ل پشت ئێریشا ئیستیفزازی یا کو پەکەکێ ل حەفتەنینێ ئەنجامدای، چ ھەیە؟
دوھ 2 پاسەوانێن سینۆرێن ئیراقێ کو ل نێزی گوندێ شیلانە یێ حەفتەنینێ د دەوریەیێ دە بوون، ژ ئالیێ پەکەکێ ڤە ھاتن شەھیدکرن. یەک ژ شەھیدێن وێ بوویەرێ ب ناڤێ مێڤان ناجی بەرواری 41 سالی، بابێ 4 زارۆکان و پێشمەرگەیەکی 20 سالان بوو. پاسەوانێ دی ژی عەلی رەمەزان ھاجانی یێ 42 سالی بوو و 7 زارۆکێن وی یێن بچووک ھەبوون. د ڤێ بوویەرێ دە، د جارەکێ دە 11 زارۆکێن بچووک سێوی مان. ئەڤ نە خەلەتی و نە ژی تشتەک بوو. ئەڤ ژی بەرسڤا پەکەکێ یا ل ھەمبەری بانگا یەکیتیێ یا کوردان بوو.
ھەر چەندی زێدەیی 30 دەمژمێران د سەر بوویەرێ را دەرباس بوویە ژی ژ ئالیێ پەکەکێ و ھەپەگێ ڤە یەک داخویانی ژی نەھاتیە دایین. ئەگەر کەسێن ھاتنە کوشتن نە کورد بوونا، لێ عەرەبێن بەسرا و بەغدایێ، ئەندامێن حەشدا شەعبی یان ژی پارتیەکا چەپا ترک بوونا، دا پەکەکە د ناڤا چەند خولەکێن دەستپێکێ دە سەرساخی دت و ھەول دت کو بوویەرێ شیرۆڤە بکە. لێ یێن کو مرن کورد بوون. د چاڤێن پەکەکێ دە ژیانا کوردەکی – نە ئالیگرێ وێ و نە ژی دژبەرێ وێ – چ قیمەتێ خوە نینە. ل گۆری پەکەکێ کورد ژ خوە مرنە. ھەگەر ئەو ئالیگرێن پەکەکێ بن، ژ بۆ بەرفرەھکرن و مەزنکرنا پەکەکێ دمرن و ئەگەر ل دژی پەکەکێ بن، ژ بوو سەھما خوە چێبکە دیسا کورد تێن کوشتن. د ئێرشا پەکەکێ یا باتووفا دە 11 زارۆکێن کورد سێوی مان. پەکەکێ ب رێیا ڤان جەنازەیان ستراتەژییا پەیاما خوە راگەهاند.
بوویەر ل ھەرێما ناڤبەرا گوندێن شیلانێ و سۆریا یێن ھەرێما باتووفا یا زاخۆیێ روو دا. پەکەکێ کو ھەرێمێن ھوندرێ حەفتەنینێ ژ بۆی دەولەتا ترک ھشتنە، ئەڤ دەمەکە درێژە ل باتووفا و گوندێن دەردۆرێ دگەرە. بوویەر دەمژمێر 9ێ سپێدێ روو ددە، رۆژە، نە بارانە و نە ژی مژ ھەیە. پەکەکێ ئەڤ ھەر دو لەشکەرێن کورد ب زانەبوون گولەبارانکرن. د راپۆرێن پزشکییا داد یێن کەسێن ھاتن گولەبارانکرن دە ھات دیارکرن کو د لاشێ وان دە گولەیێن کلاشنیکۆفێ ھەنە. داخویانیا مەدیایا پەکەکێ یا کو دبێژە، دەولەتا ترک ب بالافران ل ڤان ھەر دو لەشکەران خستیە، ب تەمامی دەرەوە و خاپاندنە.
پەکەکێ ب پلان د ناڤا رۆژا رۆناهی دە حەرەکەت کرییە کو ئارتێشا ترک ئۆپەرسایۆنێ دەربخە. زانەبوونی مەجالێ پیلانەکێ چێکر، ئەو کشاند دەڤەرێ و 2 کورد شەھید کرن. ژ بەر ڤێ راستییێ گۆتنا پەڤچوون د ناڤبەرا پاسەوانێن سینۆری و پەکەکێ دەرکەت خەلەتە. پەکەکە ئێرشی ھێزێن پاسەوانێن سینۆری کر و کەمین ل بەر وان دانی و ئەو شەھید کرن. ئەڤ چالاکی چالاکیەکا ئیستیفزازی یە. ئەڤ چالاکیە کو د دەمەکێ دە کو کوردان بانگا یەکیتیێ دکر، ژ بۆ پەکەکێ خوەدی ئارمانجەکا پرئالییە.
ئارمانجا پەکەکێ یا یەکەم؛ پەیاما کو ژ بۆ بانگا یەکتیا کوردان تێ دایین دا. پشتی ھەڤدیتنا مەزلووم عەبدی یا لگەل سەرۆک بارزانی، کوردستانی پر کێفخوەش ببوون. ھەمان دەم دژمنێن کوردان کەتن ناڤا خەم و خۆفەک مەزن دا. پەکەکێ ب ڤێ چالاکییێ پەیامەک ژ بۆی دژمنێن کوردان شاند و ب وان راگهاند: خەمان نەخووون، چ تشت من ژ ئێرشن ل سەر پەدەکێ و ھەولێرێ پاشڤە نابن. پەکەکێ ئەڤ پەیام دا ئیران، ترکیێ و ئیراقێ.
ئارمانجا دویەمینا پەکەکێ؛ ژ بۆ تێکبرنا پێڤاژۆیا رۆژئاڤایە. پەکەکە یەکیتیا پێکھاتەیێن باشوور و رۆژئاڤا ناخوازە. د سالا 2013 دە کورد ل ھەولێرێ ھاتن گەل ھەڤ و سەرۆک بارزانی ل کێلەکا رێڤەبەرێن پەکەکێ روونشتبوو. وێ دەمێ پەکەکە وسا دفکری کو ب پێوەندییێن د ناڤبەرا پەدەکێ و پەکەکێ دە دکارە ھێزا خوە ل رۆژئاڤا وندا بکە و ژ بەر وێ ژی ئەڤ پێڤاژۆ پووچ کر. پێشمەرگە چوون کۆبانی، پەکەکێ ئەو پرۆسە ژی پووچ کر. نھا پەکەکە ب راستی ژی وسا دفکرە کو گەر کورد ل رۆژئاڤا ببن یەک دێ ئەڤ یەک دەستھلاتا وێ تەنگ بکە. ھەول ددە ل دژی ڤێ یەکێ دەرکەڤە. رەڤاندنا رێڤەبەرێ ئەنەکەسێ سالح فەتاح و پشتی 5 رۆژان دیتنا تەرمێ وی ژی ئیستیفزازەکا تاری بوو. وەک ھشیاری، دبە کو پەکەکە ڤان کریارێن تاری بکە. دڤێت ھەر کەس ل گۆری ھشیاری تەڤبگەرە.
ئارمانجا سێیەمینا پەکەکێ؛ پەکەکە د ڤان دەھ سالێن داوین دە شەرەکی مەزن یێ ئایدۆلۆژیک، فکری و مەدیایی ژ بۆ تێکبرنا پەدەکێ و تەڤگەرا بارزانی دمەشینە. ھەڤدیتنا سەرۆک بارزانی لگەل مازلووم عەبدی و داخویانیێن سەرۆک بارزانی یێن دەربارێ رۆژئاڤا دە، پشتگریا وی ژ بۆ رۆژئاڤا ھەتا رادەیەکێ کو دبێژە ئەگەر پێویست بکە دێ ئالیکاریا لەشکەری پێشکێشی رۆژئاڤا بکە و دیپلۆماسی ژی ژ بۆ رۆژئاڤا دکە و ھتد پەکەکێ دترسینە. لۆما ژی پەکەکە دخوازە رێگرییێ ل ڤان ھەولێن سەرۆک بارزانی بکە. لێ ھەموو کامپانیێن پەکەکێ د جارەکێ دە ڤالا دەرکەتن. ب راستی پەکەکە شەرێ چ دەولەتێن کۆلۆنیالیست ناکە. پەکەکە ل باکور ل دژی دەولەتا ترک شەری ناکە؛ لگەل ئیرانێ شەری ناکە. یەکانە ھێزا کو پەکەکە شەرێ وێ دکە پەدەکەیە. ئەگەر ھەلوەستا یەکگرتی یا پەدەکێ د رایا گشتی دە ببە بەرسڤ، دێ پەکەکە د ڤی شەری دە ژی تێک بچە. ژ بۆ ڤێ ژی پێویستیا پەکەکێ ب ئیستیفزازێن کو دژمناتیا وێ یا ل ھەمبەری پەدەکێ بەردەوام بکە ھەیە. ل سەر چاپەمەنییا خوە ژی ھندەک کەسێن رووحا وان فلسەکێ نەھێت ددن ئاخفتن و بوویەرێ بەرۆڤاژی دکن.
ئارمانجا چارەمین یا پەکەکێ؛ پەکەکە ھەول ددە د پێڤاژۆیا د ناڤبەرا ئەردۆگان-باخچەلی-ئۆجالان دە ل ترکیەیێ دە ئەرکا خوە ڤەشێرە. رایا گشتی وسا دفکرە کو ئۆجالان لگەل دەولەتا ترک ژ بۆ تنەکرنا پەکەکێ پەیمان چێکریە. ھەلوەستا پەکەکێ نەزەلالە. پەکەکە دخوازە وەخت دەستڤە بینە لۆما ژی بالا رایا گشتی دکشینە رۆژەڤێن سەختە.
ئارمانجا پەکەکێ یا پێنجەمین؛ یێن پەکەکێ باش ناس دکن، ھەر کو پەکەکە لگەل دەولەتێن کۆلۆنیالیست پەیمانان چێدکە، ھەر کو پێڤاژۆیەک ئاشتیێ چێدبە، یەکسەر دەست ب کوشتنا کوردان دکە. ژ بەر کو پەکەکە تەڤگەرەکا دژوارییێ یە. پەکەکە ھەر تم چەک ژ بۆ پرۆپاگاندایێ و ژ بۆ تەسلیمگرتنا ئیرادەیا کوردان ب کار ئانییە. دەما کو لگەل دەولەتان ل ھەڤ کرن و بێھنا خوە ڤەگرتن، دێ یەکسەر بەرێ لوولییا چەکا خوە ڤەگێرن کوردان.
ھوون باوەر بن کو ئەڤ پێنج ئارمانجێن کو مە ل ژۆر بەحس کرن دێ د ناڤ چەند مەھان دە یەک ب یەک دەرکەڤن ھۆلێ.
ھەتا کو پەکەکە ھەبە، پر زەحمەتە کو کورد د ناڤ مالا خوە دە ببن یەک. بوویەرا زاخۆ ڤێ یەکێ مسۆگەر دکە. پەکەکە دکارە پرۆڤاکاسیۆنێن مەزنتر ژ بۆ پێشیگرتنا ل یەکیتیا کوردان بکە، دڤێت ھەر کەس ھشیار بە. دڤێت کەس دەست ژ خوە بەرنەدە و پاراستنا خوە مسۆگەر بکە. ل ئالیێ دن گەر کورد دخوازن یەکتیێ پێک بینن، دڤێت بێی پەکەکێ ژی رێیێن یەکیتیێ ببینن.
