ناتۆ: ئیران کارەکتەرا سەرەکی یا تێکدانا ئەولەهییا دەڤەرێ یە

سکرتێرێ گشتییێ هەڤپەیمانیا ناتۆیێ راگەهاند، «ئیران ل سەر نەسەقامگیرکرنا دەڤەرێ بەردەوامە و ژ ئێریشێن دەریایا سۆر و ئارمانجکرنا کەشتیان بەرپرسیارە، لەوما رەفتارێن وێ نایێن قەبوولکرن».

ژ بەر وێ ئێریشا درۆنی یا ل سنۆرێ ئوردن – سووریەیێ ل دژی سەربازێن ئامەریکایێ هاتیە کرن، سکرتێرێ گشتییێ هەڤپەیمانیا ناتۆیێ یێنس ستۆلتەنبێرگ د کۆنفرانسەکێ رۆژنامەڤانی دا ل واشنتۆنێ هەڤخەمیا خوە ژ بۆ گەل و حکوومەتا ئامەریکایێ دیار کر و گۆت: «هەڤپەیمانیا ناتۆیێ ئیرانێ وەکی کارەکتەرا سەرەکی یا تێکدانا ئەولەهی و سەقامگیرییا دەڤەرێ دبینە».

ستۆلتەنبێرگ هەروەها راگەهاند، «ئیران ژ پشتەڤانیکرنا وان تەرۆرستان بەرپرسیارە یێن کو ل دەریایا سۆر ئێریشی کەشتیان دکن».

سکرتێرێ گشتییێ هەڤپەیمانیا ناتۆیێ گۆت: «رەفتارێن ئیرانێ وەسا دیار دکن کو جیهان بێ قانوون و رێکارە، ئەڤ ژی پێشهاتەکا مەترسیدارە و نایێ قەبوولکرن، لەوما پاراستنا ئەولەهیا جیهانێ ئەرکێ مە گرانتر دکە».

پێر (یەکشەم، 28.1.2024) فەرماندەیا ناڤەندی یا ئامەریکایێ سێنت كۆمێ راگەهاند، «ژ ڤەرێژا ئێریشەکا درۆنی ل سەر جهەکێ سەربازییێ هێزێن ئامەریکایێ ل سەر سنۆرێ ناڤبەرا ئوردن و سووریەیێ، سێ سەربازێن ئامەریکایی هاتنە کوشتن و هەژمارەکا سەربازێن دی ژی بریندار بوون».

پشتی وێ ئێریشێ، سەرۆکێ ئامەریکایێ جۆ بایدن راگەهاند کو وان دێ بەرسڤەکا توند ژ بۆ وێ ئێریشا درۆنی هەبە یا کو ل ئوردنێ هاتیە کرن و سێ سەربازێن وان تێ دە هاتنە کوشتن.

هەروەسا جیگرا بەردەڤکێ پەنتاگۆنێ سابرینا سنگ ژی د داوی هەلوەستێ وەلاتێ خوە دە ل سەر وێ ئێریشێ راگەهاند، «ئەم گۆمانێ دبن کو کەتیبەیێن حزبوللاهێ، کو ژ ئالیێ ئارتێشا پاسدارێن ئیرانێ ڤە تێن پشتەڤانیکرن، ئەو ئێریش کربە». هەروەسا تەکەز ژی کر، «ئامەریکایێ دێ د دەمەکێ گونجایی دە بەرسڤ ژ بۆ وان هەبە».