پارتیا دەمۆکراتا کوردستانێ ترکیەیێ (PDK-T) ئیرۆ 11 بەرچلە د داخویانیەکێ دە راگھاند، “ھێڤی و داخوازێن مە ژ سوریەیا نوو؛ ھەموو جڤاک (ئۆل، مەزھەب، نەتەوە و بەشێن ئەتنیکی) بگھن مافێ خوە.”
داخویانیا پەدەکە-تێ:
رۆژا 12/8/2024 رێخستنا ب ناڤێ ھەتەشێ ئێرشی سووریێ کر، رەژما بەعس فەلشاند، ھەموو ئەرکێن دەولەتا سووری ب دەست خوە ڤە ئانی. پر بالکێش بوو کو ئارتێشا سووری دەست نەھلانی، چەکدارێن ھەتەشێ چەکێ وان ل سەر پشتا پیکابا، ئەو ل سەر مۆتۆرسیکلێتان سوار د بەر تانکێن رەژمێ دە بێ ترس دکەتن باژاران، ئارتێشا ئەسەد شەر نەکر، وەلات رادەستی ھەتەشێ کر. رووسیا و ئیران خوەدێ گراڤی دۆستێ ئەسەد بوون. روسیا د شەرێ ئوکرانیا دە ژ قرام کەتبوو، وەستیا بوو، ئیران ژی د شەرێ حەماس و ئێسرائیلێ دە تێک چووبوو باوەر ب خوە نەما بوو. ژ ڤان روودانان ھەردوو دۆستێن ئەسەد بێ دەنگ مان و و ب تەنێ ھشتن. ئەسەد وەلات تەرک کر رەڤیا رووسیا. ئیرۆ سووریە ب تەمامی کەتە دەستێ رێخستنا ھەتەشێ ئەڤ رەوش دێ ھەتا چەند سالان ئالۆزی ھەبن ژ بەر کو گەلەک رێخستنێن بەردەنگ فەرزەندا خوە ھەنە. ل سووریێ حکومەتەکە نوو دە چاوا ب کی رە ئاڤا ببە زاحمەتیێ خوە ھەیە. ئەم دخوازن د حکوومەتا نوو دە ھەر جڤاک (ئۆل، ئەتنیک و نەتەوە) جی بگرن. سووریە دەولەتەکە پر ئۆل، پر مەزھەب، پر ئەتنیکیە. د ئەسلێ خوە دە سووریە سەد سال بەرێ نە دەولەت بوو. د 24/10/1945 ب پەیمانا ناڤدەولەتی سەرخوەبوون وەرگرت ھەتا ھنگێ ئەو کۆلۆنیا فرانسا بوو. ئیراق ژی کۆلۆنیا بریتانیا بوو ھەردوو ژی کۆلۆنا بوونە دەولەت. سبە رۆژ؛ ئامەریکا، رووسیا ئێسرایل، فرانسا و ئینگلتەرە دێ چ ھەلوەست و بریاران ل سەر سووریا نوو بدن نە دیارە.
ئەم ڤێیا ژ بیر نەکن. گەلۆ حەسابێ زیندانا ب “ناڤێ سەندایا” کو چەند قات د بن ئەردێ دە، ئەو کەسێن ب دەھان سال بێ کەس و کووس، بێی ھلما ئەرد و ئەزمان و بێیی رۆناھیا رۆژێ، ژ دلۆڤانیێ بدوور، بێ نان و ئاڤ ل سەر بەتۆنێ د بن ئشکەنجێ دە روو ب روو بوونە. دێ کەنگ و کی ژی رەژێما بەعس، ژ بەشار ئەسەد بخوازێ و وەرە خوەستن! یا ژ ھەموو تشتان گرینگترین ئەڤ ب خوەیە. ئەم ب ھێڤینە کو دێ ھندەک ڤان حەسابان بپرسن و ل وێ گۆرێ سزا بدن.
یا ھەری گرنگ:
1- ترکیە دێ چ بکە؟ ئارمانجا ترکیێ ئەو بوو کو: 30-40 کم ب کوورایی بکەڤە ئاخا سوریێ دا “سینۆرێ خوە ژ تەرۆریزمێ بپارێزە” ئانھا ل سینۆر؛ د ھوندرێ ئاخا سووری دە ب جھ بووییە. گەلۆ لەشکەرێ خوە دێ ژ سووریێ بکشینە یان نا؟ ئەو دەولەتێن ب سووریێ ڤە تێکلدارن دێ ڤێ ژ ترکیێ بخوازن.
2- ل رۆژئاڤا سووریێ ھەبوونا پەیەدێ دێ چاوا بە، ئیسرایل، ئامەریکا، رووسیا و ئیران دێ چ ھەلوەستان دانن ئەڤ ھەموو پرسێن مەترسیێ نە. دەما ئەم ل مەسەلێ ب چاڤەکی کوردەواری بنێرن د مەسەلا سووریا نوو دە کورد خوەدی پەیڤ و ئاکتۆرێ ھەری گرینگن. نوونەراتیا کوردان ل سەر ماسا ئاشیتیێ یا سوریێ تەمسیلیەتا خوە ھەبە دا کو مافێ کوردان بخوازە، پێویستە ئەو کەس د دپلۆماسیێ دە دەنگ ڤەدا بە، ب تەجرووبەیێن ناڤ خوەیی و یێن ب تێکلیێن ناڤدەولەتان دە زانا و ناسکری بە. ئەو ژی سەرۆک بارزانی ب خوەیە. ئەم باوەر دکن کو دنیا ژی دێ قیما خوە پێ بینن، ئەرێ بکن.
ھێڤی و داخوازێن مە ژ سوریا نوو ئەڤە کو؛ ھەموو جڤاک (ئۆل، مەزھەب، نەتەو و بەشێن ئەتنیکی) بگهن مافێ خوەیێ مرۆڤاھی و سووریا نوو دە ھەموو کەس ب دادوەری، دلۆڤانی، ب ئارامی و ب تەبایی ل گەل ھەڤ ژیان بکن.
