تێکچوونا 61 سالی یا رەژیما ئەسەد بوویە یەک ژ مژارێن سەرەکی یێن رۆژەڤا جیھانێ. د ڤی دەمی دە پێدڤیە کورد ب عاقلێ سەلیم تەڤبگەرن، لێ پەکەکە و مەدیایا وێ ھێژ ژی دخەبتن دا کو توڤێ نیفاقێ د ناڤبەرا کوردان دە بچینن.
مەدیایا پەکەکێ و ھندەک سازیێن یەنەکێ یێن ل باشوور کار دکەن کو ب وەشاندنا نووچەیێن دەربارێ گرتنا دەرگەھێ سێمالکا قاشوو د گەل ھلوەشینا رەژیما ئەسەد ڤە گرتییە، ب ڤی ئاوایی ھەول ددن کوردان ئیستیفزاز بکن.
دەرگەھێ سێمالکا ڤەکرییە و کارێ خوە دمەشینە
دەرگەھێ سێمالکا ل پێشخابور یێ باشوورێ کوردستانێ و ب ئالیێ رۆژئاڤا ڤە تێ ناسکرن، گرێدانەکا گرینگا ھەر دو پارچەیێن کوردستانێیە. مەدیایا پەکەکێ د چار رۆژێن داوی دە نووچەیێن کو دەرگەھێ سێمالکا گرتییە بەلاڤ دکە.
پشتی ڤان نووچەیان کو بوونە سەدەما کارڤەدانان، دارکا مازی لێکۆلینەک پێک ئانی. ئەنجامان نیشان دا کو دەرگەھێ سێمالکا گرتی نینە و د کارێ رۆژانە دەیە.
چاڤکانیێن دارکا مازی گۆتن: “دەرگەھێ مە ھەر وەکی بەرێ کار دکە، و ب دەستپێکرنا بوویەرێن حەلەبێ، ھاتن و چوونا مرۆڤان، خوراک و پێدڤیێن پزیشکی زێدەتر بوونە ژ ھەر دەمێ.”
چاڤکانیێ گۆت: “مە نییەت نینە کو دەرگەھێ بگرن. ھەتا نھا ژی ژ ئالیێ مە ڤە چ پرسگرێک دەرنەکەتیە. لێ پەیەدێ دەریێ سینۆری ژ بۆ ئارمانجێن سیاسی بکار ئانی، وان ب خوە دەرگەھ گرت یان ژی ب ھندەک رەفتاران دخوەست دەرگەھ بێ گرتن.”
رێڤەبەریا پەکەکێ و پەیەدێ بەرێ ژی گەلەک کامپانیایێن ئێریشی ل سەر دەرگەھێ سێمالکا ل دژی ھەرێما کوردستانێ کربوون. د 15 کانوونا 2021 دە، چەتەیێن ب ناڤێ “جوانێن شۆرەشگەر” جوانێن عەرەب کێشابوون دەرگەھی و مۆلۆتۆڤ ب وان دابوون ئاڤێتن.
دەرەوا ھەڤبەش یا یەنەکێ و پەکەکێ دەربارا دەریێ سێمالکا …
مەدیایا پەکەکێ ب بەردەوامی نووچەیێن دەرەو وەکی گرتنا دەری ددە و کوردان ل دژی ھەڤ هان ددە. ژ بۆ خورتکرنا ڤێ ئیدیعایێ لگەل یەنەکێ ھەڤپار تەڤدگەرن. ھندەک کەس و سازی ھەول ددن نووچەیێن دەرەو یێن مەدیایا پەکەکێ لگەل یەنەکێ ددە گۆتن کو “دڤێت ھەرێما کوردستانێ دەریێ سینۆری یێ سێمەلکا ڤەکە.”
ھەڤکاریا وان یا د ڤێ مژارێ دە نیشانەیەکا ھەڤپارە کو پەکەکە لگەل رۆژەڤا خوە یا ل سەر رۆژئاڤا ھەول ددە کوردان ب کین و نەفرەتا ل ھەمبەری ھەرێما کوردستانێ تەشویق بکە. ئەو دێ نە خەلەت بە کو مرۆڤ پێشبینی بکە کو دێ د پێشەرۆژێ دە ژی بەردەوام بکە. ژ بەر کو پەکەکێ ستراتەژیا خوە ژ بۆ کو رۆژئاڤا بکە قادەکا خوەیا رانتێ پێشخستیە.
پەکەکە ئێریشی ھێڤیێن کوردان یێن “تفاقا ناڤبەرا کوردان ل رۆژئاڤا” دکە.
د ڤان 13 سالێن بۆری دە پەکەکێ رۆژئاڤا وەکە قادەکا خوە یا قازانجێ ب رێخستن کر و لگەل ئیرانێ رۆژئاڤا داگیر کر. لگەل پێڤاژۆیا پێشکەتنا ل سووریەیێ، کورد ل بەندێ نە کو پێکھاتەیێن کوردێن ل رۆژئاڤا لگەل ھەڤ تەڤبگەرن. پەکەکە ب گۆتنا “پەدەکە و حکوومەتا کوردستانێ هەڤپەیمانێن ترکانن، دژمنێن دەستکەفتیێن رۆژئاڤا نە” دخوازە ھێڤیێن گەل ب داوی بکە. ژ بەر ڤێ راستییا پەکەکێ نە شاشە کو مرۆڤ ل بەندێ بە کو ئەو دێ د پێشەرۆژێ دە ئێریشێن ب ڤی رەنگی بکە.
ھەر وھا چاڤکانیێن ھەرێمی دیار کرن کو لگەل پێشکەتنا رەوشا شەری دبە کو گەلێ رۆژئاڤا لگەل پێلەکا مەزن یا کۆچبەریێ بژی و دبە کو رێڤەبەریا پەیەدێ دەری بگرە دا کو بکارە گەل راوەستینە.
