هەڤدیتنەک د ناڤبەرا سەرۆکێ پارتیا هەری نەتەوپەرەست و ترکپەرەستا ترکیەیێ دەڤلەت باهچەلی و شاندا پارتیا دەمێ دە پێک هات. د هەڤدیتنێ دە ژ پارتیا دەمێ ئه‌حمه‌د ترک، پەروین بۆلدان و سڕی سورەییا ئۆندەر ئامادە بوون. مەدیایا ترک بوویەر وەک «هەڤدیتنا دیرۆکی» پێشکێشکر. ئەڤ هەڤدیتن ب راستی ژ بۆ کوردان ژی دیرۆکی بوو. ژ بەر کو ئەڤ هەڤدیتن بوو هەڤدیتنا کو هەموو ماسکێن ل بەر روویێ وان بکەڤن. هەلبەت ژ بۆ یێن کو فێم دکن.
پشتی هەڤدیتنێ، ئه‌حمه‌د ترک داخویانیەکە بالکێش دا ئیسماعیل سایمازێ هالک تی ڤی یێ و گۆت: «ئیرۆ ل رۆژهلاتا ناڤین نفووسەکە کورد یا 50 ملیۆنی هەیە و بەرێ وان هەموویان ل ترکیەیێ یە، ئەو خوە وەک بەشەک ژ ترکیەیێ دبینن». وی هەروه‌ها گۆت «تەنێ خەما مە ئاڤاکرنا براتیا کورد – ترکان یا ژ نوو ڤەیە».
نها بلا هەموو کورد دەستێ خوە دەینن سەر وژدانا خوە و بەرسڤ بدن:
– گەلۆ تەنێ خەما کوردان ئەوە کو ب ترکان رە بژین؟ ژ لۆزانێ هەتا نها، ل چار پەرچەیێن کوردستانێ، ب هەزاران کەس ژ بۆ کو ل وەلاتەکی ئازاد، ب چاندا خوە، ب زمانێ خوە و خوەدی ئاخا خوە بژین شەهید کەتن، ئان وەک کو ئه‌حمه‌د ترک دبێژە ژ بۆ براتیا ب ترکان رە مرن؟
– گەلۆ نها بەرێ کوردێن ل سنە، سەقز، مەهاباد، سلێمانی و کەرکووکێ، و هەروه‌ها یێن ل قامشلۆ و هەولێرێ ل ترکیەیێ یە؟ ما بەری دو سالان، د سەرهلدانا ژینا ئەمینی دە ل ئیرانێ، نێزی سەد کوردێن کو ل کۆلانان ژ بۆ پرۆتەستۆکرنا کۆلۆنیالیزما دەولەتا ئیرانێ شەهید بووین، ژ بۆ ترکیە بوونێ مرن؟
ل گۆری داخویانیا ئه‌حمه‌د ترک، نە ئازادی و ژیانا ل سەر ئاخا خوە، لێ تەنێ خەما هەموو کوردان براتیا ب ترکان نه. ئەڤ داخویانیا ئه‌حمه‌د ترک د راستیێ دە حەقارەتەکە ل کوردانە، حەقارەتەکە ل جوانێن کوردێن کو ل سەر ڤێ ئاخێ خوینا خوە رێشتینە. نڤیسکارێ ڤان رێزان وەک کوردەک ب ئەشکەرەیی دبێژە کو ئه‌حمه‌د ترک نە ئیرادەیا منە، تو من تەمسیل ناکەی. ئەز هەتا وێ سازیا کو ڤان گۆتنێن ئه‌حمه‌د ترک یێن خاینتیێ وەک پارادیگمایا نوو، نەتەوا دەمۆکراتیک و .. هتد، ڤەدشێرە ژی وەک ئیرادەیا خوە نابینم. دڤێ هەر کورده‌كێ ب روومەت ژ ئه‌حمه‌د ترک رە ببێژە تو نەئیرادەیا کوردانی. گۆتنا ئه‌حمه‌د ترک گۆتنەکە بۆ بەرژەوەندیا ترکانە، گۆتنەکە کو ئیرادەیا ترکان تەمسیل دکە. ئه‌حمه‌د ترک ب راستی حەقێ پاشناڤا خوە ئانیە، وەک ترکەکی دفکرە، دژی و ئاخڤیە.
چما پاشناڤێ ئه‌حمه‌د ترک “ترک”ە؟ نە ب زۆری ژ ئالیێ دەولەتێ ڤە هاتیە دایین. پاشناڤا ترک ژ ئالایێن حەمیدیێ یێن کو د سەردەما ئۆسمانی دە ل دژی کوردان هاتبوون ئاڤاکرن، مایە. چیرۆکەکە درێژ هەیە لێ سەرۆکێ عەشیرا قەنجۆ حوسەین قەنجۆ، کو د ناڤ ئالایێن حەمیدیێ دە جهـ دگرت، هینی ترکیێ دبە و ناڤێ کەچا خوە ژی دکە ترکیە. پشترە سەرۆکێ عەشیرێ ب شەرتێ کو ب کەچا وی رە بزەوجە، سەرۆکاتیا عەشیرا قەنجۆ و قەسرا خوە ژ باڤێ ئه‌حمه‌د ترک، سینان رە دهێلە. دەما دەولەتا نوو یا کەمالیستا ترک تێ ئاڤاکرن، باڤێ ئه‌حمه‌د ترک ب دلخوازی ژ بۆ دلسۆزییا خوە یا ب دەولەتێ رە نیشان بدە، پاشناڤێ خوە کره ترک.
ئەم ببێژن وێ دەمێ باڤێ ئەحمەد نەزان بوو – کونە ووسا بوو، وێ دەمێ هەرێما مێردینێ ناڤەندا کوردایەتیێ بوو – لێ ئه‌حمه‌د ترکێ کو ب گۆتنا خوە کوردان تەمسیل دکە، قەت نەفکری کو پاشناڤا خوە بگوهەرینە. چما؟ ژ بەر کو ئەڤ کەس د داویێ دە کەسێن ب روح و جان دلسۆزێن دەولەتا ترکن. ئه‌حمه‌د ترک حەقێ پاشناڤێ کو کۆمارا ترکیەیێ دایە وی ئانگۆ سەدێ سه‌د جهـ تینە، لێ ئەو نە لایقێ تەمسیلکرنا کوردانە.
مە بەرێ ژی گۆت، ل مێزا کو ل ئیمرالیێ هاتیه ئاڤاکرن، ژ بۆ تەمسیلکرنا کوردان ل سەر مێزێ قەد کوردەک تونەیە.
عەرەبەکێ و ترکەکێ ل ئیمرالیێ لگەل ئۆجالان ل سەر پرسگرێکا کوردان گۆتووبێژ کر. ئۆجالان دکارە چ ببێژە؟
