ل رۆژئاڤایێ کوردستانێ ئالیگرێن پەکەکێ/پەیەدێ “12ەمین سالڤەگەرا شۆرەشا خوە” پرۆزکرن.
فەرماندارێ ھەسەدەیێ مەزلووم عەبدی ژی ب رێیا ڤیدیۆیەکێ “سالڤەگەرا شۆرەشێ” پیرۆز کر.
مەزلووم عەبدی د ئاخافتنا خوە دە بەحسا چەند خالان کر و وەھا گۆت:
ئەم ئامادەینە د چارچەڤێ چارەسەرکرنا پرسگرێکان دە لگەل ھەموو ئالیان گۆتووبێژان بکن.
ب رێیا چارەسەریا سیاسی پرسگرێکا سووریەیێ دێ بێ چارەسەرکرن.
ئەم دێ بەردەوام بکن ل سەر سیاسەتا خوەیا ل ھەمبەری یەکپارچەیا خاکا سووریەیێ.
ئەم ئامادە نە دەست ب دانوستاندنێ ل گەل ھەر ئالیەکێ بکن د ناڤا وان دە ترکیە ژی.
بەری ھەر تشتەکی گەلەک بالکێشە کو مەزلووم عەبدی ژ بۆ چ ب خوە تەڤلی پیرۆزباھیا سالڤەگەرا “شۆرەشێ” نەبوو، ب رێیا ڤیدیۆیێ پیرۆزباھیێ دکە و ئاخاڤتنا خوە دکە. عەبدی ژ ترسا کو پەکەکە ل ھمبەری وی کۆمپلۆیەکی بکە نەوێرە بکەڤە د ناڤا خەلکێ و تەڤبگەرە.
عەبدی دەرەوا دکە، دەما کو دبێژە؛ ئەم ئامادە نە د چارچەڤێ چارەسەرکرنا پرسگرێکان دە لگەل ھەموو ئالیان گۆتوبێژان بکن. مادەم تو ئامادەیی، ژ بۆ چ ھەتا وەک ڤێ گاڤێ ھوون نکارن ل گەل ئەنەکەسێ و پارتیێن د ناڤا ئەنەکەسێ دە ھەڤدیتنا بکن و ژ بۆ یەکتیەکی گاڤێ باڤێژن. ژ بەر کو بریار نەیا تەیە و بریارا قەندیلە. تو ب خوە ژی خوە ل ھمبەر قەندیل د بارەگەھێن ئامەریکا دە دپارێزی. تو نەوێری راستیا ھەیی بێژی.
گۆتنا ھەری راست کو عەبدی دبێژە ئەڤە: ئەم دێ بەردەوام بکن ل سەر سیاسەتا خوە یا ل ھەمبەری یەکپارچەیا خاکا سووریەیێ. راستە ھوون د بنگەھێ خوە دە دو تشتن، ھوون پارامیلتەرێن ئامەرکایێنە و پارێزڤانێن یەکتیا ئاخا سوریێ نە. ژ بۆ ڤێ ژی وە ناڤێ کوردستانێ گوھەرت و ئالا پیرۆزا کوردستانێ قەدەغە کر. چەکدارێن تە ب خوە ژی وەک فاشیستێن ئارتێشا ترک سڤکاتیێ ب ئالا کوردستانێ دکن. ھەتا ھوون ڤێ سیاسەتێ رێڤەببن، دێ داویا وە جەحاشتیا رەژیما ئەسەد بە.
عەبدی دبێژە کو ئەو ئامادەنە دانوستاندنێ ل گەل ترکیێ بکن. ھوون ھەر دەمی ئامادەبوون کو پێوەندیا ل گەل ترکیێ بکن، سالح مووسلم گەلەک ھاتن و چوونا ئەنقەرە کر و ل گەل میتا ترکیێ جڤیا. لێ چ جاران ترکیا ھوون ژ ئاستا ئیستخباراتێ دەرباس نەکرن. ژ ئالیەک دن گەلۆ دەما ھوون ل گەل ترکیێ پێوەندیەکی دەینن ھوون “خیانەتێ” دکن؟ قەندیل ھەرکەسێ کو، (ژ بلی خوە) پێوەندیێ لگەل ترکیێ دکە ب “خیانەتێ” تاوانبار دکە.
گۆتن ئاسانە لێ کرن زەحمەتە.
