تەڤگەرا “جوانێن شۆرەشگەر” یا یا سەر ب پەکەکێ ڤە زارۆکەکا 13 سالی ژ بەری 40 رۆژن ڤە ژ باژارێ قامشلۆ رەڤاند و دایکا وێ بانگا ڤەگەراندنا کەچا خوە دکە.
دایکا ب ناڤێ ئیناس عۆسمان ژ چاپەمەنیێ رە گۆت، کەچا وێ لاڤا خەلەف یا 13 سالی رۆژا 24/12/2023 ل تاخا وان ژ ئالیێ 2 جوانێن سەر ب تەڤگەرا “جوانێن شۆرەشگەر” ڤە ھاتیە رەڤاندن و ھەیا نھا ت زانیاری دەربارێ وێ تونە نە.
دایکا لاڤایێ گۆت ژی، وێ سەری ل گەلەک دەریێن رێڤەبەریا خوەسەر، ھێزێن سووریەیا دەمۆکراتیک، مافێن زارۆکان و ئالیێن دن یێن پێوەندیدار دانە، لێ ھەتا نھا چ زانیاری و ئاگاھی دەربارێ کەچا خوە دە وەرنەگرتنە.
ئیناس عۆسمان، بانگ ل ھەموو رێخستنێن مرۆڤی، یاسایی و یێن مافێن زارۆکان دکە کو کەچا وێ ڤەگەرینن مالێ.
تەڤی کو ھەسەدێ د خزیرانا 2019 دە ب نەتەوێن یەکگرتی رە پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکاران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان بداوی نەبوویە.
مالباتێن زارۆکێن رەڤاندی ژی کریارێن تەڤگەرا “جوانێن شۆرەشگەر” شەرمەزار دکن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھەسەدێ بکن تا کو چارەنڤیسا زارۆکێن وان دیار بکن.
