میتا ترك د سالێن رابووری ده پڕ ب باشی كه‌تیه د ره‌فێن په‌كه‌كێ ده، ته‌نزیما وێ د هێلێن ژێر و ژوور یێن رێخستنێ ده ئه‌وقاس زه‌حف بوویه كو گهیشتیه وێ ئاستێ هه‌گه‌ر كادرۆیێن په‌كه‌كێ خوه رێز بكن و وه‌رن حه‌ساب كرن، ئێنجام دێ ووسا ده‌ركه‌ڤه، یێك دو یێ سێه‌مین ژێ میته، یێك دو دیسان یێ سێیه‌مین میته و ووسا.
جیهـ گرتنا ئیستخباراتا تركیێ یا كو ژێ ره دبێژن «میت» د په‌كه‌كێ ده نه تشته‌كی نوو یه، میتێ ژ قه‌دیم جیهێ خوه د ناڤ ڤێ پارتیێ ده قاییم كریه، ب سه‌دان ده‌لیل و ڤیدیۆ ڤێ گۆتنا مه ئیسپات دكن، ژ بوویه‌را 7 نیسانا 1972یان وه‌ختا ئۆجالان د خوه‌پێشاندانێن چه‌پێن تركان ده هاتیه گرتن و د زوو ده هاتیه به‌ردان، هه‌یا زه‌واجا وی یا ب كه‌سیره یلدرم كو كه‌چا به‌رپرسه‌كی میتێ بوو، دیسان اعترافێن وی یێن ژ بۆی میتێ و دادگه‌هێ و ئاماده‌هییا وی ژ بۆی خزمه‌تا تركیێ، ب كورتاسی پشتی ڤه‌گه‌را ئۆجالان بۆ تركیێ ل سالا 1999ێ، ڤه‌گه‌را كو په‌كه‌كه ناڤێ كۆمپلۆیێ لێ دكه، خه‌باتا ڤێ حه‌ره‌كه‌تێ تام كه‌ته د خزمه‌تا ده‌وله‌تێ ده، تایبه‌ت پشتی سالا 2004ێ كو ئۆجالان ب فه‌رمی بوو هێزەک ژ بۆ جێبەجێکرنا پۆلەتیکایا دەولەتا ترک، مخابن ئه‌ڤ یێك هه‌یا رۆژا مه یا ئیرۆ ووسا مایه.
ئه‌و ژ مالباتێ یه!
هه‌ر وها گۆتنا عه‌بدولره‌حمان دلپاك زه‌لامێ ده‌وله‌تا كوور یا تركیێ ژی میناكه‌كه زه‌لال و به‌ر ب چاڤه كو ئۆجالان ژ میتێ یه، وه‌ختا گۆتی: كه‌سیره یا هه‌ڤژینا ئۆجالان میت بوو، خه‌زوورێ وی ژی، واته ئه‌و ژ مالباتێ یه!.
د ڤێ نڤیسێ ده ئه‌مێ زێده به‌حسا دیرۆكا په‌كه‌كێ و چاوانیا كه‌تنا میتێ د ره‌فێن رێخستنێ ده نه‌كن، ئه‌مێ به‌حسا 4 سالێن داوین بكن كو د ڤان سالان ده میتێ زه‌حف د په‌كه‌كێ ده ل هێلێن ژێر و ژوور جیهـ گرت.
وه‌زیرێ كارێن هوندر یێ به‌رێ یێ تركیێ سلێمان سۆیلو، د داخویانیه‌كه خوه دا گۆتبوو: «چاڤكانیێن مه یێن ل قه‌ندیلێ زه‌حف هه‌نه، ب سه‌دانه، نه وه‌له ب هه‌زارانه». ئه‌ڤ گۆتن دهێته واته‌یا كو ت جڤینه‌كه په‌كه‌كێ بێ حازربوونا چاڤكانیێن ده‌وله‌تێ یێن د په‌كه‌كێ ده نایێ ل دارخستن، میت ئه‌و قاس د رێخستنێ ده كوور چوویه كو ب ئه‌ندامێن وێ یێن ل خه‌تا ژوور تاولێ و دۆمینێ د لیزه و چایێ ڤه‌دخون، عه‌ینی تشت ل خه‌تا ژێر ژی ب هه‌ڤره برنجا ب ماش دخون.
په‌كه‌كێ د چار سالێن داوین ده ئیخانه‌ته‌كه مه‌زن ل ده‌هان كادرۆیێن خوه یێن پایه‌بلند كر، هه‌موو پێشكێشی میتێ كرن و هه‌ر یێك ب رییه‌كێ هات تاسفیه كرن، تایبه‌تی ل سلێمانی و رۆژئاڤا كوردستانێ. د مه‌ها یه‌ك یا 2024ێ ده ژی ته‌نێ ب ئۆپه‌راسیۆنێن تایبه‌ت میتێ 6 كادرۆیێن په‌كه‌كێ كوشتنه پرانی ژێ ب چه‌كا بێده‌نگ.
ل 18 كانوونا دویه‌مین 2024ێ میتێ كادرۆیا په‌كه‌كێ «فريال سليمان خالد» ل كه‌ركووكێ ب چه‌كا بێده‌نگ كوشت، ل 4 كانوونێ ژی كادرۆیێ په‌كه‌كێ «سادق شێخ ئه‌حمه‌د» ل سلێمانیێ و هه‌ر ب چه‌كا بێده‌نگ، ل 12 كانوونێ پۆلیسان جه‌سه‌دێ كورده‌كی باكور كوشتی د ئاپارتمه‌نا وی ده ل دهۆكێ دیتن، میتێ دو كادرۆیێن دن ژی ب بالافرێن كه‌شفێ ل سینۆرێ ئامێدیێ و سلێمانیێ كوشتن یێك ژێ ب «ئاسۆ هه‌ورامانی» تێ ناسكرن.
د هەیاما داوین دە، په‌كه‌كێ هه‌ژماره‌كه زێده یا كادرۆ و فه‌رماندارێن خوه یێن ئاستا یه‌كه‌م و دویه‌م ب ده‌ستێ میتێ تاسفیه كرن، ژ وان «شوکری سەرحەد، زیلان کۆنیا، ئەمین بەختاری، عەلی قەندیلی» و یێن دن. ئەو ژ باسکێ لەشکەریێ په‌كه‌كێ دهاتن حەسباندن، ل گەل دەهان کەسێن دن کو ژ نیڤێ سالا 2021ێ ڤە بوونە ئارمانجا بۆمبەبارانا ئاسمانی.
ل 2023ان ژی ب ته‌ڤاهی 63 كادرۆ، فه‌رماندار بوونه هه‌ده‌فا ئۆپه‌راسیۆنێن تایبه‌ت یێن میتێ، گه‌له‌ك ژێ ئه‌ندامێن كۆمیتا ناڤه‌ندی یا پارتیێ بوون.
ئۆپەراسیۆنێن سووئیقەستێ یێن کو ژ ئالیێ ئیستخباراتا ترکیێ ڤە ل باشوورێ كوردستانێ تێن کرن، نە نوو تێنە حەسباندن، لێ د مەهێن بۆری دە دو قات زێدە بوونە، ئه‌ڤ ژی ب وێ واته‌یێ تێ كو «میت» ئه‌وقاس د په‌كه‌كێ ده چالاك بوویه كو جیهـ، ناڤەند و تەڤگەرێن ئەندامێن چالاک یێن په‌كه‌كێ گاڤ ب گاڤ د زانه و ته‌عقیب دكه، پشتی كو فه‌رمانا تاسفیه‌كرنا وان ژ رێبه‌رتیا په‌كه‌كێ تێ په‌ژراندن.
