کۆمیسیۆنا ژنان یا ھاک-پار و کۆمیسیۆنا ژنان یا پارتیا وەلاتپارێزێن کوردستانێ PWK، پێکڤە 8 ئادارێ رۆژا ژنان یا جیھانی ل دیاربەکرێ پیرۆز کرن.
ل تەشکیلاتا ئامەدێ یا پارتییا وەلاتپارێزێن کوردستانێ (PWK) د جڤینەکا چاپەمەنییێ دە داخویانییا ھەڤبەش یا ھەردو پارتییان ھاتە خواندن.
د جڤینا چاپەمەنییێ دە، ژ کۆمیسیۆنا ژنان یا ھاک-پارێ ڤەرا کۆیی ب کوردی، ژ کۆمیسیۆنا ژنان یا PWK نەبەھات یلماز داخویانییا ھەڤبەش ب ترکی خوەند.
داخویانییا ھەڤبەش یا کۆمیسیۆنا ژنان یا ھاک-پار و کۆمیسیۆنا ژنان یا PWK وەهایە:
ژ بۆ رایا گشتی و چاپەمەنیێ
ئەم ھەموو ژنێن کو ژ بۆ وەکھەڤی و ئازادیێ تێدکۆشن سلاڤ دکن.
ئیرۆ 8 ئادارێ رۆژا ژنێن جیھانێ یە. ئەم ب ڤێ وەسیلەیێ تێکۆشینا وەکھەڤی و ئازادیێ یا 8 ئادارێ یا ژنێن چار پارچەیێن کوردستانێ و ژنێن جیھانێ ب رێزداری و سەربلندی سلاڤ دکن.
وەکی کو ھوون دزانن، ژنێن کورد د 20 خزیرانا 1919 دە ل ستەنبۆلێ ب ناڤێ “جەمیعەتا تەعالی یا ژنێن کورد” یەکەم رێخستنبوون دەست پێ کرن. ئەڤ رێخستنبوون ب ناسنامەیا ژنێن کوردێن نەتەوەیی دەرکەت پێش. ئەڤ مۆدێلا یەکەما رێخستنبوونێ ژ بۆ دیرۆکا کورد و ژنێن کورد ب قاسی کو گرینگە، سەرکەفتنەکا سەربلندییە. رێیا کو “جەمعیەتا تەعالی یا ژنێن کورد” ب ناسنامەیا ژن و کورد نەخشاندیە، رۆناھی ددە مە، رێیا مە و تێکۆشینا مە یا مافدار رۆن دکە.
8 ئادارێ ژ بۆ ژنێن جیھانێ ب واتەیا تێکۆشین و بەرخوەدانا ل دژی زایەندپەرەستیێ دهێت، ژ بۆ بوویینا کەسەکی وەکھەڤ و ئازاد، ل دژی نەتەوەپەرەستی، چینایەتی، ئیستسمارا کەدێ، زەختا زایەندپەرەستی و نەوەکھەڤیا کو زھنیەتا سەردەستا کو د ھەموو قادێن ژیانێ دە بەلاڤ بوویە، ئافراندیە.
بەرەڤاژی تێگھشتنا سەردەستا مێتینگەرا نشتەجھ، د رۆناھیا راستیێن دیرۆکی یێن کو ھەم ژ بەلگەیێن نڤیسکی و ھەم ژی ژ ئەدەبیاتا گەلێری یا دەڤکی ھاتنە ڤەگوھەستن، ژنێن کورد؛ د رێڤەبەری، بورۆکراسی، دیپلۆماسی، ھونەر، ئەدەبیات و ژیانا جڤاکی دە بەرپرسیاریێن گران گرتنە سەر خوە و د دیرۆکا کورد دە جھەکی تایبەت گرتنە. د ھەموو دەمان دە ژنێن کورد د شەر و بەرخوەدانان دە د رەفێن پێش دە جھ گرتنە، بەردێلێن پر گران دانە و نرخێن مەزن ئافراندنە.
ئەم ب ھێز و کەڤنەشۆپیا تێکۆشینێیا کو مە ژ رابردوویا خوە وەرگرتیە، د ھەر قادا ژیانێ دە رۆلا خوەیا پێشەنگیێ دلیزن. تێکۆشینا مەیا ل دژی زھنیەتا زایەندپەرەست، یەکپەرەست، ھەر جورە توندیێ و نەوەکھەڤیێ ب بریارداری بەردەوامە.
ژنێن کورد یێن کو د دیرۆکا تێکۆشینا کورد دە رۆلا پێشەنگیێ لیستنە و ناڤێ خوە ب تیپێن زێرین ل دیرۆکێ نڤیساندنە؛ ژ بۆ ئاڤاکرنا پێشەرۆژەکە ئازاد و وەکھەڤ، ژ بۆ بێدەنگکرنا تەمامی یا چەکان و ڤەکرنا قادا سیاسەتا رەوا و مەشرووع، ئالا تێکۆشینێ ب سەربلندی ھلدگرن.
ژ بۆ ڤێ یەکێ ئەم دبێژن کو ژ بۆ پێشەرۆژەکا ئازاد، وەکھەڤ و عادل دڤێت د سەری دە ھەموو چەک بێن بێدەنگکرن. دڤێت ھەموو مافێن کو ژ ناسنامەیا کورد و ملەتبوونێ دەردکەڤن، ب گارانتیەکا قانوونی بێن ئەولەکرن، کوردی وەک ترکی ببە زمانێ فەرمی و پەروەردەھیێ، ھەموو ئاستەنگی و قەدەغەیێن د زەمینا ئیداری و حقووقی دە بێن راکرن. دڤێت مافێن مەشرووع و کۆلەکتیف ب گارانتیەکا دەستووری بێن رادەستکرن.
وەکی ژنێن کورد، دڤێت ئەم د ھەر قادا ژیانێ دە ب ئیسرار ب ئەرک و بەرپرسیاریا نەتەوەیی و مرۆڤی تێبکۆشن. ئەم ئاخافتنا کوردی، هاندانا ئاخافتنا ب زمانێ دایکێ لگەل زارۆکێن خوە وەکی بەرپرسیاریەکا دیرۆکی دبینن. ئەم ژ بۆ قەبوولکرنا کوردی وەکی زمانێ فەرمی و پەروەردەھیێ، ھەر کەسی ڤەدخوینن تێکۆشینا هەڤبەش. وەرن ئەم ب ناسنامەیا خوە یا ژنێن کورد، ب نرخێن تێکۆشینا خوەیا وەکھەڤیخواز، نەتەوەیی، دەمۆکراتیک و ئازادیێ ھێز بدن ھێزا خوە!
بژی تێکۆشینا ئازادی و وەکھەڤیێ یا ژنێن مە!
کۆمیسیۆنا ژنان یا ھاک-پارێ
کۆمیسیۆنا ژنان یا پارتیا وەلاتپارێزێن کوردستانێ
