د پێنج رۆژێن داوی دە، رێبەرێن حه‌شدا شه‌عبی یێن ل ئیراقێ یەک ب یەک سەردانا کەرکووکێ کرن. د ناڤ سەردانڤانان دا سەرۆکێ حه‌شدا شه‌عبی فالح فەیاز و سەرۆکێ تەڤگەرا حیکمە یا ئیراقێ عه‌ممار حەکیم ژی هەبوون. گەلەک چاڤکانی دبێژن کو رێبەرێ عەسائب ئەهلولحەق قەیس خه‌زعه‌لی ژی ب ڤەشارتی هاتیە كه‌ركووكێ و ل وێرێ هن جڤین ئه‌نجام دا نه.
پشتی هلوەشینا رەژیما سووریێ، رەوش ل ئیراقێ ژی ئالۆز بوو. ده‌وله‌تا ئیراقێ ژ بەر كو رەوشا سووریێ ب پله‌یا یه‌كه‌م كارتێكرنێ ل سەر وێ دكه‌ت، گەلەکی ئالۆز و نەرحەتە. کۆمێن شیعه یێن ئیراقی کو ل گه‌ل ئسرائیلێ د ناڤا ئالۆزیەکا دەڤکی و لەشکەری دا نە، هێژ زێده‌تر ئالۆزن و دخوازن ل گۆری هەر ئێریشەکێ تەڤبگەرن. تەڤگەرا شیعی و هه‌ڤالبه‌ندێن وێ یا ڤێ داویێ ل کەرکووکێ ژی ب پلانسازییا ل گۆری ڤێ سەردەمێ و ڤێ ره‌وشێ تێ دیتن.
چاڤکانیێن هەرێمی دبێژن کو فالح فەیاز ل کەرکووکێ رێزەکا جڤینێن ڤەشارتی ئه‌نجام دا نه. هەروه‌ها ئاگاهی هەنە کو فەیاز ل گه‌ل قەیس خەزعه‌لی ژی هەڤدیتن کریە کو ب دزی ل کەرکووکێ یە. ئاگاهی هەنە كو خه‌زعه‌لی و مالباتا خوه، ژ بەر داخویانیێن خوه یێن توند ژ ئیسرائیلێ دترسن، له‌وما نێزیكی 6 مەهانه ل سلێمانیێ یە و ئەو ب خوە ژی پتریا ده‌می ل کەرکووکێ یە. نە تنێ خەزعه‌لی، گەلەک رێبەرێن دن یێن حه‌شدا شه‌عبی مالباتێن خوە هنارتینه سلێمانیێ.
بەشەکێ دن کو فالح فەیاز هەڤدیتن ل گه‌ل كرنه، کۆمێن ترکمەن و هنده‌ك سوننی یێن کو د ناڤ حه‌شدا شه‌عبی دە جهـ دگرن.
ل گه‌ل یه‌نه‌كێ و په‌كه‌كێ ژی هەڤدیتن پێک هاتن
بەشەکێ دن کو فالح فەیاز ب دزی ڤه هەڤدیتن ل گه‌ل ئه‌نجام داینه، په‌كه‌كه و یه‌نه‌كه نە. تێ گۆتن کو حه‌شدا شه‌عبی دخوازیت هەردو هێزان بینیته ل هەمبەری ئحتیمالا کو یه‌نه‌كه و په‌كه‌كه د پێڤاژۆیا هه‌یی دا ل پەی رێكێن سیاسی یێن جودا بکەڤن.
چاڤکانیێن کو دارکا مازی گه‌هشتیێ دبێژن کو سکرتێرێ فالح فەیاز ل گه‌ل رێڤەبەرێن یه‌نه‌كێ هەڤدیتن کریە. د هەڤدیتنا ل گه‌ل یه‌نه‌كێ خالا سەرەکی یا کو دەرکەتیه پێش ئەڤه بوو کو «ژ یه‌نه‌كێ هاته خواستن کو پرۆسه‌یا ئاڤاکرنا حکوومەتا نوو یا هەرێما کوردستانێ درێژ بکەت و ئاستەنگ بکەت ب ئاوایه‌كی کو حکوومەتا نوو نەهێته ئاڤاکرن». هەروه‌ها دەربارێ زەڤیێن گازا کۆرمۆر و مژارێن ئەنەرژیێ دا ژی ل گه‌ل یه‌نه‌كێ نیقاش هاتنه كرن.
زێده‌باری ڤێ مژارێن چاوانییا برێڤه‌برنا كاروبارێن په‌ترۆلێ، سپیكرنا پارێ ره‌ش پشتی ره‌وشا سووریێ، كو ل سه‌ر رێیا ئیران – سلێمانی – کەرکووک – ئیراقێ دهێته كرن، ل گه‌ل یه‌نه‌كێ هاتیه گۆتوبێژ كرن.
فەیاز نوونەرێ جەمیل باییکی نەدیم سەڤەن دیتیه
هەروه‌ها ئاگاهی هەنە کو سکرتێرێ فەیاز ل گه‌ل ئەندامێ کۆنسەیا رێڤەبەر یا كه‌جه‌كێ بەهزاد چارچەل (نەدیم سەڤەن) نوونەرێ جەمیل باییکی یه و د کۆمیتەیا پێوەندیێن دەرڤە یێن كه‌جه‌كێ دا یه، هەڤدیتن کریە.
چاڤکانی دبێژن کو سەرۆکێ حه‌شدا شه‌عبی دخوازیت سازیێن کو هەتا نها ل گه‌ل وان هەڤکار بوونە تێست بكه‌ت و دەربارێ یه‌نه‌كێ و په‌كه‌كێ دا هنده‌ك گۆمانێن وی هەنە. ل گۆری چاڤکانیان، حه‌شدا شه‌عبی ژ گۆتارێن رێڤەبەریا رۆژئاڤا یێن ل دژی ئامەریکا، ئیسرائیل و ترکیەیێ ل سووریێ نەرازییە. هەروه‌ها خواست دەربارێ پێڤاژۆیا کو ل ئیمرالیێ پێش دکەڤیت و هەلوەستا په‌كه‌كێ یا د په‌یوه‌ندیێن ل گه‌ل ترکیەیێ دا ئاگاهدار ببیت. په‌كه‌كێ ل گه‌ل حه‌شدا شه‌عبی په‌یوه‌ندیێن لەشکەری و سیاسی پێش ئێخستبوون و په‌یوه‌ندیێن وان یێن ئابۆری ژی هەنە. ئەڤ كارێن کو ب تایبەتی د سەر شەنگالێ را دهاتن مەشاندن، ژ بەر گوهەرتنا رژێما ل سووریێ راوه‌ستیان. واته درب ب هەموو خالێن هەڤپارێن د ناڤبەرا حه‌شدا شه‌عبی و په‌كه‌كێ دا كه‌تنه. نها حه‌شدا شه‌عبی دخوازیت په‌كه‌كه هەلوەستا خوە زەلال بکەت.
فالح فه‌یاز دیار کر کو ئەو ب تایبەتی دەربارێ یەکێتیا د ناڤبەرا کوردان دا ل رۆژئاڤا و مژارا چارەسەریا کو دێ ئامەریکا و ئیسرائیل پێشنیار بکه‌ن نەرحەتن. ل گۆری چاڤکانیان، حه‌شدا شه‌عبی خواست کو په‌كه‌كه ژ هنده‌ك خالێن ل چیایێ شەنگالێ دەرکەڤیت.
هات راگهاندن هەڤدیتنێن کو ب دزی پێک هاتن هەڤدیتنێن ده‌ستپێكێ بوون و بریار هاتیه دان کو شاندێن ئاستا بلند د هنده‌ك مژاران دا بریاران بده‌ن.
حه‌شدا شه‌عبی و شیعه‌یێن ئیراقێ دترسن
ئۆپەراسیۆنا ب ناڤێ تۆفانا ئەقسایێ یا کو حەماسێ ل 7ێ جۆتمەهێ ل دژی ئیسرائیلێ ده‌ستپێكری، كارتێكرنه‌كا ئێكجار مه‌زن چێکر و تۆفان ب دەولەت، سازی و هێزێن پاراملیتەر یێن د ناڤ ئەنیا شیعی دا یێن كو ئیران ژێرا دبێژیت «میحوەرا بەرخوەدانێ» كه‌ت. ئیران ژ هەموو ئەردنیگاریێن کو ژ سالا 2011ێ گاڤ ب گاڤ گرتین هات دەرێخستن. هلوەشینا رژێما ئەسەد ژ بۆ ئیرانێ بوو دربه‌كێ هەره کوژەر. نها ژی چاڤ ل سەر یه‌مه‌ن و ئیراقێ نە. ب تایبەتی ژی ئیراق ژ بۆ پاراستنا ئیرانێ وەک دەروازەیه‌کا ستراتیژی یه و ساترەکێ پێشە. و هەمان دەم ژ بەر کو جیرانێ سووریێ یە ژی، تێ دیتن کو دێ د ناڤ ئارمانجێن پلەیا یەکەم دا بیت بۆ ئیسرائیل و ئەمەریکایێ. ئەڤ هلوەشینا بابەلیسکی یا ب سەر سووریێ دا هاتی شیعه‌یێن سەر ب ئیرانێ ڤە خستنه د ناڤا ترس و له‌رزه‌كا گه‌له‌ك مەزن دا.
