ل هن باژارێن باکورێ کوردستانێ ل سەر دیواران ب پیتێن مەزن «رابە» هاتیە نڤیساندن. پشتی ئەڤ پەیڤا وه‌ها نەپەنی، پارتیا «دەم» لێ خوەدی دەرکەت. د بانگاوازییا دەم پارتیێ دا «مەشا ژ بۆ ئازادییا عه‌بدوللا ئۆجالان» دەرکەت.
ئەم ژی دبێژن: رانەبە
چ ما ئەم دبێژن نەرابە؛ ژ بەر کو ئەم وەلاتپارێزێن کوردێن رەسەنن، ژ بەر کو ئەم کوردستانینە، ئەم ناخوازن ئەڤ گەل د ڤێ پەڤچوونا بێ واتە دا پێتر بێ چەوساندن. نها تەنێ ژ بەر کو مە ئەڤ گۆتن کر، هنەک کەس و لایەن دێ ببێژن، وەی هوون ئاكه‌په‌نه، هوون میتن و گەلەک حەقارەتان دێ ل مە بکن. لێ ئەگەر ئەم دو پرسان ژ ڤان لایەن و کەسان بکن، ئەو نکارە بەرسڤا مە بدن.
ما چما ئەڤ گەل رابە سەر پێیا گەلۆ ما کەنگی ئەڤ گەل روونشتییە؟ چ چاخا په‌كه‌كێ بانگا سەرهلدان و خوەپێشاندانێ ل گەل کر بە، گەلێ کورد دەربێن مەزن خوارنە و دەرفەتێن مەزن ژ دەست خوە رەڤاندنە.
د سالا 1991 دا ل باشوورێ کوردستانێ راپەرینا گەل چێبوو و کوردستان ئازاد بوو. ڤێ راپەرینێ باندۆرا خوە ل باکوور ژی کر. په‌كه‌كێ خوەست سەرکێشیێ ل ڤێ پێلا سەرهلدانێ بکە لێ بێ ئامادەکاری و ستراتەژی گەل بەر ب کۆمکوژیێ ڤە کشاند. چەک دا دەستێ خەلکێ و بەرێ وان دا کۆلانا. دژمن ئەڤ یەک ژ خوە رە وەکە دەرفەت دیت و تەرۆرەکی مەزن ل سەر سەرهلدێران مەشاند. سەرهلدان هێژ دەسپێنەبوویی هات پەلخاندن. گەل دەربەیەک مەزن خوار. گوند هاتن ڤالاکرن، وەلاتپارێز هاتن کوشتن و پرسگرێکا کورد هاتە تەرۆریزە کرن.
د سالێن 1999ان دا دەما کو ئۆجالان هاتە گرتن، تەڤگەرا گەل یا هەیی دیسا هاتە بێواتە کرن. په‌كه‌كێ سەرهلدان ڤەگوهەراند چالاكیێن خوە شەوتاندن و مه‌راسیمێن ئیلاهیکرنا ئاپۆی. پشتی دەمەکێ کن ئەڤ پێلا سەرهلدانێ ژی، ژ ئارمانجا نەتەوی هات دەرخستن.
پشتی سالا 2004ێ و وێ باندۆرا ئەرێنی یا کو هەرێما باشوورێ کوردستانێ، ل سەر باکورێ کوردستانێ چێكری. د سالا 2006ێ دا گەلێ ئامەدێ ل دژی ئێریشا بۆمبەیی یا پرۆڤۆکاتیفا ل «پارکا کۆشو یۆلو» ب ئاوایەکی نشکاڤە داکەت قادان. په‌كه‌كێ ئەڤ یەک ژی ب دەولەتا ترک رە کر جهێ بازارا سیاسی. رایا گشتی یا کوردی ژی های ژێ نەبوو. ئەو تەڤگەر ژی ب داوی بوو.
پشتی سالا 2012ێ ل باکور تەڤگەرا گرسەیی پێشکەت. پێشی پەیکەرێ عه‌گید (ماهسووم کۆرکماز) ل لجێ هات دانین و گەل لێ خوەدی دەرکەت. پاشێ ب هنەک زەختا دەولەتێ په‌كه‌كێ دیسا گاڤ پاشدە هاڤێت. کەسی فێم نەکر کا چ چێدبه.
وەکە کو ئەڤ نەبەس بوو بانگ ل گەل هات کرن «بەرخوەدانا رێڤەبەریا خوەسەر» بکن. ل بن ڤێ پلانێ دە ژی شەرێ خەندەکان ل سەر گەل هات سەپاندن. 11 باژار هاتن کاڤلکرن و ب هەزاران جوانان ژی ژیانا خوە ژ دەست دا. پشترە باکور کەتە د ناڤا پێڤاژۆیەکە تاری و ئالۆز دا.
ئەڤ کورتە دیرۆک ژی نیشان ددەت؛ کەنگی کو په‌كه‌كێ و پێکهاتەیێن وێ ژ ڤی گەلی را گۆتبیت «رابە» گەل داربە خوارییە و دەستکەفتێن هەیی ژی ژ دەست دانە. د وارێ سیاسی و ته‌نزیمی دا ژی هێژ زێدەتر پاش ڤە چوویە.
ڤێ جارێ ژی بانگا «رابە» یا ب ناڤێ پارتیا دەم د چلەیا 2024ێ دا هاتیه کرن، مەحکوومی هەمان ئەنجامێ یە. ژ خوە ئەڤ بانگا «رابە» نە ژ بۆ چارەسەرییا پرسگرێکا کورد یا ئازادی و خوەسەرییا وی هاتیە هاڤێتن. ئەڤ بانگاوازیا «رابە» تەنێ ژ بۆ ئاكتیڤكرنا گرسەیا خوە یە. تەنێ ژ بۆ كو دژمن چەند وەلاتپارێزان شەهید بکە و چەندان ژی بگرە تێ کرن. پشترە ژی دێ دەست ب حەماسەتێ بکن.
یێن کو ڤێ بانگێ دکن، هەرتم خوە ژ گرتن و کوشتنێ فه‌لتاندنە، لێ یێن کو ژێ باوەر دکن، هەر تم بەردێل دانە. ئەو په‌رله‌مانتارێن کو پارێزبەندیا وان هەیە و مەهانە ب هەزاران دۆلار مەعاشی دستینن، ڤێ مەشێ ب رێ ڤە دبن، تەڤلی بەرنامەیێن ته‌له‌فزیۆنی دبن و دخوازن ژ بۆ رێڤەبەرێن قەندیلێ قەشمەریێ بکن. دووڤ را ئەو دێ بچن مالێن خوە یێن ل ئەنقەرەیێ پالدن، نەینووکێن خوە چێکن، پرچا خوە شەکن و بچن سەر کورسیکێن «چەرمێ غەزالان» ل مەجلیسێ روونن. لێبەلێ یێن ل گه‌ل وان مەشیایین دێ وەرن گرتن ئیشکەنجە کرن و کوشتن.
ئەم د بێژن ڤێ نەکن، ژ بۆ ئارمانجێن نەدیار و بێواتە رانەبن. ژ خوە رۆژهلاتا ناڤین دشەوتە. سیستەما جیهانێ بەر ب رێیەکا نەدیار ڤە دچە. گەل ب خەتەرەیا مرن و برچیبوونێ رە روو ب روویە. یێن کو د رەوشەکا وها یا فه‌وزایێ دا ب درووشما «ئازادییا ئۆجالان ئازادییا مەیە» بانگ دکن یان ئەحمەقن یان ژی خائینن.
ئەڤ دەهـ سالن حەماس ب یەک-دو چالاکیان گەلێ فەله‌ستینێ وەکە خوراک د دهاڤێژته بەر دەڤێ ئیسرائیلێ. باژار وێران دبن خەلکێ بێ گونەهـ تێ کوشتن و سەرۆکێن حەماسێ ل باژارێن ده‌وحه و ستەنبۆلێ د ئۆتێلێن لوکس یێن 7 ستێرک دا سەوق و سەفایێ دکن. خەلکێ سڤیل بێپاراستن ل قادا شەر بێ خوەدی و بێ سەمیان هشتن. نها ژی په‌كه‌كە هەمان تشتی ل گەلێ کورد دکە. جەمیل باییک ل سلێمانیێ، رەمزی قەرتال ل مارسیليا، قەراسوو ژی ل تەهرانێ دژین و تەعلیماتان ددەنه خەلکێ فەقیر و ژار د بێژنە وان «رابە». ئێدی ببۆرە، هەکە تو پێشەنگی دڤێ تو ل پێش بی. هوون ئەڤە 40 سالن ل پشت خەلکێ خوە د ڤەشێرن. دێ فەرمۆن بێ زەحمەت هوون رابن.
ژ بۆ چ تشتەکی کو «قبلە و ئارمانجا وێ نە «کوردستان» بیت، تلیا خوە ژی نەلڤینن
ئێدی گەلێ کورد قەبوول ناکە «یێن کو ژ خوە رە دبێژن رێبەر ل پشت خوە ڤەشێرن. ئۆجالان دبێژە ئەز پێشەنگیا کوردان دکم. ئەو ژ سالا 1979 هەتا 1999 یانی 20 سالان ل شامێ ژیا. وی ب هەزاران جوان ژ بۆ كو بمرن شاندن چیا. ژ گرتییان را د گۆت هه‌یا مرنێ ل بەر خوە بدن. لێ وی شوونا کو بچیته چیا چانتا خوە گرت دەستێ خوە و بەرێ خوە دا ئەنقەرێ. هەڤالێ وی دەما د کەتن ئاستەنگیێ خوە ئینتیحار دکرن لێ وی ئەو هەلوەست نیشان نەدا. گاڤا روو ب روویی دژمن هاتی بێ تەرەدود گۆت دایکا من ترکە ئەز خزمەتکارێ دەولەتێ مە. وی ل سەر پشتا جوانێن کوردێن کو ژ بۆ «کوردستانا سەربخوە» بێ ترس دچوون مرنێ خوە دا ژیانکرن. ژ سالا 1999 ئەڤه 25 سالن ژ ڤی گەلی رە دبێژن بلا ئۆجالان ل سەر پشتا وه بژی.
ئەڤ 25 سالن کورد ژ بۆ ئارمانجا کۆمارا دەمۆکراتیک یا کو چ بەرژەوەندییا کورد-کوردستانێ تێدا نینە تێ شوغلاندن. ژ بۆ ئازادییا وی کەسێ کو دبێژە «ئەز دخوازم خزمەتا دەولەتا خوە بکم» دمەشە. کورد د ناڤا ددانێن ڤی چەرخێ کۆرە دا تێ هێراندن. د ڤان 25 سالێن داویێ دا زێدەیی 10 هەزار کوردان ب ڤی رەنگی هاتن قەتلکرن.
ئێدی ڤێ بێواتەیێ ببینن و رانەبن. ژ بۆ چ تشتەکی کو «قبلە و ئارمانجا وێ نە «کوردستان» بیت، تلیا خوە ژی نەلڤینن. لێ ژ بۆ دۆزا کورد و کوردستانێ ئەمێ هەموو هێزا خوە سەفەربەر بکن، لێنە ژ بۆ دووڤەلانكێن داگیرکەران. له‌وما ژی ئەم دبێژینه وه رانەبن.
