هەڤسەرۆکێ کۆما جڤاکێن کوردستانێ جەمیل بایک ژ ئاژانسا پەکەکێ یا ب ناڤێ ANF رێ ئاخڤی و جارەکە دن ب حکوومەتا هەرێما کوردستانێ و بارزانیان ڤە ڤەرشا و خواست ب ئاخافتنێن خوە یێن گەنی و گەمار خیانەتا خوە و رێبەر و پارتیا خوە ڤەشێرە و وسا ب گەلێ کورد بدە فێمکرن کو ئەو کوردایەتیێ و یێن ل دژی وان ژی تەڤ جاشایەتیێ دکن.
د داخویانیا خوە دە بێی کو شەرم و فەدی بکە، بێی کو هنەکێ حوورمەتا پۆرا خوە یا سپی بگرە، وەکە کەسەکی کو گەل ب نەفام بزانە و ووسا بفکرە کو هایا گەل ژ ت تشتەکی تونەیە، ئاخڤی و وەکە دلێ وی دخواست پەیڤ دانە پال هەڤ و خوەست ب هێزا پەیڤا خیانەتا خوە یا ل کورد و کوردستانێ بدە پال پەدەکێ و بارزانیان.
جەمیل بایک پڕ ب روو قایمی گۆت، “بارزانی ب دەولەتا ترکیەیێ رە دخوازە ستاتویا باشوور ژ ھۆلێ راکە. یێ کو ستاتویێ دپارێزە پەکەکەیە. پەکەکە ژ بۆ ڤێ قوربانیان ددە. نە تەنێ ژ بۆ باشوور، ژ بۆ تەڤاھیا ئیراقێ گەلەک قوربان دا، تێکۆشیا.” ب تەنێ ئەڤ ئاخافتنا بایک بەسە کو مرۆڤ مەعدەنێ وی ناس بکە و بزانبە ئەڤ جەحشێ کورد کرێگرتیێ دەولەتێن کۆلۆنیالیستە و ت ئەلاقەیا وی ب کوردایەتیێ رە تونەیە، ژ بەر کو ئاخافتنا وی تێ وێ واتەیێ کو پەکەکێ ستاتویا هەرێما کوردستانێ ئاڤا کریە و ترکیە ب تەنێ داگیرکەرە، “سووریە، ئیراق و ئیران” نە داگیرکەرن و ت جاران زولم ل کوردان نەکریە و هەر یەک ژ وان پارچەیەک ژ خاکا پیرۆز ژ خوە رە نەبریە. بایک ژ بیر کریە کو کوردستان چار پارچەیە و د هەر پەرچەیەکێ دە داگیرکەرەک حوکم دکە، ژ بلی تاکە پەرچەیا ئازاد کو ب خوینا هەزاران پێشمەرگەیان هاتیە ئاڤاکرن.
باییک وسا دئاخڤە هەر وەک تەنێ ترکیە داگیرکەر بە و دبێژە، “مە ژ بۆنا ئیراقێ قوربانی دا”، گەلۆ ما ئیراق ژی نە داگیرکەرە؟ ما نە ئیراق بوو 188 هەزار کورد ئەنفال کرین، نە هەر ئەڤ ئیراقە بوو 5 هەزار گوندێن باشوور کاڤل کرین، نە ئەڤ ئیراقە بوو 12 هەزار کوردێن فەیلی و 8 هەزار بارزانی جینۆساید کرین؟ گەلۆ ما نە هەر ئەڤ ئیراقا کو جەمیل بایک و پارتیا وی خزمەتێ ژێ رە دکن و جوانێن کورد ژێ رە دکن قوربانی بوو کو بوویە سەدەم ب ملیۆنان کورد کۆچ بکن؟ نها ژی ب رێیێن ئابۆری دخوازە کوردان گرێدایی خوە بکە و شووناسا وان یا نەتەوی ژێ بستینە؟ لێ ژ جەمیل باییكی کو جارنا دبێژە “ب سایا سەرێ پەکەکێ یە کو سووریە ل سەر لنگا ما”، هەر ئەڤ تێ چاڤەرێکرن.
باییک د درێژاهیا ئاخافتنا خوە دە دبێژە، “نھا ل باشوور گەل برچییە، برچیبوون زێدە دبە. لێ بەلێ مالا بارزانی ژی ھەر کو دچە دەولەمەند دبە. ژ بەر کو ل ھۆلێ حکوومەتەک نینە، دەستھلاتداریەک نینە، ب تەمامی دەستھلاتداریا بارزانییە. ب دلێ خوە ب کێفا خوە چ دخوازن وە دکن. ل ھۆلێ نە قانوون، حقووق، عەدالەت نینە. ب دلێ خوە چ دخوازن وێ دکن، پێک تینن. ژ بۆ چ دبێژن بلا ھلبژارتن تالۆق ببن. ئەگەر راستە ڤانا ژ بۆ کوردیتیێ تێکۆشینێ دکن، ژ بۆ گەلێ باشوور تێکۆشینێ دکن، ئەگەر دەمۆکراتن، ئازادیخوازن وێ دەمێ چما تالۆق دکن، ژ چ دترسن؟ دیارە ترسا خوە ھەنە. تشتێ ڤەشارتی ھەنە.” ل ڤڕ ئەم ژ جەمیل بایک رە دبێژن گەلێ باشوور چقاس برچی بە ژی ناگهە گەلێ رۆژئاڤا کو د بن دەستهلاتداریا تە و پارتیا تە دە نها د دژوارترین رەوش دە ژیان دکن، پرسگرێکێن ئابۆری یێن ل باشوورێ وەلات هەیی یەک ژێ ب سەدەما هەڤالبەندێن وە یێن ل بەغدایێ و سەدەمەک دن ژی هوون ب خوە نە، ژ ئالیەکێ هەڤالبەندێن وە دوورپێچا ئابۆری خستیە سەر فەرمانبەرێن کوردستانێ و مووچە و بودجەیێ کو مافێ گەلێ باشوورە قوت کرینە، ژ ئالیەکی دن ژی وە شەرێ خوە یێ سەختە یێ لگەل ترکیێ ئانیە د ناڤا ئاخا باشوور دە و هوون رێ نادن خەلکێ ل گوندێن سینۆری دژین ب رێیا چاندنێ، حەیوانداریێ و گەشت و گوزارێ دەبارا ژیانا خوە بکن، بەلێ، هوون و هەڤالبەندێن وە سەدەمێن سەرەکی نە ژ بۆی رەوشا گەلێ باشوور.
بەلێ ب راستی ژی پەدەکە و بارزانی ژ بۆی کوردیتیێ دخوان “هلبژارتن تالۆق” ببن، ژ بەر کو پەدەکە باش دزانە هوون و هەڤالبەندێن وە چ دخوازن و هایا پەدەکێ ژێ هەیە کو هەڤالبەندێن وە پێش وەخت هەر تشت حازر کریە و دخوازن چ بکن، ترسا پەدەکێ ب تەنێ ستاتویا فەرمی یا هەرێما کوردستانێ یە نە چ تشتەکی دن، سەدەما کو هوون و هەڤالبەندێن خوە ب یەک ئاوا ئێریشی پەدەکێ و بارزانیان دکن ب تەنێ یەک تشتە ئەو ژی ئەڤە کو هوون دزانن کەڤنەشۆپیا سیاسی یا بارزان یا ب ناڤێ رێبازا بارزانی تێ ناسکرن، ب راستی ژی بنیاتێ باشوورێ کوردستانێ یە. بزاڤا سیاسی یا بارزانی سیستەمەکە کو نە تەنێ د ناڤبەرا عەشیرێن خوە دە، لێ ب ھەموو ناسنامەیێن جڤاکا کوردستانێ رە، تفاق و چاندا پێکڤەژیانێ ئاڤا دکە. ژ بەر ڤێ ھێزا خوە، ب ئاوایەکی کاریبوو ھەموو حکوومەتێن ئیراقێ بینە سەر میزێ و بوو ستوونا سیستەما دەستھلاتا کوردستانێ. ژ بەر ڤێ ئافرینەرییا خوە ھەر تم دبە ئارمانجا دژمنا. ھەر ھێزەک کو ل ئیراقێ بوویە دەستھلات، یەکەمجار ئێرشی بارزانییان دکە دا کو کوردستانێ وەکی کو ئەو دخوازن ئیستسمار بکن، د نها دە ژی نە ب تەنێ یێن ل ئیراقێ بوویی دەستهلاتدار بەلکو تەڤ دژمنێن کوردان ئێریشی بارزانیان دکن داکو وەکە ئەو دخوازن کوردستانێ ئیستیسمار بکن.
ژ کەرەما خوە یا نەیی ژ مە رە ببێژە وە ب چ ئاوا باشوور پاراستیە؟ گەلۆ ب راستی ژی هوون خەلکێ ب نەفام دزانن؟ گەلۆ هوون کو هەیا نها نەکارینە بۆستەکێ ژ خاکا باکور بپارێزن، دێ چەوا باشوور بپارێزن؟ وە تەڤ باکورێ کوردستانێ، هەرێمێن کو ئەو 30 سال بوون هوون تێ دە دەسهلاتدار نەپاراستن و وە تەسلیمی ترکیێ کرن، دیسا هاتن و تەڤ ناڤچەیێن سینۆری یێن ب باکورێ کوردستانێ رە وە تەسلیمی ترکیێ کرن، هێژان باس ل پاراستنا باشوور دکن؟ ئەی هاوار هوون چەند روو قاییم و بێ ئەدەبن؟ بەسە و دەڤ ژ ڤان دەرەوان بەردن، بەسە و دەڤ ژ خیانەت و جاشایەتیا ژ ڤۆی دەولەتێن داگیرکەر بەردن، وە مالا کوردان خەراب کر.
تشتا هەری سەیر د ئاخافتنا باییک دە ئەڤ بوو دەما گۆتی، “یێ کو ل ئازادیا رێبەر ئاپۆ خوەدی دەرناکەڤە و ل دژی دەولەتا ترکیەیێ ناسەکنە نابە ولاتپارێز”، نااا جەمیل ناااا، ولاتپارێزی نە ئەوە کو ل ئازادیا کەسەکی خوەدی دەرکەڤی کە ب دەڤێ خوە گۆتیە “دایکا من ترکە، دەرفەتێ ب من بدن ئەزێ خزمەتا دەولەتا خوە بکم” یێ گۆتی، “رێ ب من بدن ئەز هەولێرێ تەسیمی وە بکم، بارزانی دخوازە دەولەتەکە کوردی ئاڤا بکە، ئەمێ ب هەڤرە پێشی لێ بگرن”، “ئەم دەولەتەکە کوردی ناخوازن” و هتد… نابە کەسەکی ولاتپارێز ل ئازادیا کەسەکی ب ڤی ئاوا خوەدی دەرکەڤە، داخوازا ئازادیێ ژ کەسەکی ب ڤی ئاوا رە نە ب تەنێ ولاتپارێزی نینە، بەلکو جاشاتی و خیانەتا هەری مەزنە.
بەلێ، “وەلاتپارێزی ل دژی داگیرکەریێ، ل دژی سیاسەتا وان، ل دژی کریارێن وان، ل دژی خیانەتێ راوەستینە” لێ یێ نها ل ئیمرالیێ دژیت، نە ل دژی داگیرکەران راوەستیایە، نە ل دژی سیاسەتا وان و نە ژی ل دژی کریارێن وان راوەستیایە”، خاین و ولاتفرۆشێ هەری مەزن تو و ئۆجالان ب خوە نە، نە کەسەک دن.
