10 سالیا رزگارکرنا کۆبانێ یا کو کوردان مل ب ملێ هەڤ نەهشتین بێ داگیرکرن، پیرۆز بە. 10 سال بەرێ کەچ و کوڕێن کوردێن چار پارچەیێن کوردستانێ بەدەنێن خوە بۆ کۆبانێ کرن مەرتال و رێ ل داگیرکرنا باژێر گرتن. کۆبانێ د دیرۆکا نێز یا کوردان دا خالەکە گرینگ بوو. بەریا هەر تشتی کوردان پشتی ب دەهان سالان هێزا خوە یا ل هەمبەری دژمنەکی هەڤپار مل ب مل نیشان دان. یا هەری گرینگ ژی، راوەستانا ل دژی داگیرکرنا کۆبانێ ئیسبات کر کو لۆزان وەکه پەیمان نه‌کارییە روحێ کوردان داگیر بکە.
په‌كه‌كێ نەهشت کو روحێ کۆبانی بەردەوام بکە
ژ بۆ کو ئیرۆ ل چار پارچەیێن کوردستانێ پرسگرێک تێن ژیان كرن و ژ بۆ كو ل دژی داگیرکەری و مێتنگەریێ راوەستین، پێویستیا کوردان ب روحێ کۆبانێ هه‌یە. ئەگەر یەکیتیا کوردان یا کو د سالا 2014ێ دا ل کۆبانێ ژیان بووی، پشتی وێ هەیامێ هاتبا دۆماندن و زیندیکرن، وێ دەمێ رەوشا کوردان یا ئیرۆ ل رۆژهلاتا ناڤین دێ گەلەکی باشتر بوویە. لێ سیاسەتا په‌كه‌كێ یا رۆژئاڤا رێ نەدا ڤێ یەکێ. په‌كه‌كێ تەرجیح کر کو رۆژئاڤا ژ خوە رە وەکە ناڤەندەکە پرۆپاگاندایێ بکار بینە، نەجهێ کو هەموو کورد لێ بجڤن. وێ ئەنەرژیەک مەزن خەرج کر کو ئەو روحا کو ل کۆبانی د ناڤ کوردان دا چێبووی، پاشگوهـ بکە و پووچ بکە.
روحێ کۆبانێ گارانتیا رزگاریا رۆژئاڤا یا ئیرۆیە
ئیرۆ ژی رۆژئاڤا ب قاسی کۆبانی د بن مەترسیێن مەزن دا یە و پاشەرۆژا وێ نەدیارە. رۆژئاڤا ژ بۆ كو خوە ئازاد بکە و بگه‌هه ئازادیا خوە پێویستی ب پشتگریا مەزن یا کوردان هەیە. هەموو کوردان پشتگری دان کۆبانێ. رۆژا 28ێ جۆتمەهێ 10 سال بەرێ ب فەرمانا سەرۆک بارزانی، هێزێن پێشمەرگە ژ بۆ شەرێ ل دژی داعشێ و پشتەڤانیکرنا هێزێن کوردستانی یێن ل رۆژئاڤا دەرباسی کۆبانێ بوو. د بەردێلا وێ دا تشتەک نەهات خوەستن. هێزێن پێشمەرگە چوون و ئالیکاریا پێویست کرن. د 26ێ چلەیێ دە دەرکەتن سەر گرێ مشته‌نوورێ و ل گه‌ل شەرڤانێن یه‌په‌گێ سروودا نەتەوەیی «ئەی رەقیب» خواندن و پشتی کو ئەرکا وان ب داوی بووی چەکێن خوە یێن گران بوو برایێن خوە یێن یه‌په‌گێ هشتن و ڤەگەریان. نە گۆتن، «پشتگریا مە هەیە، ئەم دێ ل ڤر وەک هێزەک بمینن و ژ بۆ خوە بکار بینن». پشتگری دا و ڤەگەریا. سەرۆک بارزانی د رۆژا رزگارکرنا کۆبانێ دا: وها گۆت «ئیرۆ خەبەرێ مزگینییا رزگارکرنا کۆبانێ یا کو ل بەرخوە دای، گهەشت مە. ڤێ نووچەیێ هەر کوردستانی و ئازادیخوازەک کێفخوەش کر. ئەڤ سەرکەفتن سەرکەفتنا هەموو گەلێ کوردستانێ یە. ل هەمبەری هۆڤیتیا تەرۆرێ سەرکەفتنا مرۆڤاهیێ یە».
ئەڤ پێنگاڤا یەکیتییێ بوو دەربەیەک مەزن ل دیرۆکا پارچەبوونا کوردان. کوردستان د سەدسالا 20ێ دا هات چار پارچە کرن، ب ڤێ هەڤگرتنا کوردان تێ واتەیا ئیفلاسا سیاسەتا پەیمانا لۆزانێ. ل گەل کو سەدسال هات پاشگوهکرن ژی، بەشەکێ کوردستانێ ب فەرمی خوە گهاند پارچەیەکا دن یا کوردستانێ. ژ بۆ ڤێ یەکێ ژی د 16ێ جۆتمەهێ دە پارلامەنتۆیا کوردستانێ ب فەرمی خوەسەرییا کوردێن رۆژئاڤا ناس کر. ل سەر ڤێ ئێعتیراقێ هێزێن پێشمەرگەی بەر ب کۆبانی ڤە هاتن شاندن. ئەڤ پێڤاژۆ دهات واتەیا رەدکرنا قەدەرا کو ژ بۆ کوردان هاتبوو دیارکرن.
سەرۆک بارزانی وێ دەمێ ب هەموو ئەزموون و دەستکەفتێن سیاسی و دیپلۆماتیک یێن تەڤگەرا سیاسی یا بارزانی پشتەڤانیا رۆژئاڤا کر و هەتا نها ژی ل سەر هەمان خەتێ یە. ئەڤ یەک د هەڤپەیڤینا خوە یا رۆژێن بۆری دە ژ «شه‌مس تی ڤی» رە ئەشکەرە کربوو و گۆتبوو، «ئەگەر ل رۆژئاڤا زلم هەبە، ئەمێ پشتگریا لەشکەری بشینن». لێ مخابن په‌كه‌كە پابەندی ڤێ پەیمانێ نەبوو. په‌كه‌كە هێ ژی د وێ نوقتەیێ دا یە کو رۆژئاڤا بکە ناڤەندا ئێریشێ ل سەر باشوور و رۆژئاڤا گۆری ئه‌جێندایا خوە یا پۆلیتیک بکار بینە. په‌كه‌كێ بەریا نها ژی ب پراكتیكا خوە یا شەنگالێ نیشان دا کو بەرۆڤاژی روحێ کۆبانێ یە. ب گومان و ڤەشارتی هێز شاند شەنگالێ. پشترە ژی ب گۆتنا «مە ئەو رزگار کر و ئەم ژ ڤر ناچین» رێیا شەنگالێ ل هەموو هێزێن کوردی گرت و شەنگال کره ناڤەندا لەشکەری یا حه‌شدا شه‌عبی. پێڤاژۆیا کۆبانێ یا کو پێشمەرگە پێ رە دەرباس کر، پراكتیكا وەلاتپارێزی، دلسۆزی، دۆستانی و هەڤگرتنێ یە، پراكتیكا شەنگالێ ژی پراكتیكه‌كه ل دژی کوردستانێ یە.
ژ بۆ کو ئەم رۆژئاڤا بپارێزن و کورد د سەدسالا 21ێ دا مەحکوومی لۆزانا نوو نەبن، ئەرکا مە یا وەلاتپارێزییە کو ئەم رۆژەڤ و سیاسەتا په‌كه‌كێ یا کو ل پێشیا روحێ کۆبانێ ئاستەنگە راوەستینن و روحێ کۆبانی بەرز بکین.
