رێخستنا کرێگرتی یا کەجەکێ کۆمیتەیا تێکلیێن دەرڤە، د 26 شباتێ دە داخویانیەکا قووزلقورت وەشاند. د داخویانییێ دە کەجەکێ ب دلسۆزی دەولەتا ئیراقێ ھەمبێز کر، و ھەر وھا دەستنیشان کر کو ئەو دێ شەرێ ل دژی پەدەکێ ھێ ژی کوورتر بکن.
داخویانیا کۆمیتەیا تێکلیێن دەرڤە یا کەجەکێ نە تەنێ داخویانیەکا کۆمیتەیەکێ بوو، لێ کورتەیا پۆلیتیکایا رێکەفتنا کەجەکێ یا سالا 2013 ل سەر ئاژاندەیا شیعەیان بوو. د داخویانییێ دە ھات ئیدیعاکرن کو پەدەکە ژ سالێن 1970 ڤە دیرۆکا کوردان پاشڤە کشاندیە. ب ڤێ بێەخلاقییێ ژی سینۆردار نەما و ھەر وھا گۆتن کو پەدەکە ھەڤکارێ داعشێ یە و ھەول ددە ترکیێ ژی رزگار بکە. د داویێ دە وەکە ھەر جار بانگ ل پارتیێن سیاسی یێن چار پارچەیێن کوردستانێ و ب تایبەتی ژی ل باشوورێ کوردستانێ کر.
پەکەکەیا کو ھەر تم خوە دسپێرە داگیرکەران و ب پالپشتییا وان ئێرشی کوردان دکە، ڤێ جارێ پشتا خوە دا ئیراقێ و ئیدیعا کر کو پەدەکە ئیراقێ دکشینە ناڤا شەرێ ناڤخوەیی و وھا گۆت: “ژ بەر ڤێ یەکێ ئەم بانگ ل رایەدارێن دەولەتا ئیراقێ دکن هشیاری لیستکێن ژ ئالییێ پەدەکێ ڤە تێن کرن بن .”
ئێریشێن پەکەکێ لگەل بریارێن دادگەھا فەدەرالا ئیراقێ ھەڤبەشن
ئەڤ داخویانیا کەجەکێ و ب تایبەتی ژی ئێریش و نووچەیێن وێ یێن دەرەو یێن ڤێ داویێ یێن ل سەر ناڤێ پەدەکێ ل ھەرێما کوردستانێ بەرھەما سیاسەتا کەجەکێ تەنێ نینە. دەولەتا ئیران و ئیراقێ ل پشت ڤێ یەکێ نە. ئەنیا شیعەیا ل دژی کوردان، ژ بۆ ژ ھۆلێ راکرنا تاکە دەستکەفتیا رەوا و قانوونی یا کوردان ل رۆژھلاتا ناڤین، ژ سێ ئالیان ڤە دەست ب ئۆپەراسیۆنا “ئێریشا وێرانکرنا کوردستانێ” کر. یەکەم لنگێ ڤێ ئۆپەراسیۆنا ل دژی کوردان دادگەھا فەدەرالی یا ئیراقێ یە، لنگێ دویەم ژی ھێزێن حەشدا شەعبی یێن سەر ب ئیرانێ نە، لنگێ سێیەمین ژی خەتا تەسلیمیەتێ یا د ناڤا کوردان دەیە و لنگێ چارەمین ژی نوونەرێ خییانەتێ پەکەکەیە.
ھوون دخوازن ژێ رە ببێژن پەکەکە یان ژی کەجەکە، ئەڤ تەڤگەرا ئاپۆیی وەک دارەکێ د دەستێ دەولەتا ئیرانێ دەیە و ب وی داری ئێریشی رێڤەبەریا کورد یا ھەولێرێ دکە. ئەو بابەلیسکا دەرەوان یا پەکەکێ ھەری داوی ل سەر ھێزێن پاسەوانێن سینۆرێن ئیراقێ یێن ل سەر خەتا ئامێدیێ-شێلادزێ ھاتنە بجھکرن د ھێتە راکرن. د ئەساسێ خوە دە ئەڤ ئێرشا پەکەکێ بەردەوامیا بریارێن دادگەھا فەدەرالا ئیراقێ نە یێن کو د 21 شباتێ دە ل دژی ستاتویا کوردستانێ دانە. واتە ئەم دکارین ببێژین دادگەھا فەدەرالا بەغدایێ، مەلایێن شیعەیێن ل تەھرانێ و خیانەتا پەکەکێ ل ھەڤ کرنە و ئێریشی ھەولێرێ دکن. هاوکێشەیا ڤێ ئێرشێ ئەو قاس ھێسانە.
گەر ئەم بەحسا دیرۆکا خیانەتێ بکن، ئەم دکارین ژ دیرۆکا پەکەکێ یا 40 سالی دەست پێ بکن
گەر ئەم ڤەگەرن سەر داخویانیا کۆمیتەیا تێکلیێن دەرڤە یا کەجەکێ، ئەم پڕ ڤەکری دبێژن: یێن کو دیرۆکا کوردان ئەو قاس بەرەڤاژی دکە و بێەخلاقانە ئێریشی کوردان دکە، ئانکو یێ ئەڤ داخویانی نڤسی دڤێت کورد تف بکن روویێ وی.
مەسەلە چیە گەلۆ، “پەدەکێ د سالا 1975 دە “ئاش بەتالی” راگەهاند، ئەڤە خیانەت بوو.” بریارا ڤەکشینا پەدەکێ یەک ژ باشترین بریارێن دیرۆکا وێ بوو. ب پاش دە ڤەکشیا، خەلکێ خوە ژ کۆمکوژیێ رزگار کر و پشتی دەمەکێ کورت دیسا ڤەگەریا سەنگەرێن شەر. دڤیابوو پەدەکە چ بکە؛ وەکە پەکەکێ ب ھنجەتا ئینانا رێڤەبەرییێن خوەسەر 12 باژاژێن کوردستانێ ب خەندەکان وێران بکە؟ جوانێن کورد خوەندەکارێن زانینگەھێ سەر ناڤێ شەرێ خەندەکا دابان قرکرن؟ ئەڤجا گەر ھوون د وێ دیرۆکێ دە ل ئیخانەتەکێ دگەرن، نە پێدڤیە کو دوور بچن، تەنێ ل شانۆیا “شەرێ خەندەکان” بنێرن بەسە. ھوونێ روویێ خوەیێ ب خییانەتێ رەش بوویی ببینن.
یێ کو ئالایێ داگیرکەران ل سەر خاکا باشوورێ کوردستانێ دالقاندی پەکەکەیە
کۆمیتەیا پەکەکێ روویێ خوە کێم نەکر و گۆت، ” پەدەکێ داعش وەکە جیران قەبوول کر و ئێزدی ل پەی خوە ھشتن.” یا راست د شەرێ ل دژی داعشێ دە 1500 پێشمەرگە شەھید بوونە. د ناڤ وان دە گەلەک جەنەرالێن دێرین یێن پەدەکێ ھەبوون. پەدەکێ بھۆستەک ئاخا خوە ژ بۆی داعشێ نەھشت. ژ بۆ بوویەرێن ل شەنگالێ قەومین ھەموو ھێزا خوە سەفەربەر کر. ب دەھان پێشمەرگە ل سەر خەتا زومارێ ژ بۆ ڤەکرنا رێیا شەنگالێ شەھید بوون. سەرۆک بارزانی ژ بۆ رزگارکرنا ناڤەندا باژارێ شەنگالێ دەملدەست گاڤ ئاڤێت. لێ ھوون ئاپۆچی ژ سالا 2014 و ڤر ڤە وەکە مشەخۆران مانە ب ئێزدییێن شەنگالێ ڤە و خوینا وان دمێژن. ب دەرەوێن “مە ئێزدی رزگار کرن” شۆیێن سییاسی دکن. ل سەر پشتا ھندەک ئێزدییان مووچەیێن حەشدا شەعبی دستینن و ژ بۆ دەولەتا ئیراقێ جەحشاتیێ دکن. ب ئۆپەراسیۆنا کو سەرۆک بارزانی سەرکردایەتیا وێ دکر، ئالایێ داعشێ ل شەنگالێ ھات داخستن و ئەفسانەیا داعشێ ھات بداوی کرن. ل شوونا وی ئالا، وە ئالایێن حەشدا شەعبی کو ئەو ژی شێوازەکی داعشێ یە بلند کرن. ھوون پاسەوانێن دەولەتا ئیراق و ئیرانێ یێن ل شەنگالێ نە.
د ھەر رێزا داخویانییا کەجەکێ دە خیانەت و نەفرەتا ل ھەمبەری کوردان ھەیە. ھەر رێزەک دکارە بهێت بەرسڤاندن. لێ نە حەوجەیە کو دەمەکێ درێژ بکن، تێ گۆتن کو “گۆتنا مرۆڤ قودیکا مرۆڤی یە”. خودیکا پەدەکێ دە خەباتا 78 سالان یا نەتەوی ھەیە و وەکە بەرھەمێ ھەری پیرۆز ژی حکوومەتا ھەرێما کوردستانێ وەکە گەلاڤێژەکێ د برقیت، ھەیە. دەستکەفت و تەکۆشینا پەدەکێ پەیمانا لۆزانێ بنپێ کر و رووخاند. ئالایێ کوردستانێ ئیرۆ د رێزا دەولەتان دا تێ بلند کرن. ھوون ژی نانێ ڤێ تێکۆشینا پەدەکێ یا ب خوین و جان ب دەست خستیە دخون.
گەلۆ کارێ پەکەکێ چیە، پەکەکێ چ کریە؟ پەکەکێ ھەر جھێ کو چوویێ ئالایێ داگیرکەران دالقاندییە. بەلێ، پەکەکێ لنگێ خوە ئاڤێتبە کی دەرێ ئالایێ دەولەتێن داگیرکەر ژی ب خوە رە برییە. پەکەکێ ب سالان دگۆت قەندیل ھۆۆ قەندیل ئێ چ پێکر ئالایێ ئیرانێ ل گووپیتکا قەندیل دا چکلاندن و رادەستی پایگاھێن ئیرانێ کر.
وە چ ب شەنگالێ کر؟ ل شەنگالێ شەرێ پێشمەرگە دکر، لێ چوو جێشا ئیراقێ دا پەی خوە و ئانی ل شەنگالێ ب جھ کر. ئیرۆ ئالایێ حەشدا شەعبی ل شەنگالێ دھەژە.
پەکەکێ قالا ھەرێمێن پاراستنا مەدیا، کۆمارا زاپێ دکر گەلۆ تە چ لێکر؛ ھەموو رادەستی ئارتێشا ترک کر و ئیرۆ ئالا ترکا ل زاپێ د ناڤا بارەگاھێ پەکەکێ دە دھەژە. کێ ترک ئانی زاپێ تە ئانی ئەیی پەکەکە.
پەکەکە خەنجەرەک ژەھرییە د پشتا تێکۆشینا سەرخوەبوونا کوردستانێ را
یێ کو ئاخا باشوورێ کوردستانێ رادەستی سێ دەولەتێن داگیرکەر کری و ئالایێ داگیرکەران ل ور دالقاندی، پەکەکەیە. لۆما ژی ئەم دبێژین خوودیکا مرۆڤی کارێ مرۆڤییە بەرێ خوە نەدن گۆتنا. پەکەکە گۆتنێن پر خوەش دبێژە، لێ وەکی تاژی پێشەنگیا داگیرکەران دکە و وان ل کوردستانێ ب جھ دکە. پەکەکەیا کو د ناڤا 40 سالان دە ل باکورێ کوردستانێ بوویە سەدەما مرنا 40 ھەزار کەسان، ب ھەزاران گوند ڤالا کرن، یەک بھۆست ئەرد ژی رزگار نەکر، ھەموو چیا و نەوالێن باکور ژ بۆی دەولەتا ترک ھشتن، نھا ژی دخوازە باشوور ژی مینا باکور بکە. چ ئانی سەرێ کوردستانا باکوور د خوازە ھەمان تشت بینە سەرێ باشوور ژی. ئەو خەرابییێن ل کوردێن باکور کرین دخوازە بینە سەرێ کوردێن باشوور ژی. پەکەکە ژ سالا 1990 و ڤر ڤە ل کێلەکا کۆلۆنیالیستان وەکە جەحشەکی ل دژی ستاتوو و تێکۆشینا رزگاریا باشوورێ کوردستانێ شەر دکە. پەکەکە خەنجەرەکا ژەھرییە ل پشتا باشوورێ کوردستانێ ئاسێ بوویە.
پەکەکە دخوازە باشوورێ کوردستانێ پێشکێشی داگیرکەران بکە. ل پێشیا ڤێ تەنێ ئاستەنگیەک ھەیە، ئەوژی تەڤگەرا بارزانی یە. نھا سەرکردەیێن پەکەکێ جەمیل بایک، دووران کالکان، قارایلان و قاراسوو ب تێکۆشینا ل دژی تەڤگەرا بارزانی یا کو کۆلۆنیالیستان سەد سالان نەکارین وێ بقەدینن، ھەول ددن وەکە چەقەلان ژ بۆی خوە کورسیەکێ پەیدا بکن.
ببۆرن، گەلەک کەسێن وەک وە ھەول دان بزاڤا بارزانی تێک ببن لێ ئەو ھەموو کەتن تەنەکا گلێشێ دیرۆکێ دە. پێشی عۆسمانیان خوە جەرباند، پاشێ ژی ئینگلیزان خوە جەرباند؛ مەلکێ حیجازی یێ ئیراقێ فەیسەل ھەیانی دگەھە سەدام حوسێن ھەموویان خوە جەرباند لێ رێبازا بارزانی وەکە کەلھا دمدمێ بەرز و خوەراگرە. نە شێخ عەبدولسەلام، نە پێشەوا مەلا مستەفا بارزانی، نە سەرۆک بارزانی و نە ژی زارۆکێن وی خوە ژ بەر چ ھێزان ناچەمینن. ڤێ رێبازێ دیپلۆماسی کر، گەر پێدڤی بوو پاشدە ڤەکشیا و د ناڤا دیالەکتیکا تێکلی و ناکۆکیان دە تەڤگەریا. ئەو ھێزێن ئێرش کری ھەموو د گلێشێ دیرۆکێ دە نە، لێ رێبازا بارزانی ھین ژی ل سەر پیانە. ھوون ژی دێ ب قەدەرا وان دژمنێن کوردان بژین. ژ بەر کو رێبازا بارزانی تێکۆشینا رزگاریا نەتەوی یا 100 سالی یا کوردان ب خوەیە. ھەولدانێن دژی ڤێ رێبازێ، ب واتەیا ھەولدانا بداویکرنا تێکۆشینا رزگاریا نەتەوەیی یا کوردان تێ. ئەڤەیە ئەرکا پەکەکێ.
کۆمیتەیا تێکلیێن دەرڤە یا کەجەکێ ناخوازە دەست ژ ژییانا د ناڤا ڤیلایا خوە یا ل سلێمانیێ یا د بن باسکێ ئیرانێ دە بەردە. ژ بۆ ڤێ ژی ژ دژمنا زێدەتر ئێریش دکە سەر دەستکەفتێن کوردان. دڤێت کورد ل ھەمبەری ڤێ ھەلوەستا خیانەتا کەجەکێ و پەکەکێ خوەدی ھەلوەست بن و ماسکەیا خیانەتکاران بهێت دڕاندن و زارۆکێن دلدارێن ڤێ خاکا پیرۆز حەسابێ ژ خاینان بپرسن.
