ئەڤە دەمەک درێژە، چاڤێ ھەرسێ پەرچێن دن یێن کوردستانێ ل باشوورێ رۆژئاڤایێ کوردستانێ نە. ژ بەر کو ل ڤی بەشێ کوردستانێ ژی دەرفەتەک دەرکەتییە بەر ملەتێ کورد و ھێڤییێن مەزن د پاخلا خوە دە مەزن دکە.
لێ مخابن، رێڤەبەرێن کو ئەڤ 12 سالن ئیرادەیا کووردێن ڤی بەشێ کوردستانێ دەستەسەر کرنە و ب سیستەمەکا تۆتالیتار دمەشینن، ھەر ڤێ ھێڤییێ دشکینن.
مە ھەر ھێڤی دکر کو دێ کورد ل ڤی بەشێ کوردستانێ بنگەھەکێ بھەڤ رە خەباتێ، کو داخوازێن خوە بکن یەک ئاڤا بکن، بکاربن ل سەر خاکا باشوورێ رۆژئاڤایێ کوردستانێ مافێ ملەتێ کورد و پێکھاتەیێن ل سەر خاکا کوردستانێ دژین بپارێزن. مخابن ئەڤ ھێڤی ب داخویانییێن سەرکردەیێن لەشکەری یێن ڤی بەشێ کوردستانێ رە دشکێن. یەک ژ ڤان سەرکردەیێ ھێزێن دەمۆکراتیک یێن سوورییەیێ مەزلووم عەبدییە!
دبێژە:
“کوردێن سووریەیێ ناخوازن ژ وەلاتی ڤەقەتن یان ژی وەکی ھەرێما کوردستانێ حکوومەتەکا خوەسەر و پارلامەنتۆیەکا خوە ئاڤا بکن. خەلکێن باکور ڕۆژھلاتێ سووریەیێ دخوازن د دەولەتەکا نەناڤەندی دە کار و بارێن خوەیێن ب رێ ڤە ببن”.
د ڤردە مەزلووم عەبدی پارادیگمایا ئاپۆیزما مالخەراب دپارێزە. ل دژی فەدەراسیۆنەکا مللی یا کوردە، کو بەشەک ژ جوگرافییا کوردستانێ یە. ڤێ ھەرێما باشوورێ رۆژئاڤایێ کوردستانێ، وەک بەشەک ژ جوگرافییا کوردستانێ رەد دکە و دبێژە “ئەڤدەر ئاخا سورییێ یە”! دەما کو پەیڤا “ناناڤەندی” بکارتینە ژی، قەزدا وی، د ئاستا رەدکرنا خاکا باشوورێ رۆژئاڤایێ کوردستانێ کو نە خاکا کوردستانێ دەیە.
گەلۆ کوردستان و خاکا کوردان کەڤنە یان، دەولەتا سوورییەیێ؟ مەزلووم عەبدی، ژ ھێلا دیرۆکی و جوگرافی دە جاھیلەکی کوردایە، یان ژی ب زانستی، پەیایێ پارادیگمایا ئۆجالان ب خوەیە! چ جاران ڤێ پارادیگمایێ ل باشوورێ رۆژئاڤایێ کوردستانێ، ناڤێ جوگرافییا کوردستانێ بکار نەئانینە. ھەر گۆتنە، “باکورێ سوورییە”یێ(!)
د پارادیگمایا پەکەکێ دە ژی باشوورێ رۆژئاڤایێ کوردستانێ، وەک بەشەک ژ ئاخا کوردستانێ نایێ قەبوولکرن. د پرۆگراما سییاسی یا پەکەکێ دە ئەڤ بەشێ خاکا کوردستانێ تێت رەدکرن و تێدە دەرباس دبە کو “ئەڤدەر ئاخا عەرەبایە، نە خاکا کوردستانێ یە. ژ بەر سەرھلدانێن باکورێ کوردستانێ کورد کۆچی ڤر بوونە و ل سوورییێ کورد پەنابەرن.”(!)
مەزلووم عەبدی، ژ بۆنا ڤێ پارادیگمایا پەکەکێ مەشرووع بکە ژی دبێژە؛
“سووریا نە ئیراقە و ئیراق نە سووریەیە و باکور و رۆژھلاتێ سووریەیێ نە کوردستانا ئیراقێ یە.” ب ڤێ گۆتنێ فۆرموولا فەدەراسیۆنا باشوورێ کوردستانێ رەد دکە.
د ئەسلێ خوە دە ھەرکەس دزانە خاکا دەولەتا ئیراقێ کو ل سەر ئاڤا بوویە و خاکا کو دەولەتا سوورییەیێ ل سەر ئاڤا بوویە چیە!
ھەردوو دەولەت ژی ل سەر دو بەشێن کوردستانێ ئاڤا بوونە. ژ ھێلا دیرۆکی دە ئاڤاکرنا ڤان دەولەتان و پەرچەکرنا کوردستانێ د یەک دەمێ دەیە و ئەڤ ھەردوو دەولەت ژی ل سەر ئاخا کوردستانێ ئاڤا بوونە. خوەدی دیرۆکەک 100 سالی نە.
عەینی ئەڤی کاری ژ بۆی دەولەتا ترکییەیێ ژی دەرباس دبە. ئەڤ ھەرسێ دەولەتە ژی ژ لایێ ھێزێن وێ دەمێ یێن ئەمپەریال (ئینگلیستانێ و فرانسایێ) دە ھاتنە ئاڤاکرن. ئەڤ ھەرسێ دەولەتە ژی ژ کووراهیا دیرۆکێ نایێن و ھاتنە ئاڤاکرن. لێ مەزلووم عەبدی د گۆتارا خوە دە ئاڤاکرنا ڤان دەولەتان مەشرووع دبینە. ل سوورییەیێ ژی بەشەک ژ خاکا کوردان رەد دکە. ئەڤ پارادیگما نە د خزمەتا کورد و کوردستانێ دەیە و دژمنێ بەرژەوەندییێن ملەتێ کوردە.
ژ 2013 وەرە ب دەهان هەزار زارۆکێن کوردان د بەر وێ خاکێ دە جانگۆری بوون. ژ ھەرچار پەرچێن کوردستانێ، کوردان پشتگری دا باشوورێ رۆژئاڤایێ کوردستانێ. هێژ ژی ژ باکورێ کوردستانێ ب سەدان شەرڤانێن کورد ل سەر وێ ئاخێ ب چەکن. باشە، مادەم “ئەودەر نە کوردستانە”، چما وە گازییا سەفەربەرییێ راگهاند و ئالیکاری ژ کوردان خوەست؟
چما وە ژ عەرەبان ئەڤ ئالیکاریە نەخوەست؟
ھەگەر ئەڤ پارادیگمایە ل باشوورێ رۆژئاڤایێ کوردستانێ کوردان تەمسیل بکە، کورد دێ دەرفەتەکا دیرۆکی وەندا بکن. دڤێت ھێزێن دن یێن کوردان دەرکەڤن پێش و ڤێ پارادیگمایا دژمنانە شەرمەزار بکن. مافێ ملەتێ کورد ل سەر خاکا کوردستانێ مسۆگەر بکن و دەستھلاتدارییەک کورد و کوردستانێ ل سەر خاکا باشوورێ رۆژئاڤایێ کوردستانێ بێت ئاڤاکرن.
ژ ھێلا چەکداری دە ژی مەزلووم عەبدی گۆتنا خوە، نە ل گۆر فەدەراسیۆنەک کورد و کوردستانێ، وەک “بەشەک ژ ئاخا سوورییەیێ کو خاکا عەرەبایە و کورد لێ دژین” دییار دکە و ل گۆر ڤێ پیلانێ دبێژە؛
“پرانیا کۆمێن چەکدار راگھاندبوو کو ئەو دێ بکەڤن بن حوکمێ شامێ و بریارا کو ھەسەدە دێ ل سەر ڤێ مژارێ بدە ژی مژارەکە سەرەکەیە.”(!)
قەزدا مەزلووم عەبدی کو دبێژە؛ “سووریە نە ئیراقە و ئیراق نە سووریەیە”، ئەساس دخوازە بێژە کو ئەم فۆرمیلا مینا ئاڤاکرنا ئارتێشا ئیراقێ و پێشمەرگێن کوردستانێ رەد دکن و “ئەم دخوازین ببین بەشەک ژ ھێزێن سووریەیێ، لێ ژ بۆ ڤێ دیالۆگ و گارانتی پێویستن” (!)
گارانتی ئەوە کو ئارتێشا کوردان ل سەر خاکا کورد و کوردستانێ، ھێزەکا مللی یا پاراستنا ماف و خاکا کوردستانێ بە. ئەڤ بناغەیەکێ سەرەتایی یێ گارانتییێ یە. لێ مەزلووم عەبدی دخوازە خوە وەک پەیایێ دەولەتا شامێ بپەژرینە، بکە والییەکی ھەرێمی و دەستھلاتدارییا خوە گارانتی بکە، نەیا ملەتێ کورد ل سەر خاکا کوردستانێ.
دڤێت کورد ل باشوورێ رۆژئاڤایێ کوردستانێ ڤێ تەھلووکێ ببینن و تەدبیرێن خوە بستینن.
