ئۆجالان: په‌كه‌كه هاتیه داوییا ژیانا خوه، دڤێ خوه فه‌سخ بكه
په‌یاما عه‌بدوللا ئۆجالان رێبه‌رێ زیندانكری یێ په‌كه‌كێ ئیرۆ 27 سباتا 2025ێ ژ هێلا هه‌یئه‌تا ئیمرالیێ ڤه هات خوه‌ندن، ئۆجالان تێ ده بانگ ل په‌كه‌كێ كر كو چه‌كان ده‌ینه و خوه فه‌سخ بكه.
هه‌یئه‌تا ئیمرالیێ یا دەم پارتیێ پشتی کو ل گراڤا ئیمرالیێ ب رێبەرێ په‌كه‌كێ عه‌بدوللا ئۆجالان رە هەڤدیتن کر ڤەگەریا ستەنبۆلێ و د پرێسكۆنفه‌رانسه‌كێ ده ئه‌حمه‌د تورك ئه‌ندامێ هه‌یئه‌تا ئیمرالیێ په‌یاما ئۆجالان ب زمانێ كوردی خوه‌ند، هه‌ر وها په‌روین بۆلدان په‌یام ب زمانێ تركی خوه‌ند:
په‌یاما ئۆجالان ووسایه:
بانگا ئاشتی و جڤاکا دەمۆکراتیک
په‌كه‌كه؛ د سەدسالا 20ان دە، د سەدسالا هەری توند یا دیرۆکێ دە ئاڤا بوو. زەمینا کو په‌كه‌كه تێ دە هات ئافراندن زەمینا دو شەرێن جیهانێ، رەئەل-سۆسیالیزم و دەما شەرێ سارێ ل جیهانێ بوو. د ڤێ زەمینێ دە ئینکارکرنا راستیا کوردان، قەدەغەکرنا ئازادییان، ب تایبەتی ژی قەدەغەکرنا ئازادییا رامانێ ل دار بوو.
د وارێ تەئۆری، بەرنامە، ستراتەژی و تاکتیکان دە باندۆرا راستیا پەرگالا رەئەل-سۆسیالیستا سەدسالێ ل سەر ڤێ ئاڤابوونێ چێبوویە. د سالێن 1990ێ دە، ژ بەر سەدەمێن ناڤخوەیی هلوەشینا رەئەل-سۆسیالیزمێ، شکەستنا ئینکارا ناسنامەیێ ل وەلات و پێشکەتنێن ئازادیا رامانێ بوو سەدەم کو په‌كه‌كه واتەیا خوە ببۆرینە و خوە زێدە دوبارە بکە. ژ بەر ڤێ یەکێ ئەو ژی وەکی یێن دن هاتیە داویا ژیانا خوە و پێویستی ب فەسخکرنا وێ هەیە.
تێکلیێن کورد و ترکان؛ د دیرۆکا زێدەتری هەزار سالان دە ترکان و کوردان ژ بۆ هەبوونا خوە بدۆمینن و ل دژی هێزێن هەگەمۆنیک ل سەر پیان بمینن، هەر تم پێویستی پێ دیتنە کو ب دلداری د ناڤا تفاقەکێ دە بمینن.
دو سەد سالێن داوی یێن مۆدەرنیتەیا کاپیتالیست، شکاندنا ڤێ تفاقێ ژ خوە رە کریە ئارمانج. هێزێن کو باندۆر ل وان بوویە، لگەل بنگەهێن خوە یێن چینی، خزمەتا ڤێ یەکێ ئەساس گرتنە. ئەڤ پێڤاژۆ ب شیرۆڤەیێن یەکرەنگێن کۆمارێ لەزتر بوویە. ئەرکا سەرەکە ئەوە کو تێکلیا دیرۆکی یا ئیرۆ شکەستیە، ب روحێ براتیێ و یەکیتیێ، تەڤی ئەم باوەریان ژی پاشگوهـ نەکن، ژ نوو ڤە برێخستن بکن.
پێویستیا جڤاکا دەمۆکراتیک ژێنەگەرە. په‌كه‌كه، د دیرۆکا کۆمارێ دە تەڤگەرا سەرهلدان و شیدەتێ یا هەری درێژ و بەرفرەهە. ژ بەر کو رێیا سیاسەتا دەمۆکراتیک گرتی بوو، په‌كه‌كه ب هێز بوو و دەستەک ستەند.
نەتەو-دەولەتێن جودا، فەدەراسیۆن، خوەسەریا ئیداری و چارەسەریێن کولتورالیست کو ئەنجاما پێویستا نەتەوەپەرەستیا توندن، نکارن ژ سۆسیۆلۆژیا جڤاکا دیرۆکی رە ببن بەرسڤ.
رێزگرتنا ناسنامەیان، ئازادیا رامانێ، رێخستنبوونا دەمۆکراتیک، ئاڤاکرنا جڤاکی-ئابۆری و سیاسی یا هەموو پێکهاتەیان، تەنێ ب هەبوونا جڤاک و قادا سیاسی یا دەمۆکراتیک ممکنە.
سەدسالا دویەمینا کۆمارێ تەنێ دەما کو ب دەمۆکراسیێ وەرە تاجیدارکرن دکارە ببە خوەدی یەکیتی و بەردەوامیەک ماییندە. ژ دەمۆکراسیێ پێ ڤە تو رێیەکە لێگەرینا پەرگالان و پێکانینا وان تونەیە ئو نە ممکنە. لهەڤکرنا دەمۆکراتیک رێبازا بنگەهینە.
دڤێ زمانێ سەردەما ئاشتی و جڤاکا دەمۆکراتیک ژی ل گۆری ڤێ راستیێ بێ پێشخستن.
بانگا کو برێز دەڤلەت باهچەلی کر، ئیرادەیا کو برێزسەرۆککۆمار نیشان دا و نێزیکاتیێن ئەرێنی یێن پارتیێن دن ئەڤ پێڤاژۆ ئاڤا کر و ئەز ژی د ڤێ پێڤاژۆیێ دە بانگا چەکدانینێ دکم و ئەز بەرپرسیاریا دیرۆکی یا ڤێ بانگێ هلدگرم سەر خوە.
چاوا کو هەر جڤاک و پارتیا هەمدەم کو هەبوونا وێ ب دارێ زۆرێ نەهاتیە بداویکرن، هوون ژی ب دلداری کۆنگرەیا خوە بجڤینن و بریاران بستینن؛ دڤێ هەموو کۆم چەکێن خوە دەینن و په‌كه‌كه خوە فەسخ بکە. ئەز سلاڤێن خوە ژ هەموو کەسان رە دشینم کو باوەریا ژیانا هەڤپار دکن و گوهـ ددن بانگا من.
25 سبات 2025
عه‌بدوللا ئۆجالان
