مەدیایا فەرمی یا ترکیێ ئیرۆ چارشەمێ راگهاند، بەرپرسەکی په‌كه‌كێ ب ناڤێ ئیسلام دوتکانلو و پاسه‌وانه‌كێ وی ل پێنجوێنا پارێزگەها سلێمانیێ د ئۆپەراسیۆنەکە ئیستخباراتێ دە هاتنە کوشتن.
مەدیایا فەرمی یا ترکیێ ئەڤ نووچە ل سەر زارێ چاڤکانیێن فەرمی بەلاڤ کر، لێ نەگۆت کەنگی ئێریش پێک هاتیە و هوورگلی نەدان.
ل گۆری هەمان چاڤکانیێ، میتێ ب رێیا تۆرا خوە یا ئیستخباراتێ، جهێ ئیسلام دوتکانلو كو ناڤێ وی یێ فه‌رمی ئه‌حمه‌د سه‌رحه‌ده و ئاکام شاهی ناس کریە و ل سەر وێ بنگەهێ ئۆپەراسیۆن کریە.
ل گۆری نووچەیا ئاژانسا فەرمی یا ترکیێ، ئیسلام دوتکانلو یەک ژ دامەزرینەرێن یەکینەیێن پاراستنا رۆژهلاتێ کوردستانێ (یه‌ره‌كێ) بوو و ئاکام شاهی ب كۆدناڤێ شڤان چیا ژی پاسەوانێ وی بوو کو دەمەکێ ل ئیرانێ و جۆله‌مێرگێ مابوو.
ل گۆری ئاگاهیێن ده‌ستێ مه، ئیسلام دوتکانلو ب یێك ژ به‌رپرسێن گرینگ یێن په‌كه‌كێ تێ حه‌ساب كرن كو ژ ته‌ڤ چالاكیێن چه‌كداری یێن په‌كه‌كێ ل سینۆرێ پێنجوینێ به‌رپرسیاره.
