تێگهیشتنا سەرۆک بارزانی تێ واتەیا بالکشاندنا سەر سەرخوەبوونێ!
هن تایبەتمەندی هەنە کو سەرۆک بارزانی ژ سەرۆکێن سیاسی ب گشتی جودا دکە. د ناڤ ڤان تایبەتمەندیان دا؛ نەفسبچووکیا وی، د تێکلیان دا ئاڤاکەر، لێ د پرەنسیبێن خوە دە پڕ هشک، کێم ئاخڤتن، ژ بوویەران پێتر ل سەر دیاردەیان رادوەستە، دەما کو دخوه‌ست قالا بوویەران بكه، نەدچوو د ناڤ هوورگلیان ده، تەنێ د چارچۆڤەیەکێ گشتی دە دئاخڤی، ژ ئەکرانان و میکرۆفۆنان حەز ناکە و ناسنامەیا پێشمەرگە ژ هەموو پلە و پۆست و سیفەتان «ژ سەرۆکاتیێ ژی» بلندتر دبینە.
سەرۆک بارزانی ل سەر دەولەتبوونا کوردان ژی گۆت؛ ئەو ب بەردەوامی ل شوونا نێزیکاتیێن پراگماتیک و ده‌مكی زێدەتر بەحسا مافێن کوردان یێن خوەزایی دکە، ژ سیاسەتمەدارێن کلاسیک زێدەتر خوەدی پرۆفایلەک تایبەتە. بارزانی ل سەر مافێن خوەزایی نیقاشێن دەستهلاتداران و هەموو بەشێن جڤاکی یێن ل دژی دەولەتبوونا کوردان رەد دکە.
ژ بەر کو
ا- مافێن خوەزایی؛ خوەدی کووراهییەک فەلسەفی، دیرۆکی و گەردوونیبوونەکە کو ژ 2000 سالان زێدەتر د دیرۆکا فکری دە ژ هێلا فەیلەسۆفان ڤە هاتییە ئیفادە کرن؛ لۆما ژی کەسێن کو خوە وەک رەوشەنبیر/مۆدەرن نیشان ددن، نکارن تشتەکی جودا ببێژن.
ب- مافێن خوەزایی؛ ژ ئالیێ گەلەک فەیلەسۆفێن ئیدیالیست ڤە وەکی «مافێن ئیلاهی» هاتیە شیرۆڤەکرن و ئەڤ راستیا کو هەر کەس ژ زایینا خوە ڤە خوەدی هەمان مافانە، وەکی تەئمیناتا ئۆلی/ئیلاهی هاتیە نرخاندن؛ سەختەکارێن کو ژ بۆ نەدەولەتبوونا کوردان «فەتوایا ئۆلی» ب کار تینن، ئۆلێ وەک ئاموورێ سیاسەتێ «ب تایبەتی کرێگرتییێن دەولەتێن داگیرکەر» ئیستیسمار دکن.
ج- مافێن خوەزایی؛ مافێن مرۆڤی یێن شارستانیا ئەورۆپا/رۆژئاڤا، کو د جارنامه‌یا گەردوونی یا مافێن مرۆڤان ده هاتنه، چاڤکانیا خوە ژ مافێن خوەزایی وه‌ردگرە و د وارێ وەکهەڤی-ئازادی و دەمۆکراسیێ دە هەتا رادەیا کو دگه‌ل مافێن خوەزایی ل هەڤ دکە، دکارە مرۆڤی قانع بکە؛ یێن کو بەحسا دەمۆکراسی/ئازادی/وەکهەڤیێ دکن، ل دژی «مافێ دەولەتبوونا کوردان» تشتەکی کو ببێژن نەمایە!…
سەرۆک بارزانی باش دزانە کو گۆتنێن وی دێ بەر ب کو ڤە بچن و چ د ناڤا خوە هه‌لدگرن،. نەبوونا پارتیەکێ (په‌ده‌كه ژی د ناڤ دە) و چاپەمەنی (ب تایبەتی چاپەمەنیا باشوور) کو ژ ڤان گۆتن و فکرێن کوور تێناگه‌هه و بەلاڤناكه، ژ بۆ کوردان کێماسیەکا مەزنە. ژ بلی کێماسیا کەسێن کو ئیدیعایا «رەوشەنبیری/نڤیسکاریێ» دکن، پۆپولیست و ترسنۆک پتر هه‌ست ب ڤێ کێماسیا خوە دکن. ئەڤ کێماسی دبە سەدەما پرسگرێکەک جدی ژ بەر کو کووراهیا رەوشەنبیریا بارزانی و پەیامێن کو ددە تێر و تژی نا گه‌هن گەلێ کورد.
وەکە کو ل سه‌ری ژی هاتیه گۆتن، بارزانی زێدە قالا بوویەرێن رۆژانە ناکە؛ دەما کو به‌حسا وان ژی دکە، ب پێویستی نابینە کو بکەڤە ناڤ هوورگلیان دا. ژ بەر ڤێ سەدەمێ، تشتێن کو ئەو دبێژه دبە کو ببن سەدەما شیرۆڤەیێن جودا. لێ بەلێ گەر هەلوه‌ست، تێگهیشتن، فکر و ئیرادەیا بارزانی یا ل سەر مافێ دەولەتبوونێ یێ گشتی ل بەر چاڤان بێ گرتن، تێ دیتن کو ئەو پەیامێن پر زەلال و بێی ناکۆک پێشکێش دکە و ژ ئالیێ هەر کەسی ڤە تێن فێهمکرن.
جوداهییا د ناڤبەرا روحا سەرۆک بارزانی و چاپەمەنیا باشوور دە
ب تایبەتی ژی چاپەمەنیا نڤیسکی دەما کو داخویانی/ئاخفتنەکێ دوەشینە، خالێن کو گرنگ دبینە ددانیته بەر چاڤان و بەشا هەری گرنگ یا گۆتنێ دكه مانشێت. د ڤێ ره‌وشێ دە هەر گۆتارەکا نڤیسکی ژی شرۆڤەیەکە. ژ ئالیێ سازیێن چاپەمەنیێ یێن جودا ڤە هەمان نووچە د بن سەرناڤێن جودا دە تێن راگهاندن. وێنەیێن جودا تێن بکارئانین و هن بەشێن کو هەر یەک هەوجەداریا نڤیساندنێ پێ نابینە. د بن ڤێ مژارێ دە و د بن ناڤێ «پیشەیی بوونێ» دە هەلوەستەکا هەڤپار-هەڤگر چێنابە. هەر سازییەکا مەدیایێ شرۆڤەیا خوە ل سه‌ر داخویانی/نووچەیێن کو دوەشینە دکە و ژ بۆ تێگهیشتنا داخویانی/نووچەیان ل گۆری فکرا خوە هەولەکا تایبەت ددە.
مەدیایا باشوور، کو جەوهەرێ گۆتنێن سەرۆک بارزانی «ل سەر هندەک مژاران، ب تایبەتی ژی د دەربارێ په‌كه‌كێ دە) نیشان نادە، یان ژ بەر بێهێزیا خوە یان ژی ژ بەر سەدەمێن ب تەمامی جودا (ب نییەتا خراب) ڤێ یەکێ دکە.
هەکە ئەم ل سەر ڤێ مژارێ دو میناکێن بالکێش بدن!
یەکەم؛ داخویانیا سەرۆک بارزانی د دویەمین سالڤەگەرا ئێریشا بەربەرێن داعشێ ل سەر شنگالێ دە!
د ڤێ داخویانیێ دە بارزانی گۆت، «هەتا کو هێزێن پێشمەرگە نەهاتن و رێیا شەنگالێ ڤەنەکرن، هیچ کەسەک ل قادا شەری نەبوو. هوون هەتا وێ رۆژێ ل کو بوون؟ گەلێ شەنگالێ باش دزانە شەنگال چاوا و ژ ئالیێ کێ ڤە هاتیە رزگار کرن. «ئەم رێ ناده‌ینه خائینان کو ژ پاش ڤە خەنجەرێ ل پشتا مە بده‌ن».
هەر کەسه‌كی دزانی (ئەحمەق ژی د ناڤ دە) کو سەرۆک ڤان گۆتنان راستەراست ژ بۆ په‌كه‌كێ دکە. ناڤ ناڤنه‌كرنا وان ژ ئالیێ بارزانی ڤه، وان نەپەنی ناکە؛ بەرۆڤاژی ڤێ تشتێ دهات گۆتن ئه‌ڤه بوو: «په‌كه‌كە ئەز دبێژمه‌ته».
مەدیایا په‌كه‌كێ 2 سالان پرۆپاگاندایا «پێشمەرگە رەڤیان، مە ب 7 کەسان ڤە شەنگال رزگار کر، پێشمەرگەیان کوردێن ئێزدی فرۆتن» دکر و هێژ ژی بەردەوامە. ژ بلی ڤێ، به‌لكو زێده‌تر ئه‌و هنده گەمار بوون دکارین ببێژن «پێشمەرگە سەران ژێ دکه و ده‌ستدرێژیێ دکە». د ڤان ئێریشێن په‌كه‌كێ یێن بێ ئەخلاق دە مەدیایا نەوێرەک یا باکور و مەدیایا باشوور ب دره‌وێن وەک «گەریلا و پێشمەرگە مل ب ملێ هەڤ شەر دکن، یەکینەیا په‌كه‌كێ چوو ئالیکاریا پێشمەرگەیان» ب ڤان نووچەیان رۆلەکە قرێژ دگێران.
گۆتارا بارزانی ژ بۆ ڤان هەموو دره‌و/ئیفترا و بوختانان بەرسڤەک کورت و پڕ زەلال بوو! بارزانی د داخویانیا خوە دە گۆت کو په‌كه‌كه دره‌وینە و دەزگەهەکێ خائینە کو هەول ددە خەنجەرێ ل پشتا کوردان بدە.
د ڤێ داخویانیێ دە بەشا هەره بالکێش ئه‌و پەیاما زه‌لال بوو یاكو بارزانی دابوو په‌كه‌كێ. لێ مەدیایا باشوور خالێن د ڤێ گۆتارێ دا ب تەمامی جودا دەرێخستن هۆلێ پەیاما کو بۆ په‌كه‌كێ هاتیە دان، بەرۆڤاژی کرن. هەر وها رۆژەکێ پشتی ڤێ داخویانیا سەرۆک بارزانی، تەلەڤیزیۆنا هەری مەزن یا باشوور ب فەرمی هەول دا کو گۆتنێن بارزانی ب ئاخفتنا ئەندامەکێ په‌كه‌كێ ل شەنگالێ پووچ بکە. ئەو ئەندامێ په‌كه‌كێ یێ کو ئاخڤی، تام بەرۆڤاژییا گۆتنێن بارزانی ئیدیعا کر. مرۆڤ نكاره ڤێ هەلوەستا ڤێ تەلەڤیزیۆنێ وەکە “بێتەجروبەیی” بحەسبینە.
بێ گومان دڤێت بارزانی نەبیتە موخاته‌بێ دره‌و/حەقارەت و روورەشیێن په‌كه‌كێ یێن سیستەماتیک و بەرسڤا هەر گۆتنەکا وان نەدە. یا هەره گونجای کو ئەو دەم ب دەم ب گشتی ببێژە «هوون ئەڤن». لێ دڤیابوو د ڤێ نوقتەیێ دە پارتی، خوەندەڤان و چاپەمەنیێن کورد ب ئەرکا خوە راببان و دره‌وێن په‌كه‌كێ ڤالا دەرخستبان. مخابن د ڤێ نوقتەیێ دە هێژ ژی مرۆڤ نکارە به‌حسا رۆلا ئەرێنی یا چاپەمەنی، نڤیسکار و پارتیێن سیاسی یێن باشوور «ب گشتی» بکە.
دویەم؛ ل سەر پرسا «گەلۆ ئەمەریکا کوردان بکار تینە؟» سەرۆک بارزانی گۆت ئەڤه پر خەلەتە. ئەمەریکا کوردان ب کار نائینە. ئەم ژ بۆ خوە شەری دکن، نە ژ بۆ ئەمەریکا. لێ د بەردەوامییا ئاخڤتنا خوە دە گۆت «ئەم سپاسیا ئەمەریکا و هەموو وەلاتێن کو ئالیکاری دانە مه دکن.» بێ گومان، ئەڤ بەرسڤ بەرسڤا هەری زەلال بوو؛ هه‌روه‌ها دره‌و و پرۆپاگاندایا هێزێن دەستهلاتدار و تاشەرۆنێن وان ره‌دكرن ده‌ما دگۆتین «کورد ژ بۆ ئەمەریکایێ شەری دکن».
د خالا هەره گرنگ یا د داخویانیێ دە پرس و بەرسڤا دەربارێ رەقایێ بوو. لێ مخابن مەدیایا کوردی ل سەر ڤێ مژارا گرنگ رانەوەستیا. هندەکان هەول دان کو نووچەیێ بێهێز بکن، له‌وما ژی وەک نووچەکی ناڤین د ناڤا بوولتەنێ دە دانان. هنده‌كێن دی ژی ب هەوجەداری نه‌دیتن كو هه‌ر ڤێ نووچەیێ به‌لاڤ بكه‌ن.
بێ شک پرسا رەقا ژی راستەراست ب په‌كه‌كێ-په‌یه‌دێ ڤه گرێدایی بوو کو ئه‌و هێزا سەردەست بوو ل باشوورێ رۆژئاڤایێ کوردستانێ «رۆژئاڤا». سەرۆک بارزانی گۆت، مه ئاگه‌هـ ژ پرسا رەقایێ نینە. د دەربارێ ئەنیا سووریێ دە مه چ ئاگاهی نینن. گۆتنا سەرۆکی «جهـ و ئەنیەکا دنە» ئه‌ڤه بەشا هەره گرنگ یا داخویانیێ بوو. ژ بەر کو ب سالانە مەدیایا کوردی «د هەمان دەمی دە مەدیایا باشوور» ب ئاوایەکی سیستەماتیک بوویەرێن ل باشوورێ رۆژئاڤایێ کوردستانێ دشۆپینە و ب ئیسرار په‌كه‌كێ – په‌یه‌دێ وەک «هێزێن کوردی» پێناسە دکە. د شانۆیا «کانتۆنان» دا یا کو هاتیە راگهاندن تشتەکی نەتەوی ل سەر کورد/کوردستانێ نینە؛ هه‌ر چه‌نده کو دهات دیتن «فەدەراسیۆنا باکورێ سووریێ» یا کو هاتیە راگهاندن نه‌تەنێ گرێدای مافێن نەتەوی یێن کوردان بوو، هەروه‌ها پێناسەیا «باکورێ سووریەیێ» ب تایبەتی ژ بۆ کو ب ناڤێ نەتەوە نەیێ پێناسەکرن، کرن «باکورێ رۆژئاڤایێ سووریێ». ژ به‌ر كو رۆژئاڤایێ کوردستانێ نەخوەدی کاراکتەرەکی نەتەوەی بوو، مەدیایا باشوور کانتۆن ب سازیەک نەتەوەیی و فەدەراسیۆنا باکورێ سووریێ ژی وەک فەدەراسیۆنەکا نەتەوەیی راگهاندن، ئەڤ یەک پڕ سەرنجراکێشە.
گەلەک دەزگەهێن راگهاندنێ دەما به‌حسا فەدەراسیۆنا باکورێ سووریێ دکن ب زانەبوون گۆتنا «فەدەراسیۆنا رۆژئاڤا» بکار تینن. و د گەلەک نرخاندنان دە ئاخافتنێن کو به‌حسا کوردستانا مەزن دکن، وەک «ڤەبوونا کوردان بەر ب بهارا سپی» ڤە ناڤ دكرن، مه‌دیایا باشوور ب زانه‌بوون ڤێ دكه وه‌ك هه‌ولدانه‌كێ ژ بۆ ره‌واكرنا په‌كه‌كێ-په‌یه‌دێ یا کو وەک کرێگرتیێن رژێما ئەسەد خزمەتێ دکن، ئه‌ڤ هه‌ولێن ره‌واكرنێ بێ گومان ل سەر كیستێ نەتەوەیی هاتن کرن.
ل باشوورێ رۆژئاڤایێ کوردستانێ زلم و زۆردارییا فاشیستا په‌كه‌كێ-په‌یه‌دێ یا ل دژی کوردێن نەتەوپەرەست هێژ ژی ددۆمە؛ د پارتیا (په‌یه‌دێ) و هێزا لەشکەری (یه‌په‌گێ) دە ژی پەیڤا کورد/کوردستان نایێ گۆتن؛ دەما کو یه‌په‌گه بوویە پێکهاتەیەک/بەشەک ژ هێزێن سووریەیا دەمۆکراتیک، د مەدیایا په‌كه‌كێ دە ل گەل هەموو پێکهاتەیان وەک «هێزێن شۆرەشگەر» تێ بناڤکرن؛ د مەدیایا کوردی دە ب گشتی و مەدیایا باشوور ب تایبەتی، ب ئیسرار ژێرە دبێژن «هێزێن کوردی» ئەڤ پێناسە نایێ فێمکرن و قەبوول کرن!
یەکسەر پشتی کو سەرۆک بارزانی گۆت، ئەم ژ بۆ خوە شەر دکن، گۆت، هایا مە ژ پرسا رەقایێ نینە. د دەربارێ ئەنیا سووریێ دە چ نووچەیەک مە نینە، جهـ و ئەنییەک جودایە… ئاخڤتنەک پڕ واتەدار بوو. بارزانی: ئەم ژ بۆ خوە شەر دکن لێ ب ئاوایەکی نەراستەراست گۆت کو په‌كه‌كه-په‌یه‌دە ژ بۆ کوردان شەری ناکە. بێ شک ئەڤ نرخاندنە تەنێ په‌كه‌كێ -په‌یه‌دێ راست پێناسە دكه، د هەمان دەمێ دە ژ بۆ بەرسڤدانا هن پرسێن د سەرێ گەل دە ژی بوو بەرسڤ. لێ مەدیایێ گوهـ نەدا ڤێ نووچەیێ؛ ژ بەر کو ئەڤ نرخاندنەک بوو کو پرۆپاگاندایا وان ب سالان دکرن پووچ کر…
ئەم د زانین کو مەدیایا سلێمانیێ ناخوازە بارزانی «هەروەها رێیا وی یا سەرخوەبوونێ» فه‌هم بکە و ب زانەبوون ئاخڤتنان بەرۆڤاژی دکە. مەدیایا ل باکور ژی سەدەمێن خوە هەنە «ترس، هێڤیا بدەستخستنا رانتێ ژ په‌كه‌كێ-هه‌ده‌پێ و هود.» هەر چەنده ئەڤ هەول دژمنی ژی بە…
لێ بەلێ، راڤەیەکە مانتقی تونەیە کو چما مەدیایا کورد ل باشوور، ب تایبەتی مەدیایا نێزیکی په‌ده‌كێ – بارزانی (ژ بلی وێ ژی، مەدیایا کو ژ ئالیێ وان ڤە هاتیە ئاڤاکرن و فینانسەکرن)، ناخوازن بارزانی فه‌هم بکن و هەولدانەکا تایبەت ژی ناده‌ن د ئاخفتنێن جەنابێ وی بگه‌هن. چ هنجەت بوو ڤێ یەکێ نینە و نابە. یا هەره باش ئەم دکارن ڤێ سەکنا مەدیایا باشوورێ ب ئاپۆئیزما کرپتۆ (كه‌سێن كو بیروباوه‌رێن خوه نیشان ناده‌ن) راڤەبکن ! گەر نەووسا بە، ب روحا بشافتی یا په‌كه‌كێ هەول نەددان کو سیبەرێ ل سەر روحا سەرخوەبوونێ یا بارزانی چێبکن.
په‌كه‌كێ کو باکور وێران کر و دینامیکێن نەتەوی هەموو تێک برن، هەتا نها ل باشوورێ رۆژئاڤایێ کوردستانێ ب ئاوایەکی ئەشکەرە رێ ل بەر دەستکەفتیێن نەتەوی یێن کورد گرتیە. راست پێناسەکرن و شەرمەزارکرنا په‌كه‌كێ کو هەموو هێزا خوە ژ بۆ کو نەهێلە باشوور ببە دەولەت خەرج دکە، ژ بۆ دەرباسکرنا ئاستەنگیا هەره گرنگ یا ل سەر رێیا سەرخوەبوونا کوردستانێ یە.
د ئەنجام دە؛
روحا سەرخوەبوونێ یا سەرۆک بارزانی د مەدیایا باشوور دە ب زانەبوون نایێ نیشاندان! هەروه‌ها هەول تێ داین کو ئەڤ روحا سه‌رخوه‌بوونخواز د بن سیا بێروحییا په‌كه‌كێ دە بمینە.
رێڤەبه‌رییا باشوورێ کوردستانێ دەما کو مەدیایا خوە بەر ب خەتەکا نەتەوەیی ڤە بکشینە و روحا سەرخوەبوونێ سەردەست بکە، دێ رێیا سەرخوەبوونێ ڤەوژێرە و به‌رفرەهـ بکە. ئەم هێڤیدارین کو ئەو رێیەکێ ببینن کو ژ ڤێ پرسگرێکا ناڤخوەیی دەرباس ببن و روحا کوردایەتیێ ڤەگەرینن…
سولەیمان ئاککۆیون
