بووبێ ئەسەر
زیندانا دیاربەکرێ ژ بۆی کو ھەمی ھێژاییێن کوردان تێک ببە، ھاتبوو دامەزراندن. لۆما ژی ژ بۆنا رەنگ و دەنگێن کوردان، سەمبۆل و ھێژاییێن وان ژناڤ ببت، ب ھەر ئاوایێ کار و خەبات، تەعدا و ئێشکەنجە ل سەر سەرێ گرتیان دکرن و دجەرباندن.
ژ بەر ڤێ بوو کو وان زمانێ کوردی د زیندانێ دە ل گرتیان و ل کەسێن دھاتن سەرەدانا زارۆکێن خوە ژی، قەدەغە کربوو. ئارمانج ژ ڤێ کاری ژ بیرکرنا زمانێ کوردی و خورتکرنا زمانێ ترکی بوو.
کاربدەستێن زیندانێ باش دزانی کو بکارئانینا زمانێ ترکی، دێ بتە سەدەما ژبیرکرنا زمانێ کوردی و ب کارئانینا زمانێ ترکی. د ڤی واری دە چ ژ دەستێ وان ھاتبوو کرن و د گەلەک وار و مەرحەلەیان دە ب سەر ژی کەتن.
داگیرکەران و ب تایبەتی کاربدەستێن وێ زیندانێ، ناسکرنا سەمبۆلێن کوردی و کوردستانێ ل زیندانیان قەدەغە کربوو. کاربدەستێن زیندانێ ژ بۆنا یێن د زیندانێ دە بوون ب ناساندنا سەمبۆل و ھندەک تایبەتمەندیێن ترکان ب دارێ زۆرێ بدن ناسکرن و قەبوولکرن، کار و خەبات دکرن و کربوون.
یەک ژ وان ژی دانە ناسینا ئالایێ ترکیێ بوو کو ئەو ل سەرانسەرێ دیوارێن زیندانێ ھاتبوو نەقشاندن. ڤێ تێری نەکر سالۆن و دیوارێن ھەمی قاویشان ب ئالایێ ترکی خەملاندبوون. ب سەردە بانێن قاویشان ژی ب تەمامی ب ئالایێ ترکیێ نەقشاندنبوون.
ژ خوە ل وێ زیندانێ، رازان تەنھا ل سەر پشتی بوو. شکل و ئاوایێن دن ھاتبوون قەدەغەکرن. دەما کو ئەم وەکە گرتیێن وێ زیندانێ رادزاین، چاڤێن مە ب وێ ئالایی دکەت. ھەتا کو ئەم د خەودە چووبانا، چاڤێن مە ھەر ل وی بوو. رەنگ و دەنگێ ئالا، خوەندنا سروودێن ل سەر وی، بێ داخوازی ژی د مەژیێن گەلەکان دە حەزکرنا وێ ئالای روودنشت.
واتە رابوون و روونشتنا مە و ھەتا رازانا مە ژی، چاڤێن مە تەنێ ئالایێ ترکان و سروودێن وان یێن نیژادپەرەستی کو ل سەر دیواران ھاتبوون نڤیسین، ددیتن. ئارمانج ژ وێ رەنگ و شکلێ ئالایێ ترکان، ئەو بوو کو ژ دیتنا چاڤان دەرباسی مەژی ببا. ئەڤ ژی دەم دھات کو ئەو ئالایێ ب خوینا کوردان ھاتبوو چێکرنێ ب ھندەۆک گرتیان خوەشک دھات دیتن یان ئەو وەکە ئالایێ خوە ددیتن.
لۆما ژی گەلەکێن ژ وێ زیندانێ دەرکەتین، رێڤەبر و بەرپرسێن پەکەکێ تم دئانین زمان و دگۆتن: “تو پرۆبلەمەکا مە لگەل ئالایێ ترکان نینە”. ژ خوە چ بوو ژ ڤێ دەستپێ بوو.
لێ ئەم ڤێ یەکێ ژی باش زانین کو ژ رۆژا پەکەکە ھاتیە سەر ئەردێ کوردستانێ و ھەتا نھا ب چ ئاوایی ئالایێ کوردی وەکە ئالایێ کوردسانیان قەبوول نەکریە. ژ بۆنا کو ئەو وەکە ئالایێ کوردان نەیێ ناسکرن ژی ھەتا نھا چ ژ دەستێ وێ ھاتیە کریە و دکە.
سەدەما ل دژ ئالایێ کوردی دەرکەتاندن، نەناسکرنا روحیەتا کوردی و وەلاتێ کوردان ئانکو کوردستان بوو. ژ بەر کو ئاقلمەند و رێڤەبرێن پەکەکێ باش دزانی کو ئالا نامووسە، ئالا وەلاتە، ئالا ئازادییە، ئالا خوەناسییە. ئالا رەمز و سەمبۆلا وەلاتەکییە. ھەر ملەتەک ھەر وەلاتەک ب ئالایێ خوە تێتە ناسکرن. ب نەرین و دیتنا ئالایەکێ مرۆڤ دزانت کو خوەدیێ وێ ئالا کییە یان کینە. ژ بەر ڤێ گرینگیێ یە کو داگیرکەرێن مە تم ھەول دانە، کار و خەبات کرنە کو کورد ڤێ ئالا ناسنەکن. ئەڤ ژی ل سەر دەستێ پەکەکێ ئەنجامدا و ئەنجام ددن.
ئەم کورد ژی خوەدێ ئالایێ خوە نە و ئەڤ ئالایە ھەبوونا مە د قادا ناڤنەتەوەیی دە ددە ناسین کو ئەم کوردین. ئەڤ ئالایێ پیرۆز ژ شۆرەشا ئاگری دە رەنگ و دەنگێ خوە وەکە ئالایێ کوردی گرتبوو. د کۆمارا کوردستانێ یا ل مەھابادێ دە ئەڤ ئالا وەکە ئالایێ دەولەتا کوردی ھاتە دانەسین و ناسکرن.
نھا ئەڤ ئالایە، ل باشوورێ کوردستانێ ل ھەمی دایرەیێن دەولەتێ، ل دبستان و د قادا لەشکەری دە ھەیە. لۆما ئێدی ھەمی جیھان دزانن کو ئەڤ ئالایێ کوردانە.
لێ ھێژ ژی پەکەکە و ھەمی ھەڤالبەندێن وێ ل دژ ڤی ئالیی نە. ژ بەر کو ئەو باش دزانن کو قەبوولکرنا ئالا، تێ واتەیا کوردستانەکا سەربخوە. ئاھا نەقەبوولکرنا پەکەکێ یا ئالایێ کوردستانێ ژ بەر ڤێ تێ.
پەکەکێ چ جاران دەولەت ئانکو کوردستانەکا سەربخوە نەخوەستیە کو ئالا کوردی ژی قەبوول بکن. نەقەبوولکرنا ئالایێ کوردی ب رامانا نەخوەستنا کوردستانێ دهێت.
ھەگەر ئەم ل داخویانی و بەلاڤۆکێن پەکەکێ، رێبەر و رێڤەبرێن وێ بنێرن، ئەم دێ ببینن کو ھەمی ب یەک دەنگی ل دژی ڤێ ئالای دەردکەڤن. واتە ب کورت و کورمانجی پەکەکە ل دژ ئالایێ کوردستانێ یە، ناخوازیت وەلاتەک ب ناڤ کوردستانێ ھەبت یان بهێت دامەزراندن.
کەس، رێخستن و رێڤەبرێن ڤی ئالایێ پیرۆز قەبوول دکن، پەکەکێ تم شەرێ وان کریە و دکن. ل کوچە و کۆلانان ئەڤ ئالایێ پیرۆز شەوتاندیە. یێن ئەڤ ئالایە پاراستین شەرێ وان کریە. ئیسپاتا ھەری مەزن ژی ئەوە کو پشتی ئازادیا باشوورێ کوردستانێ، پەکەکێ د ھەر واری دە شەرێ وان کرییە و دکە.
پەکەکە ژ رۆژا رۆژدەیە کو شەرێ بارزانیان دکر و دکن. ژ بەر کو بارزانیان تم خوەدیتی ل وی ئالایێ پیرۆز کرنە، ئەو پاراستیە و ھەول دانە کو وی ئالای رۆژەکێ ل سەر چیا، کەندال و نەوالێن کوردستان ھلدن. ژ بۆنا ئەڤە نەبت، پەکەکە تم شەرێ پەدەکێ و بارزانیان دکە.
دڤێت ئەڤە باش بهێتە زانین کو، د وێ زیندانێ دە چ تشتێن ژ بۆنا مە زیندانیان باش بوون، ل مە ھاتبوون قەدەغەکرنێ. ل سەر ئاخا پیرۆز ژی، چ تشتێن ژ بۆنا کوردان باشن و باش بوون، پەکەکێ ل کوردان قەدەغە کربوون و کرنە. لۆما ژی د تەکۆشینا خوەیا زێدەیێ چل سالان دە رۆژەکێ ژی پەکەکەیی ل ئالایێ کوردستانێ خوەدی دەرنەکەتنە و ژ بۆنا ئەو نەیێ ھلدان و ناسکرن ژی چ ژێ ھاتیە کریە و دکە.
تێبینی: نەورۆزا گەلێ خوە پیرۆز دکم. ب ھێڤیا کو ئەم رۆژەکێ نەورۆزا خوە د کوردستانەکا ئازاد و سەربخوە دە پیرۆز بکن.
