د ھلبژارتنێن ھەرێمی دە پارتیا دەم ھەولدا کو رۆلەکی بلەیزە و داخویانیێن خوەیێن دەستپێکێ دان خویاکرن کو دێ بریارا دەمێ د دەستێ رێڤەبەریا دەمێ دە بە. ھندەکان باوەر کر، لێ کەسێن سیاسەتا پەکەکێ دناسن باوەری ب ھندەک داخویانیێن دەمێ نەئانین. دەم پارتیێ ھەولدا کو بدە خویاکرن کو ئەو د ناڤا گوھەرتنەکی دەنە. لێ نەکارین یان ژی ئەڤ یەک نە کارێ وان بوو. ژ بەر کو ئەو راستی سەربازێن سیاسینە و ناڤەندا بریارێ قەندیلە.
کەسایەتەک وەک سەلاحەدتن دەمیرتاش ئەڤە فام نەکر و د داخویانیێن خوە دە وەرتی. د ناڤا بنگەھا دەمێ دە خوینگەرمیەکا دەمیرتاش ھەیە. لێ قەندیل ژ بۆ ڤێ یەکێ ژ ناڤ ببە چەند داخویانی دژێ دەمیرتاش دەرخستن و ئەو ب تشتێن خراب ژی تومەتبار کر.
لێ دەستھلاتداریا دەمێ یا نوو ژ بەر کو چەپ و کەمیالستن، باوەریا دەمیرتاش ل وان ھات کو ئەڤە دکارن ببن ناڤەندا بریارێ، لێ وەسا نەبوو. ژ بەری ھەرتشتەکی سیاسەتا دەمێ یا کو د ھلبژارتنێن گشتی دە بەردەوام بوو. ژ خوە بەرێ ژی رێکەفتنێن نەھینی ل گەل جەهەپێ کربوون و ئەڤ یەک چ جارا نەھات ئەشکەرەکرن. ھندەک بەرپرسێن دەمێ گەلەک داخویانی دان و گۆتن، ئێدی ب چ ئاوایی رێکەفتن و لھەڤھاتن ل گەل جەهەپی ب ڤی ئاوایی نابن. جەهەپە رەخنە کرن، لێ نەوێرن بەحسا سیاسەتا قەندیل بکن.
د ھلبژارتنان دە سەرۆکێ نوو یێ جەهەپێ دا خویاکرن کو ئەو دێ ھەرتشتی ئەشکەرە بکن، لێ ژ بلی دو سێ وێنەیێن ل گەل ھەڤسەرۆکێن دەمێ تشتەک دن ئەشکەر نەکرن. ڤێ جارێ لھەڤھاتنەک دو روو کرن. ھەتا گاڤا داوی ژی ئیحتیمالا کو دەم بەربژێرێ خوە ل ستانبۆلێ بکیشینە ھەیە. ژ خوە ئیمامۆغلو ل گەل دەنگدەرێن دەمێ لھەڤھاتنەک کریە. ل گەلەک ناڤچەیان ئەو کرنە کاندیدێن مەجلیسا شەرەداریان، ب سەدان ژ وان کرن خوەدی کار و ئەو نھا د شارەداریا ستانبۆلێ دە دخەبتن. ژ خوە ل ستانبۆلێ و گەلەک دەڤەرێن دن جەهەپە بوویە ئیمامۆغلو.
پشتی داخویانیا ئەندامێ سەرۆکاتیا پەکەکێ موستەفا کاراسو ھەرتشت د جھ دە ھاتە گوھەرتن و ئێدی دەنگ ژ دەمێ دەرنەکەت و تەنێ ئەرکا دەمێ ئەوە کو بریارێن قەندیل جێبەجێ بکن. لێ گەلەک کاندیدێن دەمێ بێدەنگ خوە ڤەکشاندن.
د ھلبژارتنێن گشتی دە ئارمانجا قەندیل ب تەنێ دژاتیا ئەردۆگان و ئاک پارتیێ بوو. د سەری دە دەمێ دا خویاکرن کو ئەو دکارن ھلگەل هەر ئالیەکی ھەڤدیتنا بکن. ئەڤ یەک وەک ئیشارەتەک بوو کو قەندیل دەست ژ سیاسەتا خوە یا ھلبژارتنێن گشتی بەردەیا. ھەتا ھەڤدیتن د ناڤبەرا ئاک پارتیێ و دەمێ دە ل سەر داخوازیا دەمێ پێکھاتن. د ڤێ دەربارێ دە سیاسەتا دەمیرتاش ل دژێ سیاسەتا قەندیل بوو. دەمیرتاش ھەلوەستا خوە دەستپێکێ دە ڤەکری ئەشکەرە کر. لێ پشتی ھشیاریا قەندیل ئەو ژی بێ دەنگ بوو.
خالەک دن ھەیە کو، دەم تایبەتی ژی قەندیل دخوازن دەولەت ل شوونا شارەدارێن وان قەیوومان تەعیین بکن. ژ بەر کو خوە ب ڤێ سیاسەتێ خوەدی دکن. بەرێ خوە بدنێ. ئەحمەد تورک بەرێ سەرۆکێ شارەداریا مێردینێ بوو. ل جهێ ئەحمەد تورک دە قەیوەم ھاتە تەعیین کرن. باشە ژ بۆ چ جاردن ب عیناد ئەحمەد تورک دکن کاندیدێ شارەداریا مێردینێ؟ گەلەک کاندیدێن دن د ھەمان رەوشێ دە نە.
ئەو رێکەفتنا نەھینی کو ناڤێ وێ کرنە رێکەفتنا باژارا گەلەکا خرابە و ژ سیاسەتەک بێ شەخسیەت ھاتیە پێش. کا دێ بنگەھێ دەمێ و تایبەتی خوینگەرمێن دەمیرتاش ڤێ یەکێ چەوا پێشوازی بکن ، رۆژا 1 نیسانێ دە دێ بێ خویاکرن.
رۆژەڤاکورد
