پەردا چاڤێن وان پەقییایە!
سمکۆ عەبدولعەزیز
د کوردەواریێ دە گۆتنەک پر بالکێش هەیە دەما دبێژن، (پەردا جاڤێن وی پەقییایە)، ئەڤ گۆتن دەربارا وی کەسی تێ گۆتن کو رەفتار یان کارەکی دکە کو دوور بە ژ تەڤ رەفتار و تیتالێن جڤاکێ، پەکەکە و سەرۆکێ وێ ژی ب ڤی ئاوانە، پەردا چاڤێن وان پەقییایە، بیردانکا وان مینا بیردانکا ماسیێ یە، دەما مرۆڤ دیرۆکا وان و رەفتارا وان لەکۆلین دکە دگەهە وێ باوەریێ کو گۆتن و کریارێن وان ت جاران وەک یەک نینە، بەلکو رۆژانە تێن گوهەرتن، ئەو مینا گیاندارێ ب ناڤێ Chameleon “حربا”ئن کو رەنگێ خوە ل گۆر سرووشتێ دگوهەرینن، یەک مرۆڤ یانژی گرۆپەک مرۆڤان دکارن خوە وەک تاکتیک بگوهەرن، لێ پەکەکێ پرانیا جاران ستراتەژیا خوە گوهەریە، ئەڤ گوهەرینا د ستراتەژییا وان دە ژی ئیسپات دکە کو ئارمانجەک شاش هەیە.
ئەمێ ڤەگەرن سالێن حەفتیان و پێش وێ یەکێ کو پەکەکە وەک پارتیەک خوە بگوهەرینە کا چ کۆمکوژی دەرحەق پارتیێن مینا وان هزر نەدکرن و سەنگا خوە هەیی، ئەنجامداینە:
گرۆپا ئۆجالان بەرا کو کۆنگرەیا خوە ساز بکە و دامەزراندنا خوە وەکە پارتی راگهینە ئێریشی چەندین گرۆپ رێخستنێن کوردستانا باکور وەکە، گرۆپا “ستێرکا سۆر” دکە، د شەرێ ل دژی ستێرکا سۆر دە ل رۆژا 18/5/1977ێ حەقی قەرار جانێ خوە ژ دەست دا، د ڤێ ئێریشێ دە هەر یەک عەلائەدین کاپلان سەرۆکێ ستێرکا سۆر و هەژمارەک دن ژ کدارۆیێن ڤێ پارتیێ کوشتن، کەسێن نێزی ئۆجالان ب خوە هن جاران تەکەز کرینە کو حەقی قەرار ب بریارا ئۆجالان و ب دەستێن رێهەڤالێن خوە هاتیە کوشتن، ئانکو کوشتنا حەقی قەرار یەکەم بریارا تاسفیەکرنا وان کەسان بوو یێن کو مینا ئۆجالان نافکرن، تشتا هەری ئەجێب ژی ئەڤە کو پەکەکێ رۆژا کوشتنا حەقی قەرار وەک رۆژا شەهیدێن پەکەکێ راگهاندیە.
هەر د وێ سالێ دە گرۆپا ئۆجالان ل دژی رێخستنا رزگاریا گەل K.Hێ ئێریش کر و پرانیا ئەندامێن ڤێ رێخستنێ کوشتن.
هەر وەها ل داویا سالا 1978ێ دە پەکەکێ ئێریشی KUKێ تەڤگەرا رزگاریا کوردستانێ کر و هەژمارەک هەری زێدە ژ کادرۆیێن ڤێ تەڤگەرێ کوشتن.
د سالا 1978ێ گرۆپەک مارکسی ب ناڤێ تەکۆشین ل ناڤچەیا عەنتابێ هات دامەزراندن، ئۆجالان داخوازێ ژ وان دکە کو تەڤلی گرۆپا وی ببن، لێ بەلێ ئەندامێن ڤێ رێخستنێ رازی نابن، د ئەنجام دە گرۆپا ئۆجالان ئێریشی وان دکە و هەموویان دکوژن.
پشتی ب داوی ئانینا ڤان گرۆپ و رێخستنان پەکەکە ل دژی عەشیرێن کوردان تەڤگەریا، ژ بۆی ڤێ یەکێ کو ترس و خوفێ د دلێ گەل دە دروست بکە فەرمانا تەرۆرکرنا سلێمان بەگ سەرۆکێ عەشیرا سلێمانان دا، د رۆژا رون دە پەکەکێ سلێمان بەگ ل گوندێ حیلوان تەرۆر کر.
هەر وەها پشتی پەکەکێ یەکەم کۆنگرەیا خوە د 27/11/1978 دە ئەنجام دایی، د یەکەم پێنگاڤا خوە دە بریار ستەند “محەمەد جەلال بوجاق” سەرۆکێ عەشیرەتا سیڤرەک بکوژە و ب کوشتنا وی دامزراندنا خوە راگهینە. پەکەکێ پشتی جیبجیکرنا ڤێ بریارا خوە، ب بریندارکرنا محەمەد جەلال بوجاق سەرۆکێ عەشیرا سیڤرەک و کوشتنا هەژمارەک ژ رێهەڤالێن وی پارتی بوونا خوە راگهاند.
د 30/7/1979ان دە پەکەکێ ب ئاوایەکی فەرمی دامەزراندنا خوە وه‌ك پارتیەکە سیاسی راگهاند، د به‌یانناما راگه‌هاندا ڤێ پارتیێ دە ب بێ شه‌رمانه ئه‌ڤ خاله هاتن دیار كرن كو ب ت ئاوا ئه‌ڤ رێخستنێن سیاسی یێن كوردى نابە د قادا سیاسی دە بمینن:
بیرویا كه‌لتوریا روژهه‌لات
پارتیا رزگاریا گه‌لان
رێكخراوا كاوه
چما من ئەڤ کورتەیا دیرۆکا پەکەکێ یا پێش دامەزراندنا وێ بەرچاڤ کر؟ بەرسڤ د ڤان خالێن ل خوارێ دە دیار دبە:
ب کوشتنا وەلاتپارێزەکی وەک محەمەد جەلال بۆجاق پەکەکێ دامەزراندنا خوە راگهاند، ئانکو پەکەکە ژ بۆی نەهشتنا وەلاتپارێزان هاتیە دامەزراندن.
پەکەکێ رۆژا کۆشتنا حەقی قەرار وەک رۆژا شەهیدێن خوە راگهاندیە، یانی پێویستە ببێژین کو پەکەکە پارتیەکە نەتەوی نینە ژ بەر کو حەقی قەرار یەکەم کورد نەبوویە بەلکو لاز بوویە هاتیە کوشتن، حەقی قەرارا کەسەکی نەتەوی نەبوویە بەلکو کەسەکی چەپ بوویە.
پەکەکە ژ بۆی نەهشتنا پارتیێن دژبەرێن دەولەتا ترک هاتیە دامەزراندن، ژ بەر کو عەڤدللا ب خوە د پرتووکا خوە یا ب ناڤێ “پرسا کەسایەتیێ ل کوردستانێ” دە دبێژە، “من باوەری ب کورد و کوردستانێ نینە، من باوەری ب سۆسیالیزما کوردستانێ هەیە.”
