆتۆمۆبیلێن تایبەت دگەرن. لێ كادرۆیێن كو ژ بۆ په‌كه‌كێ زێدە نەگرنگ یێن وەک زەلال حه‌سه‌كی بێ ئۆتۆمۆبیل و بێ پاراستن د هاتن و د چوون و كار دكر. ژ بەر ڤێ ئه‌گه‌ر ب هێسانی دهێنه ئارمانج کرن.
چاڤکانیێن نێزیكی په‌كه‌كێ دیار کرن هه‌تا نها ئەو كادرۆیێن په‌كه‌كێ یێن ل سلێمانیێ هاتنە ئارمانج کرن، «شوکری سه‌رحه‌د (یاسین بولوت)، زیلان کۆنیا (ناگیهان ئاکارسەل) و زەلال حه‌سه‌كی (فریال سلێمان) ئەڤ هەر سێ خەباتکار ژی نە خودان ئەرکێن گرنگ بوون. ئارمانج کرنا وان ژ بوو کوژەران هێسان بوو له‌وما ئەو بوون ئارمانج.
گەلۆ د بەشەک ژ پرۆژەیا په‌كه‌كێ دا کو دەولەتا ترک بێکشنە باشوور؟
تەڤگەرا په‌كه‌كێ ژ سالێن 1990ێ ڤە ل ترکیێ شەرەکی بێ ئاست دكه‌ت. گرانییا شەر ڤەدگوهێزیتە باشوورێ کوردستانێ و گاڤ ب گاڤ ڤێ ستراتەژیێ بەلاڤی چیا و باژارێن باشوورێ کوردستانێ دکەت.
په‌كه‌كێ د سالا 2003ێ دا ژ قەندیلی هه‌تا حه‌فته‌نینێ وەک هەرێمێن پاراستنێ یێن مەدیایێ راگهاندبوو، لێ نوکە ئەڤ هەرێم ژ سەدی 85 رادەستی ئارتێشا ترک کرن. واته په‌كه‌كێ ئارتێشا ترک ل پەی خوە كێشا چیایێن باشوورێ کوردستانێ. نها ژی په‌كه‌كە ل کەرکووک، شەنگال و سلێمانیێ خوە پێشان ددەت کو ب ئاوایەکی هەبوونا چەکداری یا دەولەتا ترک ل باشوور رەوا بکەت.
