ژ شەوتاندنا دکان و بازاران بگرە هەتا نەتەوەپەرەستی و دەمۆکراسیێ
![PKK-KCK-şewitandina dikan û bazaran -Net](https://darkamazi.net/file/2024/07/PKK-KCK-sewitandina-dikan-u-bazaran-Net.jpg)
رێبهرتییا رەڤیایی یا پهكهكێ یا کو ناڤێ كهجهكێ ل خوه كری، گەر د ناڤا پهكهكێ دا تشتەک ب ناڤێ «رێبەرتیێ» ههبیت، یان ژی جهسارهت ههبیت خوە ب «رێبەرتیێ» ب ناڤ بکەت، ژ بەر کو د ناڤا پهكهكێ دا «رێبەرتی» دهێته واتەیا؛ سەرۆکاتی، سەرۆک ژی تەنێ ئۆجالانە. لهوما ئهم دێ بێژین: کۆما «ب ناڤ رێبەرتی» داخویانیەک دا یه.
د داخویانیێ دا پهكهكێ وەک هەر جار حەقارەت ل پهدهكێ كریه، گازندهكا دۆستانە گهلهك ب نهرمی ژی ژ ئیراقێ دکەت. ئهگهر ئەڤەیه؛ پهكهكه دبێژیت کو حکوومەتا هەرێما کوردستانێ و حکوومەتا ئیراقێ ل سەر ئێریشێن ترکیێ یێن ل سەر بنكه و بارەگەهێن پهكهكێ یێن ل هەرێما کوردستانێ ل هەڤ کرینە.
د داخویانییا پهكهكێ دا زێدهباری سلۆگانێن ئنتیكه، هەڤۆک و زمانێ داخۆیانیێ ژی، هێژایە کو مرۆڤ هنەکی بالا خوە بدهنێ.
پهكهكه کو د چەند خالێن داخویانیا خوە دا پڕ ب رووقاییمی پهدهكه وەک «خایین و دژمن» ب ناڤ كریه، د ههمان دهمێ دا پڕ ب نەرمی گازندان ژ حکوومەتا ئیراقێ دکەت، حکوومەتا کو پهكهكه ئێخستیە د لیستەیا رێخستنێن قەدەغەکری دا!.
كهجهكێ د داخویانیێ دا بۆ حكوومهتا ئیراقێ گۆتیه: «بۆچی تەڤگەرەک کو هەردهم ل گهل دەولەت و گەلێ ئیراقێ د ناڤا پهیوهندیێن دۆستانە و پشتەڤانیێ دا یە ژ ئالیێ حکوومەتا ئیراقێ ڤە وەکە رێخستنەکا قەدەغە بهێته دیتن؟».
زێدهباری كو ئاگاهیێن د داخویانییا كهجهكێ دا چێكرینه و ب تەڤاهی بەرهەما ماشینەیا دەرەوان یا پهكهكێ یە، پرس ئەڤەیه: بۆچی پهكهكه ل هەمبەر کورد، کوردستان، هێزێن سیاسی یێن کوردستانێ، حکوومەتا هەرێما کوردستانێ و سازیێن وێ یێن رەوا نانکۆرە؟ لێ نە ژ نها، بهلكو ژ دەستپێکا وێ ڤە، ل بەرانبەر دەولەتێن هەرێمی؛ سێ ژ وان ئاشکەرا و یەک ژ وان ژی ب دزی ئەو قاس کز و بچووکه و هەر مژوولی خزمەتا خوە و پلان و بەرژەوەندیێن وان دەولهتانە و ل سەر كیستێ نەتەوا کورد و خاکا کوردستانێ و هەتا ل سەر كیستێ جانێ كادرێن خوە یێن مەزن، د ڤی واری دا گەلەک میناک و بەلگە هەنە، لێ ئهمێ ل ڤێره نیقاش نهكن؟ .
یا دوویهمین، پهكهكه کو چ پهیوهندییا وێ ب مافێن نەتەوی و تەکۆشینا نەتەوی یا کوردستانێ ڤه نینە، کوردایەتیێ ژی ب پاشڤەروویی و «نەتەوپەرەستیا سەرەتایی» ب ناڤ دکەت و تەڤگەرا رزگاریخوازا کوردستانێ ژی ژ بۆ دەمۆکراسیا گەلان وەک خەتەر دبینیت. بۆچی گاڤا چاڤێن سۆرێن دەولەتێن هەرێمی دبینیت، پهنایێ بۆ سلۆگانێن نەتەوی دبهت و ناڤێ کورد و کوردستانێ دكهڤیته سهر زمانێ وێ؟ ل دهمهكی ب سالانە ب تایبەتی ژ شانۆیا ئیمرالیێ هەتا نها پهكهكه ههول ددهت ناڤێ كورد و كوردستانێ ژ بیرا خوە و گەل ببەت؟
د سهر ڤێ چهندێ را لێ ههر جهێ دلخوەشیێ یه کو پهكهكە ژ بۆ پرانیا گەلێ کورد ئاشکەرە بوویە و پرانیا بێدەنگ یا خهلكێ كوردستانێ ئێدی دزانیت کو پهكهكه تەنێ گاڤا کو کەته د تهنگاڤیێ دا ب ناڤێ نەتەوەیا کورد و کوردستانێ کار دکەت. ئاشكرا بوونا مهعدهنێ پهكهكێ بۆ هشیاربوونا نەتەوەیا کورد ل هەرچار پارچەیێن کوردستانێ، هێزێن نەتەوی، رەوشەنبیر و نڤیسکارێن کوردێن وەلاتپارێز ڤهدگهریت.
ژ ئالیهكێ دی ڤه هێزێن سیاسی و کەسێن کو پهكهكێ د داخویانیا خوە دا داخوازا هاریكاریێ و پشتگریێ ژ وان دکەت، هەمان ئەو هێزن و هەمان ئهو گەلە یێ کو بهریا نها پهكهكێ شەر فرۆشتیە وان، یان قوربانیێن دەستێ پهكهكێ نە یان ب کێمی پهكهكێ ئەو خائین کرنە.
سەرکردایەتیا گومانبار یا پهكهكێ نها هند شەپرزه بوویه، کو ئەو ب خوە بوویە ئهگهر و بههانه ژ بۆ كێشانا شەر و داگیرکەریێ ل کوردستانێ. لهوما نها ئەو ب چ ئاوایی هاریكاریێ ژ خهلكی دخوازیت، ل دەمەکی، د ئەدەبیات و ئلیدۆلۆژیا «پهكهكێ» دا ژ رۆژا دامەزراندنا وێ و ههتا رۆژا مه یا ئیرۆ وێ ئەڤ گەله وەکی «پاشڤەروو»، و شۆرەش و سەرهلدانێن وان وەکی «شەرێ عەشیران» و مافێن وان وەکی «نەتەوەپەرەستیا سهرهتایی» ب ناڤ دکەت. هەر وها ب هەموو هێزا خوە ل دژی زمان، چاند و ئالا وان دەردکەڤیت.
باشە قەی خەلک نەحەقە ببپرسیت: گەلۆ پهكهكە یا کو د سالا 2024ێ دا خەبات و تێکۆشینا وێ هاتبیتە سەر شەوتاندنا دکان و بازارێن خەلکی، ئەو ب چ روویەکی بەحسا خەبات و تیکۆشینا نەتەوی دکەت؟ پارتیەک کو ل سەر بچووکترین رەخنە، نە تەنێ خەلکێ دەرڤە لێ ئەندامێن خوە ب خوە ژی ب خیانەتێ توهمەتبار دکەت و تاسفیە دکەت، ئێجا چاوا بەحسا ئازادی، دەمۆکراسی و هاریكارییا گەل دکەت؟