ژ بۆی کو یەکیتیا د ناڤبەرا کوردان دە ل رۆژئاڤا چێبە، دڤێت پەکەکە ڤان گاڤێن بنگەھین باڤێژە:

ھلوەشینا رەژیما ئەسەد دەریێ گەلەک دەرفەتان ل رۆژئاڤا ژ بۆی کوردێن وێ ھەرێمێ ڤەدکە. ھەموو کورد دخوازن کو ئەنەکەسە و پەیەدە ب ھەڤ رە تەڤبگەرن و ڤێ دەرفەتێ باش ب کار بینن، ب کورتی کورد یەکیتییێ دخوازن. و ھەموو کورد گازییا “یەکیتیا  رۆژئاڤا” دکن، مخابن ئەڤ گازی تەنێ ب ھەستییاری نە، یەک ئالی نە و ل سەر بنگەھەکا راستین ئاڤا نەبوونە، گازیێن نیڤبەرو نە.

ژ بۆ کو ئەم ب ئاوایەکی گشتی و رییالیست ل مژارێ بنێرن، دەستپێکێ دڤێت ئەم ڤان ھەر دو خالان ببینن:

1- ژ بۆ کو د رۆژئاڤایێ کوردستانێ دە یەکیتی پێک وەرە، دڤێت دو ھێزێن سیاسی یێن سەرەکی یێن کوردستانێ، واتە پەکەکە و پەدەکە، ل سەر ھندەک مژاران ب گشتی ل ھەڤ بکن. ژ بەر کو مەسەلەیا رۆژئاڤا ژ رەوش و دەنگێن سیاسی یێن پارچەیێن دن یێن کوردستانێ جودا نینە.

2- ژ بۆ یەکیتییا رۆژئاڤا، گەلێ کورد، رێڤەبەرێن رۆژئاڤا و ھەموو ئالی گازی باشوورێ کوردستانێ و سەرۆک بارزانی دکن. ئەڤ شاشە، یێن کو دخوازن یەکیتی پێک بینن، دەستپێکێ دڤێت گازی پەکەکێ بکن.

بەلێ، گاڤا ئەم ل چارچۆڤەیا ڤان ھەردو خالان دنێرن، دبینن کویێن کو دخوازن د رۆژئاڤا دە یەکیتیێ ئاڤا بکن، دڤێت دەستپێکی گازی پەکەکێ بکن. ئەم مژارێ ب کورتاسی پێناسە بکن.

گازیا یەکەم: دڤێت پەکەکە رۆژئاڤا وەکی قادەکا ژ بۆ مەشرووعبوونا خوە بکار نەینە.

دو ھێزێن کو دڤێت د رۆژئاڤا دە یەکیتیێ ئاڤا بکن، ئەنەکەسە و ھێزێن ھەسەدێ، نە ب تەمامی سەربخوە نە. ئەنەکەسە تێکلیێن وێ یێن لگەل پەدەکێ ھەنە، ھەسەدێ ژی تێکلیێن وێ لگەل پەکەکێ ھەنە. ھەروھا سیاسەتا ھەر دو ئالیان ژی ناڤەندا وان د باشوورێ کوردستانێ دەیە. لێ پەیوەندیێن ئەنەکەسێ لگەل پەدەکێ بەردەوام و سەربخوە نە. لێ بەلێ رێڤەبەریا پەیەدێ ب تەمامی پێکھاتەکا پەکەکێ یە.

میناک، ئەم ل وان کەسێن د ناڤا پەیەدێ دە بنێرن، وەک ئیلھام ئەحمەد (رۆناھی)، جەنەرال مەزلووم (شاھین جیلۆ)، ئاسیا عەبدوللاھ (دلان دێرک)، فەوزا یوسف (زاخۆ زاگرۆس) ئەڤ نە تەنێ بەرێ ئەندامێن پەکەکێ بوون. نوکە ژی ئەڤە ئەندامێن کۆمیتەیا پەکەکێ یا رۆژئاڤا نە و ھەتا ژ ئالیێ کەسێن وەک سەبری ئۆک و فاتما دێرسم ڤە راستەراست تێنە برێڤەبرن. ئەڤ رەوش وان نە تەنێ تێکلدار ب پەکەکێ دکە، ژ بەر ڤێ ناسنامەیا وان یا پەکەکێ، ئەو نە ل سەر بەرژەوەندیێن رۆژئاڤا، بەلکو ل گۆری فەرمان و بەرژەوەندیێن پەکەکێ مژار و بوویەران دنرخینن.

ئەم ب ئەشکەرە بێژن کو ھەلوەستا نەرم یا ھەسەدێ ژ بەر زەختا ئەمەریکایە. ئەگەر مەزلووم عەبدی جارنان کاربە تشتەکی دەرڤەیی پەکەکێ ببێژە، ئەڤ ژی ژ ئالیێ ئەمەریکا ڤە ل سەر وی ھاتییە سەپاندن.

پەکەکێ، ژ دەستپێکا بھارا عەرەبی ڤە رۆژئاڤا وەک قادەکا کو خوە ب سەردەست بکە و ژ سەر وێ خوە مەشرووع بکە دیت. ژ بەر ڤێ یەکێ، وێنە و ئالایێن ئۆجالان ل رۆژئاڤا تێن بەرزکرن، ب ئاوایەکی کو ھەر کەس وان ببینە. بەرگێن پرتووکێن پەروەردەیێ ب وێنەیێن ئۆجالان ھاتنە چێکرن.

نھا ھەم ھێزێن وەلاتێن رۆژئاڤا ھەم ژی ئەمەریکا تەکلیفا وان بۆ ھەسەدێ وھایە: “پەیوەندیێن خوەیێن لگەل پەکەکێ سینۆردار بکن، ئەم دێ ژ بۆی وە ببن مەرتال”. ھەروھا ئەنەکەسە ژی وھا دبێژە: “ئەم چما زارۆکێن خوە بشینن دبستانێ دا کو ژیانا ئۆجالان ھین ببن و ژ بۆ ئۆجالان درووشما باڤێژن؟”

ل سەر ڤێ بنگەھێ، یێن کو یەکیتیێ دخوازن، دەستپێکی دڤێت ڤان گازیان ژ پەکەکێ بکن: “رۆژئاڤا د وارێ دیارکرنا چارەنووسا وێ دە ئازاد بھێلە، کادرۆیێن خوە یێن کۆمیتەیا پەکەکێ یا رۆژئاڤا بکشینە، تەنێ خەباتکارێن رۆژئاڤایی یێن ل سەر کاری بلا بمینن. د ئاستا رێڤەبەرییا کەجەکێ، پەیەدێ و پەژاکێ دە جھ نەگرن. ژ دەرڤەیی گازی و برینداران، رۆژئاڤا وەک جھێ بجیبوونێ ژ بۆ رێڤەبەرێن پەکەکێ نەیێ بکارئانین.”

گازییا دویەم: پەیوەندیێن خوە یێن ل دژی ھەرێما کوردستانێ و پەدەکێ ل بەغدایێ راوەستینن

ئەم ب پرسەکێ دەست پێ بکن: ئەگەر ئەم دخوازن کوردان ل سووریێ و رۆژئاڤا لگەل ھەڤ بشینن شامێ، ما نە دڤێت ژ بۆ بەغدایێ ژی ھەمان یەکیتیێ بخوازین؟ بێگومان، دڤێت ئەم بخوازین.

ژ بۆ کو یەکیتیا کوردان ل رۆژئاڤا پێک وەرە، دڤێت پەکەکە ھەلوەستا خوە یا ل باشوورێ کوردستانێ و ئیراقێ بگوھەرینە. ئەرێ، پەکەکە بەرێ ژی دژمنێ پەدەکێ بوو، لێ ژ سالا 2013 ڤر ڤە ب ئاوایەکی سیستەماتیک لگەل رێخستنێن شیعا ل دژی پەدەکێ دژمناھیێ دکە. بنێرن، ئەڤ نە ھەڤرکییە، ئەڤ راستەراست دژمنییە. گاڤا دەولەتا ئیرانێ ھەولێر بۆمبەباران دکر و سڤیل دکوشتن، مەدیایا پەکەکێ وەکە کووچکەکێ ب وەفا ل گەل ئیران و رەژیما شیعە یا ئیراقێ دخەبتی.

رێڤەبەرێن پەکەکێ ل بەغدایێ و سلێمانیێ دخوازن قەبری پەدەکێ بکۆلن. ئەو ھەر تشتی دکن دا کو ل بەغدایێ پەدەکێ لاواز بکن و بکەڤن جھێ وێ. ئەگەر پەکەکە دخوازە ل رۆژئاڤا یەکیتیێ پێک بینە، دەستپێکێ دڤێت پەیوەندیێن خوەیێن ل دژی پەدەکێ ل بەغدایێ ببرە. پەکەکە دبێژە ئەم ب ھەڤ رە بچین شامێ، لێ ئەز دێ ل بەغدایێ ل دژی تە یەکیتیێ ئاڤا بکم، ئەڤ یەک نایێ قەبوول کرن.

بێگومان، مەسەلەیا شنگالێ ژی ھەیە. پەکەکێ خوەست ئێزدییان بکە دژمنێ ھەرێما کوردستانێ. ژ بۆ شنگالەکا بێ کوردستان و کوردستانەکق بێ شنگال، لگەل ئیراقێ ل ھەڤ کر. ئالا حەشدا شەعبی دا سەر ملێ جوانێن ئێزدییان. ئەو کەسێ کو ل رۆژئاڤا دبێژە “قامشلۆ بلا ب شامێ ڤە بێ گرێدان ” چاوا خایینە، ل باشوور ژی کەسێ کو دبێژە “شنگال بلا ب ئیراقێ ڤە بهێت گرێدان” ژی ئەوقاس خایینە.

مادەم کوردان دڤێت ل شامێ ب ھەڤ رە بن، ھنگێ پەکەکە ژی دڤێت دەست ژ ئیتیفاقێن ل دژی پەدەکێ ل بەغدایێ بەردە. ژ بۆ ڤێ یەکێ، گازیا دویەم ژ پەکەکێ ئەڤە: “ژ ئیتییفاقێن ل دژی پەدەکێ ل بەغدایێ و سلێمانیێ دەرکەڤە، دەزگەھێن خوەیێن د ناڤ ھێزێن حەشدا شەعبی دە بشکینە، رابگەهینە کو تو شنگالێ وەک پارچەیەکا کوردستانێ دبینی، دەست ژ ئاستەنگکرنا جیبجیکرنا پەیمانا د ناڤبەرا ھەولێر و بەغدایێ دە بەردە، هاندان و پلانێن ئێریشێن ژ سلێمانیێ بۆ سەر ھەولێرێ راوەستینە.”

گازییا سێیەم: دڤێت مەدیایا پەکەکێ زمانێ نەفرەتێ یێ د ناڤبەرا کوردان دە بھێلە

مەدیایا پەکەکێ ل سەر بنگەھا دژمنیا پەدەکێ ھاتیە رێخستن بوون. ئەڤ مەدیا ژ بلی کو د ناڤبەرا کوردان دە نەفرەتێ بەلاڤ بکە، وەلاتپەروەریا کوردان ژ ھۆلێ راکە و کوردان ل دژی باشوورێ کوردستانێ، کو تاکانە دەستکەتیا کوردانە هان بدە، چ خەباتێن دن ناکە. مەدیایا پەکەکێ بوویە پارچەیەکا پرۆژەیەکا ئیراقێ ژ بۆ ژناڤبرنا ستاتوویا ھەرێما کوردستانێ.

میناک، دەولەتا ئیراقێ ب سیاسەتەکا سەردەستکار رێ ل بەر فرۆتنا پەترۆلا کوردان دگرە، لێ مەدیایا پەکەکێ پرۆپاگاندا دکە کو ئیراق دەستکاریەکا ئابۆری دکە. گاڤا ئیران ئێریشی ھەولێرێ دکە، ئەو دبێژە “نڤیسینگەھێن ئیسرایلێ ل ئەربیلێ ھاتن لێدان”. گاڤا کەرکووک ھاتە داگیرکرن، رێڤەبەرێن پەکەکێ دەرکەتن سەر شاشێن تیڤیان و گۆتن “پارادیگمایا مە سەرکەفت”. گاڤا دەولەتا ئیراقێ ل کەرکووکێ کوردەکی دکوژە، مەدیایا پەکەکێ ئەوقاس بێشەرەفانە دەردکەڤە و دبێژە “پەدەکێ ئالۆزی دەرخست” ب ڤی ئاوایی ئێریشی دەستکەتیێن کوردان یێن باشوور دکە.

مەدیایا پەکەکێ دخوازە مالباتا بارزانی و خەباتا وان یا سەدان سالان ل دیرۆکا کوردستانێ وەک شەیتان دەست نیشان بکە. دژمنکارییا پەکەکێ گەھەشت ئاستەکی کو د سالڤەگەرێن ئەنفالا بارزانییان دە مالپەرێن وان یێن مەدیا جڤاکی دبێژن نەخشەل بارزانییێن مایی. 

ئیرۆ ژی، گاڤا ئەسەد ھاتیە ھلوەشاندن و ھەر کەس ل یەکیتیێ دگەرە، مەدیایا پەکەکێ ھێ ژی لێدگەرە کا دێ چاوا بکارە ئێریشی پەدەکێ بکە.

یێن کو دخوازن یەکیتیێ ل رۆژئاڤا پێک بینن، دڤێت گازی پەکەکێ بکن و ببێژن: “د مەدیایا خوە دە دەست ژ بێروومەتکرنا بزاڤێن سیاسی یێن دەرڤەیی خوە بەردە، دەست ژ دژمناتیا پەدەکێ و بارزانی و چەوساندنا دیرۆکا کوردان بەردە.”

مەزنترین ئاستەنگا ل پێشیا یەکیتیێ ل رۆژئاڤا پەکەکەیە

ئەگەر پەکەکە ببێژە “ئەز چ تەعویزان نادم، من چاوا رۆژئاڤا فرۆتە ئەسەد، نھا ژی دێ وەسا فرۆشم جۆلانی، دەریێ من یێ سوود وەرگرتنێ بلا نەھێت گرتن، دێ ژ ئیراقێ و حەشدا شەعبی ژی سوودێ وەرگرم و ھتد… و رۆژانە خەبەران بێژم مالباتا بارزانی” ھنگێ ل رۆژئاڤا یەکیتی چێنابە.

تشتەک ھەیە کو دڤێت ژ ھەر کەسی رە زەلال بە. پەکەکێ ژ سالا 2012 ڤە ژ بۆ کو رۆژئاڤا د دەست خوە دە بگرە، ب پلان یەکیتیا کوردان ئاستەنگ کریە، و نھا ژی مەزنترین ئاستەنگ ژ بۆ یەکیتیێ ھەبوونا پەکەکێ یە. ژ بۆ ڤێ یەکێ، گازیا یەکەم ژ بۆ یەکیتیێ ل رۆژئاڤا دڤێت ئەڤ بت: ” ئەی پەکەکە رۆژئاڤا نەکە قووربانێ بەرژەوەندییێن خوە یێن حیزبی.”