ب پێڤاژۆیا کو ل سووریێ پێش دکەڤە، کورد ل هەر چار پارچەیێن کوردستانێ چاڤێن خوە بەردانە رۆژئاڤا. هێڤیا هەموو کوردان ئەوە کو یەکێتیا د ناڤبەرا کوردان دا پێک وەرە و ب هەیئەتەکا هەڤپارا دانوستاندنێ بچن شامێ. هەتا گەلەک ئالی و سازیێن رۆژئاڤا ژی، ل شوونا کو ل سەر پرسگرێکێن کەڤن گۆتووبێژان بکن، دخوازن کێشەیێن رابردوو دانن ئالییەکێ و بالا خوە بدن لێگەرینێن ل سەر پاشەرۆژێ. د ڤێ مژارێ دا پێکهاتەیێن په‌كه‌كێ یێن ل رۆژئاڤا ژی گەلەک جاران بانگ دکن. لێ بەلێ وان چ جارا ب ئاواکی زەلال نەگۆتن کا ئەو چ جوره یەکێتیەکێ دخوازن. ژ بەر کو په‌كه‌كێ هێژان بریارا خوە نەدابوو.
لێ بەلێ هەلوەستا کو مەدیایا په‌كه‌كێ د ڤان دو رۆژێن بووری دا نیشان ددە، ڤێ یەکێ ددەته خویاکرن: په‌كه‌كێ دەربارێ رۆژئاڤا دا بریارا خوە دایە. ل رۆژئاڤا یه‌كێتیا د ناڤبەرا کوردان دا ناخوازە. ئەڤ یەک ژ نووچەیەکێ کو د ئاژانسا نووچەیان یا فراتێ دا، کو ئەم دکارن ببێژن مەدیایا سەرەکی یا په‌كه‌كێ یە، دەرکەتیە، تێ فێم كرن.
ئاژانسا نووچەیان یا فراتێ: “ل هەولێرێ جڤینا هەڤپارا میتێ، پاراستنێ و ئەنه‌کسێ”
مەدیایا په‌كه‌كێ ب مانشێتا “ل هەولێرێ جڤینا هەڤپارا میتێ، پاراستنێ و ئەنه‌کسێ” نووچەیەک بەلاڤ کر. د نووچەی دا کو ژ 5 رێزكان پێک دهێت، هات گۆتن کو ئەڤ هەر سێ هێز گه‌هشتینە هەڤ، ئەنه‌که‌سه ل دژی یه‌كێتیێ یە و هات گۆتن کو «جڤینێ سێ ده‌مژمێران ده‌وام کری یه”. نووچە ب تەمامی ل سەر مێزا په‌كه‌كێ هاتیە ئامادە کرن. و د راستیێ دا ئەڤ نووچەیا کورت و بچووک دکارە وەک ئاگاهدارکرنا تەڤگەرەکا نوو یا مەزن یا په‌كه‌كه یا فیتنەکار بهێته دیتن.
هەلبەت ل هەولێرێ جڤینەکا وسا تونەیە. لێ جڤینێن په‌كه‌كێ یێن ل گه‌ل دەردۆرێن سیاسی هەم ل برۆکسلێ، هەم ل ئەنقەرەیێ و هەم ژی ل کەرکووکێ هەنە. مژارەکا هەڤپارا ڤان هەموو جڤینان ژی “رۆژئاڤا”یە. په‌كه‌كه، پشتی رەوشا داوی، ل رۆژئاڤا د ناڤ لێگەرینا “کا ئەز یه‌په‌گێ و په‌یه‌دێ یا کو د دەستێ من دا مانە، ب بهاتر بفرۆشمه کێ” دا یە. رێڤەبەرێن په‌كه‌كێ یێن کو ل سەر فڕینا چووچكه‌كێ شرۆڤه‌یان دکن، پشتی کەتنا دۆستێن وان یێن 40 سالی ئانكو حزبا به‌عس یا سووریێ و رەژیما ئەسەد، هێژان دەرنەکەتنە و دو گۆتنێن بچووک ژی نەگۆتنە. ژ بەر کو حەسابێن وان یێن مالی نە ل گۆری حەسابێن بازارێ بوون. په‌كه‌كه هەتا بەری سالەکێ هزر دكر کو ل رۆژهلاتا ناڤین ئیران ب سەر کەتیە و ژ بەر کو ئەو ژی یەک ژ وان سازیێن کو ئیران ل ده‌ڤه‌رێ پشتگریێ دده‌تێ و ب ڤێ قەباحەتی و سەرخوەشیا خوە ڤە ل کو دەرێ رێخستنەکا کوردی یا ژ خوە جودا ددیت، ئێریشی وێ دکر.
په‌كه‌كه هزر دكه‌ت کو ئیران و ئیراق دێ په‌ده‌كێ بچووک بکن و جهی ده‌نه وێ، و ل شامێ دێ كاریت چاوا بخوازیت وسا بکەت. و ب ڤێ ئاقلسڤکییا خوە ئاقلی دفرۆشنه دنیایێ.
په‌كه‌كه ب بازارکرنا رۆژئاڤا ڤە د خوازیت بنکەتنا خوە قەرەبوو بکەت
لێ پێڤاژۆ وه‌سا نەچوون. ئیرانێ هەموو کەلەهێن خوە یەک ب یەک وندا کرن. یه‌نه‌كه و په‌كه‌كه ژی ب تێکچوونا ئیرانێ و هلوەشینا پرۆسه‌یا هیلالا شیعی ب هەڤ رە تێک چوون. سەدەما کو په‌كه‌كه د ڤان دەهـ رۆژێن داوی دە ل هەمبەر تێکچوون و دەرکەتنێن نوو یێن ل رۆژهلاتا ناڤین بێدەنگ مایه، ئەوە کو ئەو پلانا خوە بۆ ده‌ركه‌تنا ژ ڤێ رەوشا تێکچوویی چێدکەت. په‌كه‌كه، ستاتوویا کو ل رۆژهلاتا ناڤین دێ ب رۆژئاڤا هێته دان و حسابا بکارئانینا چەند دەرفەت و پشتگریێن مایی یێن رۆژئاڤا ژ بۆ ڤەشارتنا تێکچوونا خوە دکەت.
په‌كه‌كه د راستیێ دا وەک سێ پارچەیان بوو. ل گه‌ل مه‌زلووم عەبدی چاڤ ل هێزێن ئەمەریکایێ دکر، ئۆجالان د ناڤ باسک و ملێن ترکان دا بوو، باییک د هەمبێزا ئیرانێ دا بوو. لێ دیسا ژی په‌كه‌كه گەلەک پشتراست بوو کو ل سووریێ ئەسەد و ئیران دێ ب سەر کەڤن. دەما ل قەسرا ئەسەد ژی ئالا سووریێ هاتبوو داخستن، په‌كه‌كێ ب هێڤیەکا داوی ئالا رەژیمێ ل قامشلۆ نەداخست. لێ نها په‌كه‌كه یا ئیرانی تێک چوو. په‌كه‌كه یا کو ناڤەندا وێ سلێمانی یە، ژ بۆ کو خوە ژ ئیرانا کو تەنگ و بچووک دبیت رزگار بکەت، دێ خوە وه‌سا لێ كه‌ت مینا کو کەتبیتە بن باسکێن ئۆجالان ئان ژی مه‌زلووم عەبدی دەستنیشان بکەت.
د لۆزانا شامێ دا، دێ کی نوونه‌راتییا کوردان بکەت؟
مالپەرێ نووچەیان یێ په‌كه‌كێ رۆژنیۆز، کو ل سلێمانیێ وەشانێ دکەت، رۆژێن بۆری نڤیسەک وەشاند و سەرناڤێ “ل لۆزانا نوو یا شامێ دێ کی کوردان تەمسیل بکەت؟” دانا. گاڤا هێژ ل شامێ هەڤدیتنەک ژی نه‌بوو، بالکێشە کو دبێژن دێ ل شامێ لۆزانەک دەرکەڤیت. دبیت کو ژ شامێ سیڤه‌رەک ژی دەرکەڤیت. لێ هوون دزانن کو په‌كه‌كه ژ پەیمانا سیڤەرێ، یا کو بریارا ئاڤاکرنا دەولەتا کوردی دا بوو، حەز ناکەت. ئۆجالان گەلەک جاران پەسنا لۆزانێ دا و هەتا گۆت “ئەز لۆزانا جڤاکی پێشنیار دکم”. نیەتا په‌كه‌كێ ئەوە کو ل سه‌ر مێزا لۆزانێ یا کو دێ ل شامێ هێته ئاڤاکرن جهه‌كی بگریت. لێ مەدیایا په‌كه‌كێ د نڤیسا خوە دە گۆتیە کو په‌ده‌كه دێ جهێ حه‌سه‌ن خەیری گریت. حه‌سن خەیری مرۆڤەکی جوان و بێ تەجرووبە بوو، هەول دا کو ژ خەلەتیێ ڤەگەریت، لێ هاته سێدارەدان. بلا ئەم ئەشکەرە بێژن، حەسەن خەیری ژ جەمیل باییکێ کو دبێژیت “ئەم پێشیا هلوەشینا ئیرانێ دگرین” و ژ ئۆجالانێ کو دبێژیت “دیا من ترکە، ئەز خوە وەکە کورد نابینم” ب روومەتترە.
په‌كه‌كه ل بەندا مێزا لۆزانێ یە، دا کو بریارێ بدەت کا دێ رۆژئاڤا د مەزادێ دا فرۆشیتە کیژان هێزێ.
ل هەولێرێ چ جڤین چێنه‌بووینه لێ ل کەرکووکێ چڤین چێبوون
فەرماندارێ لەشکەرییێ حه‌شدا شه‌عبی فالح فەییاز دەما ئەڤ گۆتار دهات نڤیساندن ل کەرکووکێ بوو، قەیس خه‌زعه‌لی كو ژ رێخستنا رادیکالا شیعی یا حەشدا شەعبی یه ژی دیسا ل کەرکووکێ یە. رێخستنێن شیعی یێن ئیراقێ تێکچوونا سووریێ گۆتووبێژ دکن. و ل گۆری ئاگاهیێن کو مە وەرگرتنە، ل گه‌ل په‌كه‌كێ و یه‌نه‌كێ ژی جڤین هاتیە لدارخستن. ژ په‌كه‌كێ هاتیە پرسین کا ئەمەریکا چ ل گه‌ل رێڤەبەریا رۆژئاڤا گۆتووبێژ کریە و چ ژێ خوەستیە. ژ بۆ رۆژئاڤا حه‌ركینا ئاگاهیێن رۆژانە هاتیە خوەستن. هەروه‌ها هاتیە راگهاندن کو ئیران ژ بۆ دەم بدەستخستنێ دخوازست کار بێن ئاستەنگ کرن.
یانی ل هەولێرێ جڤین تونەیە. لێ ل کەرکووکێ هەیە.
هەر وها جڤین ل ئیمرالیێ ژی تێن کرن. یانی جڤینێن ڤەشارتی ل جەم په‌كه‌كێ نە.
یێن کو یه‌كێتیێ دخوازن دڤێ هشیار بن
هەر کەس ژ بۆ رۆژئاڤا یه‌كێتیێ دخوازە. لێ ئەمێ دیرۆکا نێز ژ بیر نەکن. مە دیت کو په‌كه‌كه ژ 2012ێ ڤە چاوا لهەڤکرنێن هەولێر- دهۆکێ رزاند و رۆژئاڤا ژ بۆ خوە ب کار ئانی. نها ژی هەمان پێڤاژۆ ددۆمە. په‌كه‌كه، گۆتارا یه‌كێتیێ ل ڤێرێ و وێراهه دزڤرینیت؛ هەول ددەت دەمی ب دەست بێخیت و تێکلیان چێبکەت. ژ بلی ڤێ ئارمانجێ، داخوازا یه‌كێتیێ یا په‌كه‌كێ تونەیە.
