مەمەت مێردینی
رێخستنا پەکەکێ یا ئەورۆپا کەنەکێ، دەربارێ شەر و پەڤچوونێن ساختە یێن د ناڤبەرا چەکدارێن پەکەکێ و لەشکەرێ ترکیێ د ناڤا هەرێما کوردستانێ دە، کۆنفەرانسەک ل سەر تۆرا “زۆۆم”ێ پێک ئانی. د کۆنفەرانسێ دە ژ کوردان ھات خوەستن کو ل دژی ئێریشێن لەشکەرێ ترکیێ ببن یەک و بەرژەوەندیێن خوە یێن حیزبی ل ئالیەکێ بھێلن، لێ بەلێ دیسا د هەمان کۆنفەرانسێ دە ئێریشێ سەر پەدەکێ و بارزانی هاتە کرن.
دەما کو ئەم د چارچۆڤەیا گشتی دا ل ڤێ کۆنفەرانسا کەنەکێ دنێرین، ئەڤ کۆنفەرانس نۆرمالە، لێ ئەگەر ل گۆری کەسێن کو د کۆنفەرانسێ دە بەشدار بوویی، پەیوەندی و خەباتێن وان کەسان کۆنفەرانسێ بنرخینین، دهێتە دیتن کو ئەڤ کۆنفەرانسە ب سەرێ خوە کۆنفەرانسەکە دو روویە. ژ بەر کو نە یێن بەشداری کۆنفەرانسێ بوویی و نە ژی یێن کەنەکە دامەزراندی ت باوەری ب نەتەوەبوونێ نینە، ب هەر ئاوایی دژی نەتەوەبوونا کوردان دسەکنن، کەسێن نەتەوی ژی ب کەسێن کەڤنەشۆپ و پاشکەتی ب ناڤ دکن، نە ب تەنێ ئەڤ کەسانە بەلکو کەسێ کو کەنەکە و پەکەکە ب تەڤاهی عیبادەتێ ژێ رە دکن و ب کەسەکی پڕ پیرۆز ژی ناس دکن، ل دژی نەتەوەیا کوردە، دەولەتا نەتەوی ژی وەکە ژەهر ژ بۆی کوردان پێناسە دکە، لۆما ئەم دبێژن نە مافێ سازی و کەسێن ب ڤی ئاوایە کو دەما کەتن تەنگاسیێ ب گۆتنێن نەتەوی گەل بخاپینن، نەتەویبوون ب کار و کریاران بەیان دبە، نە ب گۆتنێن ڤالە و مەزن.
هەر دەما پەکەکە راستی شکەستنەکێ، ئێریشەکێ یان ژی پرسگرێکەکێ تێ، جڤین، کۆنفەرانس و داخویانی ژ کەنەکێ تێن چاڤەرێکرن، مە قەت نەدیتیە و نەبهیستیە کەنەکەیا پەکەکێ داخویانیەکێ ل دژی ت ئالیەکی دژبەرێ باشوورێ کوردستانێ بدە ل دژی ترکیەیێ نەبە، ژ خوە حەشدا شەعبی ژی ل دژی کوردانە، حەشدا شەعبی ب دەهان ئێریش ل سەر پایتەختا هەرێما کوردستانێ پێک ئانینە و نها ژی د گەل دە ئێریشان پێک تینە، د سالا 2017 دە ژی حەشدا شەعبی ئێریشی شەنگال، کەرکووک، پردێ وهتد کر و خوەست هەولێرا پایتەخت داگیر بکە، لێ داخویانی و کۆنفەرانسێن کەنەکێ تونە بوون، ژ بەر کو ووسا دفکرین ئەڤ ئێریش ب تەنێ ل دژی پەدەکێ نە، ئەم ژ کەنەکێ دپرسن، گەلۆ چما وە هەیانی نها ت داخویانیەک ل دژی ئێریشێن حەشدا شەعبی و هەڤالبەندێن وێ پەکەکێ نەدانە؟!
بەلێ، کەنەکە نەتەوا کورد و یەکیتییا نەتەوی یا کورد ژ خوە رە وەکە مەرتال بکار تینە، د بن ناڤێ یەکیتییا نەتەوی یا کوردان هەر تشتی د بەرژەوەندیا پەکەکێ دە پێک تینە، ت جاران ل دژی پەکەکێ و سەرۆکێ وێ پارتیێ کو ب هەزارن کار و کریارێن نەتەوی ئەنجام دانە داخویانی نەدانە، هەر تشتێ پەکەکە دکە رەوا دبینە، بەرەڤاژی ژی هەر تشتێ ل دژی پەکەکێ هات کرن ژ ئالیێ هەر پارتیەکە کوردی ڤە بە ب خائین و خوە فرۆش وێ پارتیێ ددە ناسکرن و ب دەهان داخویانیان ل دژی پارڤە دکە، ژ بەر کو کەنەکە ژ ئالییێ کادرۆیێن پەکەکێ یێن ئەورۆپا نیلووفەر کۆچ، ئادەم ئووزون، زوبەیر ئایدار، رەمزی کارتال ڤە تێ برێڤەبرن. ناڤەرۆکا کۆنگرەیێ، رێڤەبەریا کۆنگرەیێ، ھەڤسەرۆکێن وێ و ھتد، ھەموو راستەراست ژ لایێ قەندیلێ ڤە تێنە دەستنیشانکرن. پەکەکە ئەندامێن کەنەکێ ل گۆری بەرژەوەندیێن خوەیێن دەمکی وەک سەرباز چەپ-راست، پێش و پاش دگەرینە. پەکەکە، کەنەکێ وەکە سازییەکا بێ باندۆر و تەنێ ژ بۆ ئارمانجێن خوە بکار تینە، ئەڤجا سازیەکە ب ڤی ئاوا کو د بن باندۆرا پارتیەکە نە نەتەوی دە یە دێ چەوا د بەرژەوەندیا نەتەوا کورد دە تەڤ بگەرە؟ کەنەکە گەر بخوازە نەتەوی بفکرە، نەتەوی تەڤبگەرە ژی نکارە، ژ بەر کو د رێڤەبەرییا وێ دە کەسێن نە نەتەوی و پەکەکەیی جی دگرن، ب گشتی کەسێن ل دژی پەدەکێ و حکوومەتا هەرێما کوردستانێ تەڤ دگەرن د ڤێ سازیێ دە ئەندامن.
یێن کو ھەری زێدە ل سەر ماسەیێن بارەگەھا کەنەکێ ل بروکسلێ روونشتینە، ئەو کەسن یێن کو ئێریشی پەدەکێ و بارزانی دکن، کەسێن کو بارزانی و پەدەکێ قەبوول دکن نکارن ل سەر ماسەیێن کەنەکێ ل برۆکسەلێ روونێن، چەوا کو ژ بۆی تو ببی بسلمان پێویست دکە یەکەمجار شەهدە بدی، وسا ژی ژ بۆی کو تو ببی ئەندامەکی کەنەکێ و ل سەر ماسەیێن بارەگەها وێ یا برۆکسەلێ ژی روونێی، پێویست دکە یەکەم جار بەیعەتێ بدی پەکەکێ و رێبەرێ وێ و ل دژی بارزانی بسەکنی، ژ دەرڤەی ڤێ یەکێ ت رێیەکە دن تونەیە، ئەڤجا ریخستنەکە ب ڤی ئاوا کو هەر تشتێ وێ ل قەندیلێ بریار ل سەر تێ دایین نکارە تەمسیلا نەتەوا کورد بکە.
گەر کەنەکە دخوازە هەلوەستەکە نەتەوی دیار بکە، بلا یەکەمجار ل دژی ئاخافتنێن رێبەرێ پەکەکێ بسەکنە، بلا ئاخافتنێن وی یێن کو تێدە دبێژە، “دەرفەتێ ب من بدن، ئەز دخوازم خزمەتا دەولەتا خوە ‘ترکیەیێ’ بکم” شەرمەزار بکە، بلا سەرۆکێ پەکەکێ ژ بەر هەولەست و ئاخافتنێن وی یێن نە نەتەوی روورەش و شەرمەزار بکە، بلا کەسێ کو ل پێشبەری دادگەھا ترک لێبۆرین ژ مالباتێن کوشتییێن ترکا خواستی لێ ویژدان و جرئەتا وی نە گرت بەحسا یەک شەھیدێ کورد بکە و سەرێ خوە ل ھەمبەر دوژمنی شوور کری، روورەش و شەرمەزار بکە، بلا کەنەکە ئۆجالانێ کو ھەموو بییۆگرافییا سەرکردە و رێخستنا خوە بۆ دژمنی گۆتی، شەرمەزار بکە، کەسێن کو رەژێما سووریەیێ، ئیران و ئیراقێ ب برا و ترکیەیێ ب تەنێ وەکە دوژمن دبینن بلا روورەش و شەرمەزار بکە، بلا کەسێن کو دبێژن گەر نها رەژێما سووریەیێ ل سەر لنگا مایە ب سایا سەرێ بەرخوەدانا مەیە، بلا کەس و لایەنێن دبێژن، ژ بەر هەبوونا مە د شەنگالێ دە ئالا ئیراقێ هاتیە دالقاندن، روورەش، ریسوا و شەرمەزار بکە، پشترە وی ناڤێ گران یێ نەتەوی ل خوە بکە، کەس و سازیێن د بن باندۆرا پەکەکێ دە ت جاران نکارن ب ئاوایەکی نەتەوی بفکرن و تەڤ بگەرن ئەڤ راستیەکە زەلالە.
د ڤێ کۆنفەرانسا خوە دە کەنەکەیا پەکەکێ دبێژە، “دەولەتا ترک دژی ھەبوونا کوردایە، دژی کوردستانێ یە. ڤێ نیەتا خوە ڤەناشێرە، ب کریارێن خوەیێن چاندی، سیاسی و لەشکەری نیشان ددە. دەولەتا ترک د ئێریش و ئۆپەراسیۆنێن خوە دە، ب نیەتەکا خراب و پلانکری، دەمۆگرافی و ژینگەھا (ئەکۆلۆژ) کوردستانێ، ھەدەف دگرە و خراب دکە.” لێ یا راست نە ب تەنێ دەولەتا ترک، دەولەتا ئیرانێ، سووریەیێ و ئیراقێ ژی ب قاسی دەولەتا ترک ل دژی هەبوونا کوردانە، ل دژی کوردستانێ نە، لێ مە نەدیت نە کەنەکێ و نەژی پەکەکێ ل دژی ڤان دەولەتان ت هەلوەستەک وەرگرتی، و ئەمێ نەبینن ژی.
بەلێ، وەکە هوون دبێژن “بێتفاقیا ناڤخوەیی یا کوردستانیان، چەپەرێ پاراستنا دەستکەڤتێن کوردستانێ لاواز دکە و رێ ل بەر جەپھەیێ دژمنان خوەش دکە.” لێ بەلێ ت کەس و پارتیەکی ب قاسی پەکەکێ و رێبەرێ وێ نەبوونە سەدەمێن بێتفاقیا کوردستانیان.
ب کورتی، کۆنگرەیا کو ناڤەکێ مەزن وەک کۆنگەرا نەتەوا کوردستانێ ھەیە، تەنێ ژ بۆ ڤالاکرنا تێگەھا نەتەوایەتی و خزمەتکرنا بەرژەوەندییێن پارتییا پەکەکێ ھاتیە ئۆرگانیزە کرن. د ھەمان دەمی دا ڤێ ئۆرگانیزاسیۆنا پەکەکێ، رێ ل بەر “کۆنگرەیا نەتەوەیی یا کورد” یا راست ژی گرتییە.
