نیقاشێن ل سەر پێڤاژۆیا کو ب ئاخافتنا دەڤلەت باخچەلی یا ژ بۆ چارەسەریا پرسگرێکا کورد دەست پێ کری، بەردەوام دکن. چقاس رۆژ سەر دەرباس دبن، دەردکەڤە هۆلێ کو ئەڤ نەچارەسەریا راستین يا پرسگرێکا کوردی یە. لێ بەلێ، بریارا دەڤلەت باخچەلی یا کو بێی چ نیقاشەک هەبە، تۆپێ باڤێژە بەر ئۆجالان و بەحسا مافێ هێڤیێ ژ بۆ ئۆجالان دکە، رەوشەکە کو دڤێ کورد راست فێم بکن. دەولەتا ترک د پرسگرێکا کوردی دە عه‌بدوللا ئۆجالان و په‌كه‌كه وەک موخاته‌ب گرتنه، ئەڤ یەک نە ب هێزا ئۆجالان ڤە گرێدایی یە.
دەولەتا ترک ئۆجالان وەک قه‌یوومه‌ك ل سەر سەرێ کوردان دانیە. 40 سالە کو دەولەتا ترک عه‌بدوللا ئۆجالان خەملاندیە و وەکریە کو کورد وی وەک رێبەر قەبوول بکن. ژ بەر کو عه‌بدوللا ئۆجالان گارانتۆرا نەگوهەرینا سینۆرێن دەولەتا ترکە. عه‌بدوللا ئۆجالان ل سەر مێزه‌كا کو پرسگرێکا کوردی نیقاش بكه، نە ل ئالیێ کوردانە، ل ئالیێ ترکان روودنە. عه‌بدوللا ئۆجالان و په‌كه‌كە کرنه یەکانە موخاته‌بێن پرسگرێکا کوردی، ئەڤ ستراتەژیا 40 سالی یا دەولەتا ترکە. دەولەتا ترک ب تونەکرنا هەموو تەڤگەر و سیاسەتمەدارێن کورد یێن دەرڤەیی په‌كه‌كێ، کورد مه‌حكوومی په‌كه‌كێ کرنە. ئافراندنا تێگەها «کورد = په‌كه‌كە» فۆرموولەکە کو دەولەتا ترک ژ بۆ پاراستنا دەولەتا خوە دبینە.
ئۆجالان، کارتا هەری مەزنا د دەستێ دەولەتا ترک دە یە. د سەدسالا 20ێ دە چاوا «دیاپ ئاغا و حەسەن خەیری» وەک کەسێن کو خوە وەک نوونەرێ کوردان نیشان دان و د پەیمانا لۆزانێ دە کورد تێک برن، ئۆجالان ژی ڤێرژنا سەدسالا 21ێ یا دیاپ ئاغایێ کو دەولەتا ترک دخوازە ل سەر کوردان بسەپینە. دەولەتا ترک کەنگی بخوازە ئۆجالان دەردکەڤە و «ئاشتیێ، شەری، پاشڤەكێشانێ» ئیلان دکە. ئۆجالان ل گۆری هەوجەداریێن دەولەتا ترک دئاخڤە.
تەنێ دەما ئەم ل نامەیا ئۆجالان یا کو د نەورۆزا 2013ێ دە راگەهاندی بنێرن، ئەم دکارن ب زەلالی مسیۆنا ئۆجالان یا دژه – کورد ببینن. د نامەیا خوە دە ئۆجالان چ گۆت: «ژ بۆ کوردێن کو ئەڤ شارستانیا هەزار سالان ب نه‌ژادێن جودا، ئۆلێن جودا و مەزهەبێن جودا ب براتی و دۆستانی ب هەڤ رە دژین و ب هەڤ رە ئاڤا کرنە، دیجلە و فرات برایێن ساکاریا و مەریچێ نە. چیایێن ئاگری و جودی دۆستێن کاچکار و ئەرجییەسن. گۆڤەند و دەلیلۆ ب هۆرۆن و زەیبەک رە خوشک و برانە».
ئۆجالانێ کو رادبە سیستەما سەدسالی یا بێناسنامەیی، بێدەولەتی، قەتلعام و مێتنگەریێ یا کوردان ب براتیا گۆڤەندان ڤەدبێژە، وەک ئیرادەیا سیاسی یا کوردان قەبوول کرنا وی، تێ واتەیا کو کورد ڤێ سەدسالێ دا ژی دێ وندا بکن.
راست د دەمەکێ دە کو بهارا عەرەبی دهات ژیانكرن و کورد دکاریبوون ژ بۆ خوە گەلەک گاڤان بهاڤێژن، ئۆجالان د هەمان نامەیێ دە چ گۆت: «ئیرۆ ئەم ئێدی هشیار دبن ژ بۆ ترکیەکە نوو، رۆژهلاتا ناڤینا نوو و پێشەرۆژەکە نوو».
ئۆجالان و دەولەتا ترک ب هەڤ رە دەست دان هەڤ و د ئاتمۆسفەرا بهارا عەرەبی دە بوون سەدەم کو کورد دەرڤەیی گوهەرینان بمینن و پشتی کو کوردان ترێنا بهارا عەرەبی ژ دەست دان، ب هەڤ رە مێزا چارەسەریێ هەرفاندن و کورد ل باکور ب خەنده‌کان هاتن تونە کرن. ئۆجالان نەمەرجەکێ چارەسەریێ یە ژ بۆ کوردان، ئاموورەکە کو دەولەتا ترک پێ کوردان مژوول و تونە دکە.
مەسەلە ئەوقاس زەلالە. و کورد هەتا کو مسیۆنا عه‌بدوللا ئۆجالان نەبینن، نکارن د چ مژارەکێ دە گاڤەکێ بهاڤێژن. و پرسگرێکا کوردستانا باکور د خەفکا ناڤبەرا «دەولەتا ترک – په‌كه‌كە و ئۆجالان» دە ژ ناڤ دچە.
ژ بۆ ڤێ د ڤان رۆژان دە کو نیقاشێن وەک پێڤاژۆیا چارەسەری و ئاشتیێ تێن ژیانكرن، رەوشەنبیر و وەلاتپارێزێن راستین یێن کورد دڤێ ڤێ یەکێ ب زەلالی ببێژن: «ئۆجالان و په‌كه‌كە نەئیرادەیا مە یا سیاسی نە». ئەرێ په‌كه‌كە گەلەک رێخستنییە، ل ترکیێ پارتیا وێ یا سیاسی یا لیگال هەیە، هێزا وێ یا چەکدار هەیە، تەلەڤیزیۆنا وێ هەیە، مرۆڤێن ژ چەپێن ترک ل جەم وێ هەنە، ل ئەورۆپایێ كه‌نه‌كه و ئەڤ و ئەو هەنە. گەلەک رێخستنییە لێ ئەڤ رێخستنیبوون ناهێته وێ واتەیێ کو کورد خوە تەسلیمی پرۆژەیێن په‌كه‌كێ یێن نە د بەرژەوەندیا کوردان دا بکن.
رەوشەنبیرێن کورد دڤێ د ناڤبەرا په‌كه‌كێ و دەولەتا ترک دە مه‌حكووم نەبوونا کوردان و د پرسگرێکا کوردی دە ئینیسیاتیفێ بگرن دەستێ خوە و پێڤاژۆیەکە نیقاشێ یا ب سەرناڤێ «کورد چ دخوازن» کو هەموو کوردان دحەوینە دەست پێ بکن. پێویستییا پێڤاژۆیەکە نیقاشێ یا کو دیار دکە کوردێن باکور د پرسگرێکا کوردی دە چارەسەریێ د چ دە دبینن و پرسگرێک دێ گاڤ ب گاڤ چاوا چارەسەر ببە، هەیە. دەرڤەیی تێگەهێن ئۆجالان یێن وەک «هەوجەداریا کوردان ب دەولەتبوونێ تونە، چارەسەریا پرسگرێکا کوردی بێ گوهەراندنا سینۆران، دەولەتا ترک دەولەتا کوردانە ژی و دەمۆکراتیزەکرنا کۆمارا ترکیەیێ، بەلگەیەکە چارەسەریا پرسگرێکا کوردی» و “نەخشەرێیا” بەلگەیێ وێ پرسگرێکا کوردی ژ بێچارەیی – نێگه‌تیفیزمێ رزگار بکە.
پێشی دڤێ ئینیسیاتیفەک دەرکەڤە هۆلێ و ژ بۆ ئاڤابوونەکا ب ئاوایێ مەجلسێ یا کو هەموو خەباتان برێڤە ببە دەست ب تەڤگەرێ بکە. ئەرێ خەباتەکە مەجلسێ یا ناڤەندی-ئەورۆپا کو تێکلیێن گومانبار و تاری یێن د ناڤبەرا په‌كه‌كێ و دەولەتێ دە دەرباس دکە و تێ دە گەلەک ئالی جهـ دگرن، دکارە د پێڤاژۆیا نیقاشکرنا پرسگرێکا کوردی دە رۆلەک بباندۆر بلیزە. مەجلسەک وها دکارە پرسگرێکا هەبوونا گەلێ کورد یا کو بوویە قادا ئیستیسمارێ یا په‌كه‌كێ و دەولەتا ترک، بکشینە زەمینەکا ناڤنەتەوەیی یا مەشروع و کوردستانی.
رەوشەنبیر و نڤیسکارێن کورد دڤێ ئه‌رك، خەم، ئەزئەزی و هەموو خالێن کو مرۆڤی پاش دە دکشینن دەینن ئالیەکی و ژ بۆ کو کورد ڤێ دەرفەتا گورانکار یا سەدسالا 21ێ وندا نەکن دەست ب تەڤگەرێ بکن. یان دێ ئیرادەیەکە راستین یا کوردی وەرە با هەڤ و چالاک ببە، یان ژی دیسا روحێ دیاپ ئاغا دێ د ئۆجالان دە ڤەژی و کوردان بکە قوربانێ یەکپارچەبوونا دەولەتا ترکیێ.
