سەرۆکێ ھەرێما کوردستانێ ئیرۆ ل بەغدایێ لگەل سەرۆکوەزیرێ ئیراقێ جڤیا، بریارە ھەر ئیرۆ لگەل سەرۆکێ کۆمارا ئیراقێ و چەند ئالیێن دن یێن سیاسی یێن ئیراقێ ژی بجڤە.
سەرۆکێ ھەرێما کوردستانێ نێچیرڤان بارزانی ئیرۆ (دوشەمبێ، 13.1.2025) ل بەغدایێ لگەل سەرۆکوەزیرێ ئیراقێ محەمەد شیاع سوودانی جڤیا.
نڤیسینگەھا راگەھاندنێ یا سەرۆکوەزیرێ ئیراقێ د راگەھاندنەکێ دە ئاماژە دایە، “نێچیرڤان بارزانی و سوودانی دانووستاندن ل سەر رەوشا ئیراقێ و دەڤەرێ و پێدڤیتیا پشتەڤانیا حکوومەتا نھا یا فەدەرالی د بجھانینا کارنامەیا خوە دە کرن.”
د بەشەکا دن یا جڤینا خوە دە، وەکی کو د وێ راگەھاندنێ دە ھاتیە، بەحسا پابەندبوونێن دەستووری یێن حکوومەتا ھەرێما کوردستانێ و حکوومەتا ئیراقێ ل بەرانبەری قانوونا بودجەیا گشتی یا فەدەرالی ھات کرن.
وێ راگەھاندنێ ئاماژە ژی دایە، “ھەر دو ئالیان تەکەز ل سەر گرنگیا ھەڤدەنگی و ئالیکاریێن ھەڤپارێن ناڤبەرا ھەمی ھێز و ئالیێن سیاسی کریە، ب مەرەما رووبرووبوونا قەبخوازیان و دابینکرنا ئەولەھی و سەقامگریێ ژ بۆ ئیراقێ.
بریارە ھەر ئیرۆ سەرۆکێ ھەرێما کوردستانێ لگەل سەرۆکێ کۆمارا ئیراقێ، لەتیف رەشید و چەند ئالیێن دن یێن سیاسی یێن شیعە و سونەیان ژی بجڤە.
سەرۆکێ ھەرێما کوردستانێ نێچیرڤان بارزانی دوھی (یەکشەم، 12.1.2025) ب سەردانەکێ گەھشت بەغدایێ و تەڤلی جڤینا ھەڤپەیمانیا ئیدارەیا دەولەتێ بوو، کو دانووستاندنێن وێ جڤینێ گرێدایی پرسا مافێن دارایی یێن ھەرێما کوردستانێ، ھناردەکرنا پەترۆلێ، راسپاردەیێن جڤاتا وەزیرێن ھەرێما کوردستانێ و چەند پرسێن دن بوو، ژ بەر کو وێ ھەڤپەیمانیتیێ ھەمی ھێزێن سیاسی یێن پێکینەرێن حکوومەتا ئیراقێ ڤەگرتنە.
