نها هەم یه‌نه‌كه و هەم ژی په‌كه‌كە ل گۆری ئه‌جێندایێن خوە یێن سیاسی كه‌سێن ب ناڤ رەوشەنبیر، سیاسەتمەدار، چالاکڤانێن سیاسی و مافپارێزێن سەختە د مەدیایێ دا ددن ئاخفتن. یەک ژ وان ژی نەچالاکڤانە و نەژی چاڤدێرێ سیاسی یه. ئەڤ کەسه د سازیێن یه‌نه‌كێ دا کار دکه‌ن و هندەک ژ وان ژی ژ ئالیێ یه‌نه‌كێ ڤە دەرباسی رێخستنا سلێمانیێ یا په‌كه‌كێ بووینە. بەشەک ژ وان کارمەندێن ب مووچە یێن دەولەتا ئیراقێ یان ژی یا ئیرانێ نە. پشتی کو په‌كه‌كە ل گه‌ل یه‌نه‌كێ یا شیعە د ئەنیا شیعەیان دا جهـ گرتی، ئەڤ کەسه ژ بۆ یەکیتیا رەوشەنبیرێن په‌كه‌كێ، سازیا چاند و هونەرێ، سازیا ژنان، مەدیا و ..هتد ل سلێمانیێ هاتنه ئەرکدار کرن. ب رێیا ڤان کەسان داخویانی و چالاکیان ل گۆری ئه‌جێندایا سیاسی یا ئەنیا شیعە دده‌ن و د جڤینان دا دئاخڤن.
ب تایبەتی سێرڤسا ترکی یا په‌كه‌كێ ڤان کەسێن کو خه‌لكێ باشوورێ کوردستانێ وان باش ناس دکەن و ژ بەر ڤێ یەکێ ژی حورمەتا وان ناگرن، وەک کەسێن ب ناڤ و دەنگ پێشکێشی جڤاکا باکورێ کوردستانێ و خواندەڤانێن ترک دکەن.
یەک ژ وان ژی عه‌لی کەریمی یێ ژ رۆژهلاتێ کوردستانێ یە کو ل سلێمانیێ دژیت. عه‌لی کەریمی کو بەرێ د ناڤا هندەک تەڤگەرێن رۆژهلاتێ کوردستانێ دا جهـ گرتبوو و ژ بەر کەسایەتیا خوە یا ب گومان ژ ڤان تەڤگەران هاتبوو ده‌رێخستن، نها د مەدیایا په‌كه‌كێ دا یه. گەلەک دەردۆر وسا دفکرن کو عه‌لی کەریمی بەرپرسێ کۆمکرنا ئاگاهیان و مانیپولاسیۆنێ یە کو ئیرانێ ل سلێمانیێ ب جهـ کریە. ئەڤ کەسایەتیا ب شک پشتی سالا 2018ێ ژ ئالیێ مەدیایا په‌كه‌كێ ڤە هاته ریکلام کرن.
کەریمی کو د دەربارێ دەولەتا ئیرانێ و کۆلۆنیالیزما ئیرانێ دا چ داخویانی و شرۆڤەیێن وی نینن، د مەدیایا په‌كه‌كێ دا دو ئەرکێن وی یێن سەرەکی هەنە.
یا یەکەم بەلاڤکرنا دره‌و و ئاگاهیێن کو په‌ده‌كێ شەرمەزار دکه‌ن. یا دویەمین ژی پەسنا رێخستنا په‌كه‌كێ یا رۆژهلاتێ کوردستانێ پژاکێ و هه‌روه‌ها شه‌رمه‌زار كرنا پارتیێن رۆژهلاتێ کوردستانێ یێن وەک په‌ده‌كه ئیران و پاکێ.
ئەڤ کەسایەتیا کو د ناڤا چەپگران دا مایە د ئاژاواگیری و پرۆپاگاندایا خوە دا بێسنۆرە، هەری داوی دیسا هەڤپەیڤینەک ل گه‌ل چاپەمەنیا په‌كه‌كێ کر. کەریمی د هەڤپەیڤینێ دا دبێژیت: «بێی په‌ده‌كێ دەولەتا ترک نکارە ل هەمبەری گەریلا ل بەر خوە بدە» ژ بەر کو عه‌لی کەریمی پۆرا خوە ل بەر ئاشی سپی نەکربوو، هەلبەت ئەو چێتر دزانیت کو گۆتنێن وی نەراستن. لێ تەنێ ب دره‌وان و ب گۆتنێن نەراست دخوازیت خه‌لكی بخاپینیت دا کو ئەرکا خوە یا «پەسندانا په‌كه‌كێ و رووره‌شكرنا په‌ده‌كێ» ب جهـ بینیت.
ئەڤه نەتەنێ پرۆپاگاندایا عه‌لی کەریمی یە، هەلبەت نها ب گشتی کۆمەک هه‌یه هەول ددەن تێکچوونا په‌كه‌كێ یا ل باکورێ کوردستانێ ڤەشێرن و تێکچوونا وێ یا ل باشوورێ کوردستانێ ژی ب په‌ده‌كێ ڤە گرێبدەن.
لێ په‌كه‌كە یا کو ل باکورێ کوردستانێ تێک چووی، دخوازیت ڤێ شکەستنێ بینیته باشوورێ کوردستانێ، ب تایبەتی بەهدینان. په‌كه‌كە ل باکورێ کوردستانێ تێک چوو. هەم ژی ب توندی تێک چوو. ئەردنیگاریا باکورێ کوردستانێ ب قه‌ده‌ر 1000 جاران ژ ئەردنیگاریا بەهدینان مەزنترە. میناک هەرێما کو زنجیرە چیایێن موونزوورێ لێ كو په‌كه‌كه ب ئەیالەتا دێرسمێ ناڤ دكه‌ت، ب گەلی، رووبار و دارستانێن خوە ڤه 100 جاران ژ بەهدینان مەزنترە. لێ هەموو یەکینەیێن گەریلا ل وێرێ هاتنه ته‌سفیەکرن و د 5 سالێن رابووری دا ل ڤێ پارێزگەهێ یەک گوللـه ژی نەتەقیایە. گەلۆ ما په‌ده‌كه ژ ڤێ یەکێ بەرپرسیارە؟
ل جهێ کو ب پارێزگەها ئامەدێ دهێته نیاسین کو باژارێن مەزن یێن وەکی ئامەد، مووش، چەولیگ، و ئەلعەزیز و چیایێن ئاسێ لێ هەنە، گەریلایێن په‌كه‌كێ نینن. د ڤان چەند سالێن داویێ دا هەموو یەکینەیێن په‌كه‌كێ لێ هاتنه ته‌سفیە کرن. ئەڤ ده‌ڤه‌ره ژی ب رووبه‌رێ خوە ب كێمی 20 جاران ژ بەهدینانێ مەزنترە. ما سەدەما ته‌سفیەکرنا په‌كه‌كێ ل وێرێ ژی په‌ده‌كه یه؟
هێزێن کۆلۆنیالیێن سەر کوردستانێ گەلەک زالمن. سیستەمەکێ وان یێ پر تەڤلیهەڤ هەیە، لێ ئەڤه نە سەدەما تێکچوونا په‌كه‌كێ یە. سەدەما تێکچوونا په‌كه‌كێ نە په‌ده‌كه یه،نە خه‌لك و نه‌ژی پارتیێن دی نه. په‌كه‌كە ل سەر تێکچوونا کوردان هاتیە ئاڤا کرن. ل جهێ کو په‌كه‌كە ئەڤه 40 سالن لێ تەڤدگەریت، کوردان هەر تشتێ خوە ل وێرێ وندا کر. بنێرن جهێن کو په‌كه‌كە 40 سالن تێدا، هەر دەر وێران بوویە. په‌كه‌كێ خوە ل پشت خه‌لكی ڤەشارتیه و دبێژیت: ئەم دێ خه‌لكی ئازاد كه‌ین، جه‌ماوه‌ر ده‌رێخستنه جاده و كولانان و هاڤێتنه پێشیا داگیرکەرێن هۆڤ. ژ بۆ ڤێ ژی هەر کەسێ کو ل پەی په‌كه‌كێ دمەشی یا، هەموو وێران بوون.
دخوازن وێ سیناریۆیا کو خه‌باتا نەتەوی یا کوردێن باکور ب داوی کری، ل باشوور ژی بجەربینن
نها ژی دخوازن وێ سیناریۆیا کو خه‌باتا نەتەوی یا کوردێن باکور ب داوی کری، ل باشوور ژی بجەربینن. ناڤێن وەکی عه‌لی کەریمی ژی ژ بۆ کو سیناریۆیا وێرانکرنا باشوورێ کوردستانێ بۆ رایا گشتی خوەش خویا بکەن دهێنه ئه‌ركدار كرن. یێن کو هەڤسارێ عه‌لی کەریم د دەست خوە دا گرتی، ئیرۆ ئەو وەک کرێدار ته‌سلیمی په‌كه‌كێ كریه، سبە دێ ده‌نه ئێكێ دی. ئەڤه نەرەوشەنبیرن، ئەڤه کەسێن کو گۆتن و پێنووسێن وان تێن فرۆتن، ئانكو خوە فرۆشن. لێ مخابن د ناڤ کوردان دا ب زمانەکێ وه‌سا خورت دیتنه‌كا خائین هەیە. عه‌لی کەریمی ژی یەک ژ ڤان کەسانە. نها ئه‌و خیانەتەکا ب هەمان رەنگی ل خه‌لكێ رۆژهلات كری ل خه‌لكێ باشوور ژی دکەت. ئەڤ مرۆڤه ب راستی ژی هێژایی بەرسڤدانێ نینە. لێ مخابن دەما مرۆڤ نه‌بێژیته خائینان خائین، ئه‌نجام ئه‌و كه‌س ب ماسك و روویه‌كێ رێزدار و خه‌ملی بۆ گه‌لێ كورد دهێنه پێشكێش كرن.
