پەکەکە تەکەزێ دکە کو، ھندی ئێریشێن ئارتێشا ترکیەیێ ل سەر وان بەردەوام بن، کۆنگرەیا خوەھەلوەشاندنێ لدار ناخن.
ئەندامێ کۆنسەیا برێڤەبرنا کۆما جڤاکێن کوردستانێ (کەجەکێ) مستەفا کاراسۆ ل سەر پرۆسەیا نوو یا ئاشتیێ راگەھاند، “ژ بۆ کو پارتیا کارکەرێن کوردستانێ (پەکەکە) بکارە کۆنگرەیا خوەھەلوەشاندنێ ل دار بخە، دڤێت ترکیە ئێریشێن خوە راوەستینە و رێبەرێ پارتیا کارکەرێن کوردستانێ (پەکەکێ)یێ زندانکری عەبدللا ئۆجالان ب رێ ڤە ببە.”
مستەفا کاراسۆ پێدڤیژی دبینە کو، “دەستھلات گۆتنێن خوە ل سەر وێ پرۆسەیێ ب جھ بینە و پەرلەمان وێ پرۆسەیێ بخە ناڤ چارچۆڤەیا قانوونی.” ھەروەسا گۆت، “ئەگەر پێنگاڤان ژ بۆ ڤێ پرۆسەیێ نەهاڤێژن، ئەم نکارین ب ڤی ئاوایی نھا راوەستن.”
ئەڤ د دەمەکێ دەیە کو، سەرۆکێ پارتیا تەڤگەرا نەتەوەیی (مەھەپێ) دەولەت باخچەلی بەری پێنج مەھان داخواز ژ رێبەرێ پارتیا کارکەرێن کوردستانێ (پەکەکێ)یێ زیندانکری عەبدللا ئۆجالان کر کو، پەکەکێ ھەلوەشینە. ئۆجالان ژی ل رۆژا 27ێ شباتێ بانگ کر کو، پەکەکە چەکێ خوە دانە و خوە ھەلوەشینە.
مالپەرا خەبەرتورکێ د راپۆرتەکێ دە راگەھاند کو، تێ پێشبینیکرن کو ل مەھا نیسانێ کۆنگرەیا پەکەکێ ژ بۆ مەرەما دانانا چەکان ب رێ ڤە بچە. بەری وێ ژی شاندا ئیمرالیێ یا پارتیا وەکھەڤی و دەمۆکراسیا گەلان (دەم پارتی) لگەل سەرۆککۆمارێ ترکیەیێ رەجەب تەییب ئەردۆگان دجڤە. ژ بۆ وێ مەرەمێ ژی د چەند رۆژێن بهێت دە، سەرۆکاتیا کۆمارا ترکیەیێ ژڤانەکی ژ بۆ دەم پارتیێ دیار دکە.
ل گۆر زانیارێن وێ مالپەرێ، پشتی جڤینا وان یا لگەل ئەردۆگان، شاندا دەم پارتیێ سەردانا گراڤا ئیمرالیێ دکە و ژ بۆ جارا چارێ ئۆجالان دبینە. تێ چاڤەرێکرن کو ئۆجالان جارەکا دن تەکەزێ ل سەر دانانا چەکان دکە و پشتی وێ پەیامێ ژی پەکەکە د ڤێ مەھێ دە کۆنگرەیا خوەھەلوەشاندنێ لدار دخە.
