کۆمێن چەکدارێن تەحریر ئەل-شامێ و ھەڤالبەندێن وێ د ناڤا 48 دەمژمێران دە، کارین ھەژمارەک مەزن ژ تاخێن حەلەبێ کۆنترۆل بکن و گھیشتن ناڤا باژێری و قەدەغەیا چوونووھاتنێ ل ناڤا باژێری فەرز کر.
د داخویانیێن خوەیێن داوی دە، کۆمێن چەکدارێن ئۆپۆزسیۆنێ گۆتن، وان کەلەھا حەلەبێ و مزگەفتا ئەمەوی ل ناڤا باژێری و گەلەک تاخێن وێ خستنە بن کۆنترۆلا خوە.
کۆمێن چەکداران قەدەغەیا چوونووھاتنێ ل ناڤا باژێری فەرز کر و گۆت، ئەو دێ د ھەیاما چەند دەمژمێران دە باژارێ حەلەبێ ژ ئالیێ لەشکەری و ئەولەھیێ ڤە بپارێزن و پشتی وێ ژی دێ رزگارکرنا هەموو باژێری راگھینن.
دەستەیا تەحریر ئەل-شامێ و کۆمێن ھەڤالبەندێن وێ، رۆژا 27 مژدارێ دەست ب ئۆپەراسیۆنا “رێگرتنا ل ئێریشان” کر و ھەژمارەک گوند، باژارۆک و جھێن گرینگ ژ دەستێ رێژیمێ خستن بن کۆنترۆلا خوە.
چەکدارێن دەستەیا تەحریر ئەل-شامێ و ھەڤالبەندێ وێ، کەتن ھەژمارەکا مەزن ژ تاخێن باژارێ حەلەبێ و گھیشتن کەلەھا حەلەبێ، مزگەفتا ئەمەوی و مەیدانا سەعدالله ئەل-جەبری، کو دکەڤە ناڤەندا باژارێ حەلەبێ.
ژ ئالیێ خوە ڤە، ئارتێشا سووریەیێ ژی د داخویانیەکێ دە راگھاند، ئەو دێ بەردەوام بن ل سەر رووبرووبوونا ئێریشا دەستەیا تەحریر ئەل-شام (ئەنیا ئەل-نوسرایا بەرێ) و چەکدارێن ئۆپۆزسیۆنێ یێن ھەڤالبەندێن وێ، کو گھشتنە دەردۆرا باژارێ حەلەبێ.
ئارتێشێ د داخویانیەکێ دە گۆت: “ھێزێن مەیێن چەکدارێن کو ل ئەنیێن حەلەب و گوندەوارێ ئدلبێ تەڤدگەرن، د رووبرووبوونا ئێریشا مەزنا رێخستنێن تەرۆریست دە بەردەوامن.”
ژ ئالیەکی دن ڤە، سێ ژێدەرێن ژ ئارتێشا سووریەیێ ژ “رویتەرس” رە گۆتن، وان رێیێن سەرەکەیێن کو دچن حەلەبێ گرتن، پشتی کو فەرمان ژ سەرکرداتیا ئارتێشێ ھات کو ب ئاوایەکی “ئەولە” ژ تاخێن کو ژ ئالیێ چەکداران ڤە ھاتنە دۆرپێچکرن، ڤەکشن.
ل گۆری زانیاریان، رەوشا تاخێن کوردان ل حەلەبێ (ئەشرەفیە و شێخ مەقسوود) کو د دەستێ ھێزێن سووریەیا دەمۆکراتیک (ھەسەدێ) دە نە، ھەتا نھا ئارامە و چەکدارێن دەستەیا تەحریر ئەل-شامێ نەکەتنە وان، لێ مەترسی ل سەر کوردێن وان ھەر دو تاخان ھەیە.
